edoardo reja

Plani i Rejës në debutim, dy sulmues dhe shumë… mbrojtës

Sport Ekspres — Sat, 08 Jun 2019 08:56:18 +0000

Edi Reja është gati të debutojë në krye të Shqipërisë. Tekniku italian do të drejtojë kuqezinjtë sot në ndeshjen me Islandën, e vlefshme për kualifikueset e Euro 2020. Në dy ndeshjet e para kombëtarja jonë ka marrë tre pikë, falë fitores me Andorrën.

Sot është me shumë rëndësi që kuqezinjtë të mos mposhten. Reja ka bërë gati kurthin, teksa në fushë do të zbresë një formacion me 5 mbrojtës. Edhe pse thuhet që do të luajmë me modulin 3-5-2, dy anësorët janë Aliji dhe Hysaj, mbrojtës tipikë.

Për të mbetur te formacioni, Berisha do të mbrojë katërkëndëshin, kurse në qendër të mbrojtjes risia është Dermaku. Krah tij do të aktivizohen Ismajli dhe Veseli. Në mesfushë “truri” do të jetë Migjen Basha, kurse krah tij priten Taulant Xhaka dhe Ergys Kaçe.

Në sulm do të kemi një dyshë të gjatë, Balaj-Cikalleshi. Një zgjedhje e bërë edhe për aspektin mbrojtës, pasi të dy këta lojtarë në goditjet standarde do të duhet të ndihmojnë skuadrën me shtatlartësinë e tyre.

EUROPEAN QUALIFIERS 2020– GRUPI H

E shtunë, më 8 qershor 2019, ora 15:00
Stadiumi “Laugardalsvollur”, Rejkjavik

SHQIPËRIA: Berisha – Ismajli, Dermaku, Veseli – Hysaj, Xhaka, Basha, Kaçe, Aliji – Balaj, Cikalleshi. Trajner: Edi Reja

Trajneri i ri i kombëtares, Edi Reja lëshon “bombën”

Sport Ekspres — Mon, 25 Mar 2019 16:38:18 +0000

Edoardo Reja ka marrë një ofertë zyrtare nga FSHF për të drejtuar kombëtaren shqiptare të futbollit. Trajneri e konfirmoi vetë këtë gjë për mediat italiane, ku tha se është takuar me presidentin e Federatës Shqiptare, por i ka kërkuar 24 orë kohë që të mendohet. Gjithashtu, Reja tha se vendimi i tij do të ndikohet nga ndeshja Andorra-Shqipëri. Laciali nuk mund të linte pa përmenduar as portierin Thoma Strakosha, për të cilin tha se dënimi ishte i tepruar.

“Dje shkova të flas me federatën, mora 24 orë kohë për të vendosur. Varet çfarë do bëjë Andorra sot”. Ai komentoi edhe dënimin që ish trajneri Krisitian Panuçi kishte marrë për Strakoshën: “Një vonesë e vogël është e pranueshme, m’u duk i tepruar dënimi“, ka deklaruar Reja për “Cittaceleste.it“.

ÇFARË THA DUKA PËR REJËN – “Edi Rejan e kam takuar në stadium pas ndeshjes, kishte ardhur për punët e tij, për të vëzhguar disa futbollistë. Nuk di ta them tanët apo të Turqisë. Nuk kam menduar asgjë se kush do të jetë trajner i Shqipërisë. Pas ndeshjes me Andorrën do të mendojmë për teknikun që i duhet skuadrës së bashku me stadin teknik të federatës. Nuk është një gjë e lehtë”, u shpreh për Supersport kreu i FSHF-së, Armand Duka.