Nuk munguan as batutat kundrejt presidentit të Kukësit, Safet Gjici, ekipin e të cilit nuk e konsideron një nga pretedentët për titull kampion.

Mes të tjerash, Hasanbelliu u shpreh: “Ky muaj është i veçantë, pasi mbush 20 vite si president i futbollit të Durrësit. Jemi brenda pritshmërive, pasi që në fillim të sezonit kërkonim Kupat e Europës. Kemi kërkesat tona kundrejt disa lojtarëve, por jemi mirë kështu.

Për mua kryesorja e këtij viti është bashkëpunimi me Bardhin, më ka ndihmuar jashtë mase. Kjo është një arsye kryesore që të ardhurat janë shtuar dhe janë vënë pikat mbi “i”.

Jemi skuadër e re, që u ndërtua nga fillimi. Por duke u rritur, do të përforcohemi edhe më shumë. Janë 2-3 lojtarë nga të cilët presim më shumë.

Arapi pothuajse është i Teutës, por për momentin ka një problem me ekipin e tij aktual. Por 99% është i Teutës. Latif pothuajse është i larguar, është shitur në Bjellorusi. Jemi në tentativa për të marrë 2 sulmues të huaj, një bullgar dhe një argjentinas. Do e marrim me doemos një lojtar dhe brenda këtij muaji do e themi kush është.

Jo, ne nuk kemi lojtarë për të shitur, por me Latif ishte zgjedhje e detyruar. Ai nuk i përmbushi pritshmëritë dhe nuk kemi qenë shumë të kënaqur nga ai. Fituam ca para nga shitja e tij dhe kaq.

Kallaku është një lojtar që i ka dhënë bukurinë skuadrës së Teutës, është një lojtar që shpresojmë ta kemi edhe vitin tjetër. Si durrsak që jam, shpresoj të qëndrojë edhe vitin tjetër, por po erdhi një ofertë e mirë, do të mendohemi.

Ne e kemi nisur për të hyrë në Europë, por ça ka? Edhe nëse dalim kampion? Mjafton që të mos kemi dëmtime dhe jemi në garë, pasi skuadrat janë aty-aty.

Po nuk e fitoi Teuta, ta marrë kush e meriton. Për kampion shoh Safetin, si Safet jo si skuadër, pasi Kukësin e shoh të pestin (qesh).

Nuk e mendoj se ka ndërhyrje në ndeshjet e kampionatit, por pakënaqësira ka. Ka arbitra të paaftë në Shqipëri, por ka dhe nga ata që e bëjnë me dashje. Këto probleme do të ekzistojnë, por janë minimizuar.

Unë jam optimist për këtë, pasi Liga thuajse është bërë. Kemi lënë Libohovën për këtë gjë dhe besoj se vitin tjetër do të fillojë. Do të funksionojë si projekt dhe do të jetë diçka shumë pozitive për ne presidentët”,- tha presidenti i Teutës.

Më pas, për mikrofonat e “RTSH Sport” foli edhe zv. presidenti i “Djemve të Detit”, Ardian Bardhi, i cili tha: “|Teuta është një skuadër që këtë vit ka pretendimet e veta. Jemi një skuadër që është ndërthurur me eksperiencë dhe talente. Presim më shumë nga kjo Teutë dhe shpresoj të arrijmë te objektivat tona.

Pse jo, të gjitha objektivat janë të pranueshme. Nëse ne jemi në renditje aty ku jemi dhe bëjmë merkato cilësore, pse jo të mos pretendojmë të gjitha gjërat, Kupën, Kampionatin dhe Kupat e Europës.

Sipas Hasanbelliut, skuadra e Teutës ka patur një suport të fuqishëm në këtë ecuri, pikërisht nga zëvendësi i tij, biznesmeni Ardian Bardhi. “Përveç punës së stafit teknik dhe të vetë lojtarëve, në këtë ecuri në dy fazat e para faktori kryesor është edhe ortaku im Ardian Bardhi, i cili po jep një suport të fuqishëm në menaxhim dhe në rritjen e financave të klubit”, kështu deklaroi mes të tjerave në këtë intervistë Presidenti i Teutës, Edmond Hasanbelliu.

INTERVISTOI: AGRON KAJA

Sa i kënaqur jeni me ekipin e Teutës për dy fazat e para të Kategorisë Superiore?
-Për ne si drejtues, pritshmëritë janë arritur. Sepse që në start ne kishim si objektiv të renditeshim në një vend në zonën e Europës. Aktualisht vendi i 3-të në renditje nuk është keq, sepse diferenca në 4 pikë me Partizanin e vendit të parë është e vogël.

Ju ka mbetur peng që në sezonin e kaluar nuk e ulët Bledi Shkëmbin në bankinën e Teutës?
-Shkëmbin ka një jetë që e njoh dhe tek Teuta ai në çdo kohë i ka patur dyert e hapura. Kam qenë në çdo kohë në kontakt me të, por përvoja në Kosovë mendoj se e ka ndihmuar profesionalisht. Me këtë seriozitet e përkushtim që ka aktualisht, besoj se do të ecë shumë mirë edhe si trajner.

Ku mendoni se ka ecur më mirë Teuta në dy fazat e para të këtij kampionati?
-Përveç punës së stafit teknik dhe të vetë lojtarëve, në këtë ecuri në dy fazat e para faktori kryesor është edhe ortaku im Ardian Bardhi, i cili po jep një suport të fuqishëm si në menaxhim, ashtu edhe në rritjen e financave të klubit. Puna e mirë e përbashkët ka dhënë këtë rezultat.

Keni ndonjë futbollist që e morët në merkaton e verës dhe në dy fazat e para ju ka zhgënjyer?
-Jo, për mua të gjithë janë munduar të japin më të mirën e tyre dhe kanë kontribut për këtë renditje që Teuta arriti në dy fazat e para. Por, të gjithë duhet ta rritin më shumë cilësinë e lojës së tyre në fushë, sepse kemi përpara një gjysmë sezoni shumë më të vështirë se gjysma që mbyllëm.

Në këtë merkato të janarit dukeni të maturuar, mendoni se e keni të plotësuar skuadrën?
-Jemi treguar të maturuar në këtë merkato, duke menduar se Teuta ka nevojë vetëm për përforcime  cilësore. Së pari ishte mbrojtësi Frashëri, por ju konfirmoj se edhe me Renato Arapin e kemi mbyllur marrëveshjen e këto ditë ai pritet t’i bashkohet skuadrës. Por presim edhe një supersulmues, që për momentin nuk po ja u deklaroj.

Teuta është një nga skuadrat e kreut të renditjes, ju mendoni se lufta për titullin kampion është e hapur?
-Ne luftën e kemi për një vend në Europë dhe këtu do të përqendrohemi më fort në dy fazat e tjera të kampionatit. Por duke qenë se jemi tre-katër skuadra në vendet e kreut dhe shumë afër me pikë, atëhere edhe lufta për titullin kampion besoj mbetet e hapur. Nuk do ishte keq edhe titulli!