Madje, trajneri Elvis Kotorri deklaron se atyre u ka ikur fitorja nga duart, pasi ishte skuadra e tij që e menaxhoi më mirë këtë takim dhe pësoi golin e barazimit në minutën e 85-të. Për SportEkspres.com trajneri i verdhebluve deklaron se ky barazim tregoi forcën e vërtetë të Elbasanit.

“Kemi zhvilluar një ndeshje të mirë në Ballsh, e vumë në vështirësi Tomorin dhe prisnim që të dilnim nga ‘Adush Muça’ me fitore. Pësuam gol në fund, por gjithsesi skuadra tregoi rritje në lojën e saj, tregoi forcën e vërtetë të Elbasanit”, theksoi trajneri i Elbasanit.

Për fazën e tretë tekniku Kotorri nuk e mohon vështirësinë, por përgjysmimi i pikëve i bën që të besojnë më shumë te mbijetesa. “Pas barazimit me Tomorin, skuadra më duket shumë më e motivuar, më e saktë në veprimet e saj në fushë. Ndaj edhe besoj shumë se në fazën e tretë do të bëjë më shumë për mbijetesën. Ne nuk do tërhiqemi, shanset janë në fushë në tetë ndeshjet që do luajmë”, përfundoi ish-portieri i verdhebluve.

AGRON KAJA

Ndërsa skuadra vuan këto pasoja, në javën e parafundit të fazës së dytë Elbasani pret në fushën e vet Pogradecin, në një sfidë të cilën trajneri Elvis Kotorri e quan si finale për objektivin që kanë verdheblutë.

Për SportEkspres.com, ish-portieri deklaroi se synimi i tyre i vetëm është marrja e tri pikëve. “Të gjitha ndeshjet janë të vështira për Elbasanin, edhe kjo me Pogradecin që do të luajmë nesër. Për ne do të jetë si një finale dhe vlerësimi është në maksimum, vetëm për të marrë tri pikët. Skuadra ka mungesë eksperience, sepse ka në përbërje shumë futbollistë të rinj. Të gjithë kanë dëshirë për të luajtur dhe për të fituar”.

Në ecurinë e Elbasanit për këtë sezon, trajneri Kotorri beson te mbijetesa, edhe pse ende skuadra vazhdon të “zvarritet” nga gjyqet e shumta me ish-pronarët anglezë dhe situata është ende e paqartë.

AGRON KAJA

“Lojtarët që mbyllën 14 ndeshjet në gjysmën e parë të këtij sezoni janë treguar të gatshëm, dhe stërvitjen e nisëm në datën 4 janar. Por nisur nga ky kontingjent, Elbasani e ka të kushtëzuar merkaton, me synimin që mbijetesa në Kategorinë e Parë të garantohet. Është bashkuar me skuadrën Xhulio Jaupi pas rikuperimet, ndërsa nga Pepa ka ardhur Gledis Hida, njëherësh edhe lojtar i Kombëtares sonë U-19”, kështu theksoi Kotorri në këtë deklarim.

Por trajneri i Elbasanit ka edhe një merak që synimet e këtij sezoni të realizohen. “Brenda këtij muaji na është deklaruar nga zyrtarët e klubit se do të mbyllet gjyqi me anglezët, dhe Bashkia së bashku me Presidentin Arben Laze do ta kenë rrugën ligjërisht të hapur për organizimin e mirë e drejtimin e klubit. Janari pritet si muaji i Elbasanit që duam të gjithë”. Skuadra e Elbasanit është pjesë e Grupit B në Kategorinë e Parë, dhe pas 14 ndeshjeve renditet në vendin e 9-të me 10 pikë.

AGRON KAJA

Elvis Kotorri është një nga portierët më të mëdhenj që Elbasani ka patur në historinë e tij, pjesë e gjithë shkollës së portierëve cilësorë në Elbasan. Si futbollist ai e ka nisur me Elbasanin në vitin 1996, ndërsa kulmin e karrierës e ka patur në tre sezone me Dinamon. Në karrierën e tij ai ka fituar tre tituj kampionë me dy skuadra, 1 me Elbasanin dhe 2 me Dinamon, ndërsa ka luajtur edhe me fanelën e Shkumbinit në Kategorinë Superiore.

INTERVISTOI: AGRON KAJA

E kishit menduar bankinën e Elbasanit në këtë situatë të vështirë në Kategorinë e Parë?
-Si futbollist e nisa dhe e mbylla karrierën me Elbasanin, dhe më e bukur është që karrierën si trajner ta nis këtu. Momenti erdhi që në baniknë të ulem kur Elbasani ndodhet në situatë jo fort të mirë në renditje, por këtu kam ardhur që të ndryshojmë gjithçka te kjo skuadër.

Keni lënë fundin e renditjes në Grupin B, çfarë ka ndryshuar te Elbasani në tre ndeshjet e fundit?
-Besoj se ka ndryshuar shumë morali në skuadër, kryesisht pas ndeshjes që fituam me Orikun. Mendoj se pas kësaj fitoreje erdhi besimi te skuadra, sepse Elbasani ka një ekip me shumë futbollistë të rinj, të cilët kishin nevojë për më shumë besim në mundësitë e tyre.

Startin e këtij sezoni Elbasani e kishte shumë të dobët, ju si trajner i keni nxjerrë shkaqet?
-Natyrisht, dhe shkaku kryesor është se skuadra e Elbasanit u organizua me shumë vonesë për nisjen e sezonit. Arsyeja dihet, po vuajmë problematikat me kompaninë angleze që kishte presidencën dhe u përqendruam kryesisht tek elementë të rinj, që në Elbasan nuk mungojnë.

Në javën e 13-të fituat në transfertë me Apoloninë e cila shkarkoi trajnerin Miho, sportivisht ju si ndjeheni?
-Nuk ndjehem mirë që Apolonia ka shkarkuar trajnerin pas fitores sonë, por si trajner i Elbasanit nuk e fsheh të them se më vjen mirë që në Fier kemi arritur një fitore me shumë vlera, jo vetëm për tri pikët. Uroj që skuadra të ketë këtë vazhdimësi në ndeshjet e tjera.

Me këtë ecuri fitoresh, kanë ndryshuar objektivat e sezonit për Elbasanin?
-Objektivat e sezonit për ne ndoshta nuk kanë ndryshuar, dhe ende primar mbetet qëndrimi në Kategorinë e Parë. Por duke i parë ato ndeshje pas ndeshje, do të bëjmë maksimumin që rezultatet të jenë sa më pozitive. Mbijetesa në Kategorinë e Parë është në dorën tonë.

Të shtunën prisni në fushën tuaj Bylisin kryesues në Grupin B, e shikoni si një sfidë të vështirë?
-Realisht të gjitha ndeshjet janë të vështira, cilido që është kundërshtari. Natyrisht që me Bylisin kryesues vështirësitë janë edhe më të mëdha, kjo edhe për përbërjen që kjo skuadër ka aktualisht. Ne do bëjmë detyrën tonë në fushë, me synimin e vetëm për fitore.

Ndërprerja e Kampionatit, çfarë ju mundëson të ndryshoni në skuadër?
-Së pari ne shpresojmë të mbyllet sa më parë procesi gjyqësor që ka kompania angleze me ekipin e Elbasanit. Do të jetë një periudhë e ngarkuar me stërvitje dhe merkato, ndërsa ne do të jemi të përqendruar tek skuadra që aktualisht po mbyll gjysmën e parë të këtij sezoni.