Memushi vlerëson drejtuesit e Bylisit si një pikë e fortë e kërtij klubi, për shkak të financave të garantuara që ky klub ka. Fjalë të mira edhe për grupin e lojtarëve, që me siguri do të përforcohet me disa lojtarë të tjerë cilësorë. Sa i takon finales me Vllazninë, Memushi shikon ballshiotët favoritë.

INTERVISTOI: AGRON KAJA

Si e shikon rikthimin e Bylisit në Kategorinë Superiore, të vonuar apo në kohën e duhur?
-Rikthimin e Bylisit e shoh me shumë optimizëm. Kur shoh disa skuadra në Superiore që kanë problematika në financa e drejtim dhe më shpejt zbresin nga kategoria se sa bëjnë paraqitje të mira, ngjitja e Bylisit duket e vonuar. Po flas për një klub të mirëorganizuar.

Mendoni se këtë herë skuadra ballshiote do të ketë forca për ta përballuar elitën?
-Ka shumë ndryshim Bylisi në raport me sezonet e kaluara. Përveçse ka lojtarë shumë cilësorë, ka një organizim e menaxhim shumë profesional. Pak skuadra të Superiores e kanë, ndaj shikoj një Bylis të denjë për sezonin e ri.

Çfarë ndryshimesh duhet të bëjnë drejtuesit e Bylisit për sezonin e ardhshëm?
-Ndryshime duhet të ketë në skuadër, sepse nuk ka kuptim ngjitja në Superiore. Me gjithë respektin që kam për portierin Bytyçi, ndryshimi te Bylisi duhet të fillojë që nga porta. Drejtuesit duhet të përforcojnë edhe boshtin e skuadrës, tani është në Superiore!

Kampionati i Kategorisë së Parë po kontestohet për formulën, a mendoni se duhet ndryshuar që në sezonin e ri?
-Me çfarë po prodhon kjo formulë, ajo duhej të ishte ndalur disa sezone më parë. Çdo vonesë në ndryshimin e saj do të ketë ndikime negative në nivelin e futbollit në Kategorinë e Parë, pse jo edhe më poshtë. Një grup me 14 apo 16 skuadra është shumë më normal për këtë kategori.

Të enjten luhet finalja e Kategorisë së Parë, cilën skuadër shikoni favorite, Bylisin apo Vllazninë?
-Duke qëndruar në argumentat që ju përmenda më sipër, unë mendoj se Bylisi do jetë skuadra fituese e finales. Bylisi ka më shumë kualitete nga Vllaznia dhe të mos harrojmë se Grupi B kishte në përbërje skuadra që kanë luajtur në elitë, më të forta nga Grupi A.

Eqerem Memushi ka qenë futbollist i Flamurtarit e Partizanit, me të cilët ka fituar dy tituj kampion dhe Kupën e Shqipërisë, ndërsa në periudhën 1987-1993 ka qenë edhe pjesë e Kombëtares. Nga viti 2006 ai ka qenë pjesë aktive e trajningut, ku ka drejtuar në disa sezone Flamurtarin, Tomorin, Apoloninë, Naftëtarin e Bylisin, dhe në dy sezonet e fundit edhe Kombëtaren U15.

INTERVISTOI: AGRON KAJA

Sfida e djeshme Skënderbeu-Partizani çeli fazën e tretë të Superiores, u ngjit ndeshja në nivelet e pretendimeve të skuadrave?
-Ka qenë një ndeshje e luftuar nga të dyja skuadrat, dhe si e para e fazës së tretë mendoj se kjo sfidë dha sinjale për një vazhdimësi të mirë. Partizani u tregua më konkret në lojë dhe e morri atë që kërkonte, ndërsa Skënderbeu u ndëshkua nga episode të veçanta.

Kur ju luanit në përbërje të Partizanit, me cilat skuadra kishte më shumë rivalitet, sikundër dje me Skënderbeun?
-Flasim për 25 vite më parë dhe atëhere Partizani kishte disa skuadra rivale, ku Dinamo, 17 Nëntori, Vllaznia e Flamurtari përbënin pesëshen më të fortë në Kampionat e Kupë. Më shumë rivalitet Partizani kishte me Dinamon, dhe ishte ndjenjë e veçantë në këto përballje.

Sot dhe nesër luhen katër ndeshjet e tjera të javës së 19-të të Superiores, si i shikoni këto përballje?
-Të gjitha janë takime të forta, edhe për faktin se të gjitha skuadrat vijnë nga fazat përgatitore me ndeshje miqësore e përforcime në merkato. Kukësi-Laçi është sfida që do flasë shumë për kreun dhe Europën, ndërsa një fitore e Kastriotit e mban atë në luftën për mbijetesë.

Nga minifaza përgatitore që kanë zhvilluar skuadrat, miqësoret dhe merkatua që kanë bërë, çfarë ndryshime mund të priten?
-Duke ju referuar të gjithë elementëve që afron muaji janar, nuk mendoj se do të kemi ndryshime nga dy fazat e para, sepse faza e tretë tregon më shumë stabilitet, ndërsa faza e katërt është më ndryshe. Por do të ketë më shumë bukuri e ndjekshëmri nga java në javë.

Po situatën te Flamurtari, si e përshkruani, kryesisht pas humbjes në Kupë me Tiranën?
-Humbja në Kupë nuk tregon se Flamurtari e ka humbur besimin dhe shpresat për kualifikim. Një fitore në Durrës ja forcon më shumë shpresat për zonën e Europës, në të kundërt, del jashtë rivalitetit për një vend në pesë skuadrat e para.

Në garën për kreun e fundin e renditjes së Superiores, mendoni se do të ketë ndryshime sikundër në 18 javët e luajtura?
-Deri tani, referuar edhe fitores dje në Korçë, Partizani po konsolidohet drejt titullit kampion, Kukësi do të jetë rival serioz për kreun, ndërsa Teuta duket si koçkë e fortë për të dy. Laçi do kërkojë të përfitojë nga gabimet e tre skuadrave të kreut për të siguruar Europën.

Cilat skuadra i mendoni më të rrezikuarat në zonën për mbijetesë?
-Mendoj se katër skuadrat e fundit të renditjes do të luftojnë mes tyre për mbijetesë. Do ta kenë shumë të vështirë garën mes tyre të gjitha këto skuadra, sepse janë shumë afër me pikë, por në këtë valle e përjashtoj Tiranën.

Eqerem Memushi ka qenë pjesë e futbollit vlonjat në periudhën 1986-1996. Në sezonet 1985-1987 ka luajtur në përbërje të Partizani ku edhe ka dalë kampionë në 1986-1987, ndërsa e ka fituar titullin edhe me Flamurtarin në sezonin 1990-1991. Si trajner, Memushi ka drejtuar Flamurtarin, Tomorin, Apoloninë, Bylis, Naftëtarin e Kombëtaren U15.

INTERVISTOI: AGRON KAJA

Sa e justifikoi lojën dhe rezultatin kryendeshja e javës së 17-të Partizani-Kukësi 0-0?
-Unë mendoj se ndeshjet e forta si kjo Partizani-Kukësi, gjithmonë janë të dyzuara në kuptimin e ngarkesës psikologjike që ato krijojnë. Barazimi për mua ishte i drejtë, dhe këtu kam parasysh faktin që Partizanit i mungonte Asani, ndërsa Kukësi që u tregua më racional në lojën e tij.

Pse nuk u shënua gol në këtë sfidë: nga terreni i rënduar, kishte mangësi në finalizim apo kishte një qasje për barazimin?
-Nga të tre këto argumente unë i qëndroj mendimit tim se, mangësia në finalizim ishte kryesore që rezultati mbeti pa gola. Sepse në sfidën Partizani-Kukësi munguan ekspertët e golit, ata që para portës nuk falin. Mundet që në këtë barazim të ketë ndikuar edhe ana emocionale.

Nëse kjo ndeshje do të luhej me tifozë, do kishte më shumë atmosferë dhe tjetër rezultat?
-Padiskutim që po, sepse tifozët janë bukuria e lojës së futbollit dhe te skuadrat ata janë shtysë për të dhënë maksimumin në fushë. Shkallët bosh të stadiumit “Selman Stërmasi” nuk të jepnin imazhin e një supersfide. Pa tifozë krijohen humbje financiare, një tjetër tregues negativ.

Sot dhe nesër luhen katër ndeshjet e tjera të javës së 17-të, ku mendoni se do të kemi rezultat surprizë?
-Surprizat janë bashkëudhëtarë me futbollin dhe mbeten një nga elementët e bukurisë së tij, por në këto sfida, më të favorizuara duken skuadrat vendase. Kështu, Flamurtari fiton me Kamzën, Skënderbeu me Luftëtarin dhe Laçi me Tiranën. Te Kastrioti-Teuta mund të kemi rezultat ndryshe.

Po moti me reshje shiu, ndikoi në rezultatin e kësaj ndeshjeje?
-Jo, nuk ndikoi negativisht. Terreni i fushës në “Selman Starmasi” është shumë i mirë, madje do të thosha se të gjitha fushat e Kategorisë Superiore janë cilësore dhe në rast reshjeje loja nuk pengohet. Nuk ishin reshje të mëdha që të kishim përmbytje, atëherë po.

Në dy javët e fundit të fazës së dytë, veç Partizanit në krye, priten ndryshime në tabelën e renditjes?
-Besoj se renditja është e përcaktuar me gjashtë skuadrat e kreut që do luftojnë titullin kampion dhe një vend në zonën e Europës, dhe katër skuadrat e fundit që janë në zonën e mbijetesës. Partizani mbetet në krye me këtë shkëputje, ndoshta do të ketë lëvizje të vogla në renditje.

Po mbyllet gjysma e parë e Superiores 2018-2019, ju shikoni ndonjë mangësi në ecurinë e saj?
-Duke ju referuar vetëm anës mediatike, problem mbetet korrektesa me pagat e lojtarëve dhe të stafeve teknike. Ky është një moment me ndikim në lojën e skuadrave, dhe unë e shoh si dobësinë më evidente në këto javë të këtij sezoni në Superiore.