Gjermania si shpëtim, pesë shqiptarë “mësyjnë” te BV Essen

Sport Ekspres — Sun, 30 Jun 2019 11:38:35 +0000

Jo vetëm infermierët ikin drejt Gjermanisë, prej kohësh në mase janë edhe futbollistët që mundohen të gjejnë “strehë” në ligat inferiore të këtij vendi. Janë të shumtë ata që po luajnë me ekipet shqiptare atje, ndërkohë që bëjnë edhe punë të tjera.

Numri i atyre që duan të luajnë në Gjermani sa vjen e rritet dhe së fundmi janë pesë lojtarë që janë paraqitur pranë BV Essen. Bëhet fjalë për një klub që garon në ligën e gjashtë, që “josh” më shumë se klubet tona të Kategorisë së Parë.

Sigurisht, me pagat që marrin, gjithmonë nëse i marrin, askujt nuk i bëhet të luajë më futboll dhe shpresat janë të nisin një jetë më të mirë në një vend evropian. Përmes futbollit ata duan të çajnë dhe fillimisht do të duhet të bindin me cilësitë e tyre.

Orgest Buzi, mbrojtës 24-vjeçar, sezonin e fundit ishte titullar rregullisht tek Apolonia. Në të shkuarën është aktivizuar edhe te Bylisi, Himara, Dinamo dhe Sopoti. Me ballshiotët madje ka provuar të luajë në Superiore.

Erald Kolgega, mesfushori, dhe Gëzim Hyska, sulmues, gjithashtu kanë qenë pjesë e Bylisit dhe Dinamos dhe duan të luajnë në Gjermani, ashtu sikurse Kevin Myslymi, një tjetër “ish” i bluve që së fundmi u aktivizua te Vora. Brixhild Brahimaj është një tjetër që po tenton të luajë me Bv Essen. Mesfushori dy sezone më parë luajti në elitë me Luftëtarin, për të kaluar më pas te Besa dhe Elbasani.

Kolgega: Koha që Dinamo të kthehet në elitë!

Sport Ekspres — Wed, 08 May 2019 09:57:17 +0000

Dinamo do vendin e dytë dhe po zhvillon një betejë në distancë me Besëlidhjen. Blutë këtë javë do të luajnë në transfertë me Erzenin, kurse lezhjanët presin Korabin. Skuadra e drejtuar nga Igli Allmucca do tentojë të marrë pikët e plota në “Tofik Jashari”.

Mesfushori Erald Kolgega flet për “SportEkspres.com” dhe e shikon si një ndeshje të vështirë atë me Erzenin. “Çdo transfertë ka qenë e vështirë në të gjitha këto ndeshje të fazës së tretë dhe Dinamo ka bërë më të mirën e saj. Jemi në rivalitet të plotë me Besëlidhjen për vendin e dytë dhe e besoj se pas fitores këtë javë me Erzenin në Shijak do jemi më pranë synimit tonë. Javën e fundit presim Besëlidhjen dhe do tregojmë se e meritojmë këtë vend”, deklaron Kolgega.

Dinamo në fillim të sezonit synonte Superiore, por nuk ia doli dot. Në lidhje me këtë Kolgega shton: “Objektivi ynë quhet i realizuar me vendin e dytë në grup. Vllaznia u tregua skuadër më e mirë dhe e meritoi ngjitjen në Superiore. Sezonin tjetër Kategoria Superiore do të jetë objektivi ynë final, sepse mendojmë se ka ardhur koha që Dinamo të luajë në elitë”.

AGRON KAJA