Dvornekovic

Dvornekoviç transferohet tek kampionët e Islandës

Sport Ekspres — Fri, 04 Aug 2017 22:10:35 +0000

Matija Dvornekoviç ishte ndër të parët që u largua në përfundim të sezonit nga Kukësi. Kroati nuk preferohej nga drejtuesit dhe pas një sezoni e gjysmë u largua nga verilindorët, ku arriti të fitonte të gjithë trofetë e mundshëm në Shqipëri.

Edhe pse fillimisht u bashkua me HNK Goricën në Kroaci, duke marrë edhe shiritin e kapitenit, 28-vjeçari e ka zgjidhur marrëveshjen dhe tashmë do të nisë një aventurë të re tek kampionët e Islandës, FH Hafnarfjordur.

Dvornekoviç ka mundësinë që të luajë në raundin “play-off” të Europa Leagues, pasi islandezët u eleminuan nga Maribori në raundin e tretë të Champions-it, duke kaluar në kompeticionin e dytë për nga rëndësia. Shorti vendosi që të përballen me portugezët e Bragës.

Dvornekoviç gjen ekip, kthehet në Kroaci

Sport Ekspres — Sat, 22 Jul 2017 21:45:15 +0000

Pas një sezoni e gjysmë në Kukës, ku fitoi titullin kampion si protagonist, duke luajtur 40 ndeshje në total në Superiore, Matija Dvornekoviç është kthyer në shtëpi. Mesfushori 28-vjeçar, autor i 9 golave në Kukës, ka arritur marrëveshjen me HNK Goricën, klub i divizionit të dytë kroat, ku në fakt është si i shtëpisë, sepse ishte një pikë kyçe aty, para se të shkonte te Kukësi në janar 2016.

Sot Dvornekoviç ka luajtur në miqësoren Gorica-Vinogradar, që përfundoi 2-2. Dvornekoviç u aktivizua në pjesën e dytë, kur ndeshja ishte 1-2, dhe mori edhe shiritin e kapitenit. Pikërisht Dvornekoviç barazoi me 11-metërsh në minutën e 65-të të ndeshjes.

Vjen largimi i radhës, Dvornekoviç merr “valixhet”

Sport Ekspres — Sat, 10 Jun 2017 12:15:25 +0000

Kroati, i cili këtë sezon ka qenë një lojtar stabël në formacion, është zyrtarisht i larguari i radhës nga kampionët

Jurgen Zela

Ashtu siç ishte paralajmëruar, Matija Dvornekoviç nuk do të jetë më pjesë e klubit të Kukësi. Kroati ka ndërprerë zyrtarisht bashkëpunimin me Kukësin, me klubin që e ka konsideruar si të panevojshëm për sezonin e ardhshëm, duke mos i ofruar një kontratë të re mesfushorit. Me kuksianët ai arriti që të fitonte të gjithë trofetë kombëtar, madje si protagonist në Superkupën e Shqipërisë, duke realizuar dhe golin e parë të sfidës. Gjatë qëndrimit në Kukës, ai u aktivizua në 58 takime mes kampionatit, Kupës dhe ndeshjeve të Europës, duke arritur që të shënonte dhe 9 gola. Gjatë këtij sezoni, mund të veçohet goli i shënuar përballë Partizanit në javën e 32-të, që i dha avantazhin e përkohshëm Kukësit, pasi në fraksionin e dytë kryeqytetasit barazuan, por që dhe një pikë i gëzoi kuksianët. Një nga arsyet kryesore që shtunë në largimin e mesfushorit të avancuar ishte dhe paga e tij e lartë, sigurisht duke parë dhe paraqitjet e tij në fushën e lojës, pasi nuk bënte ndonjë diferencë të jashtëzakonshme me pjesën tjetër të skuadrës.

LARGIMET

Puna për formimin e një skuadre të re normalisht që do të niste me largimet e lojërave, kjo për të krijuar dhe një ide më të qartë se ku ekipi ka nevojë për ndërhyrje. Me largimin e kroatit Dvornekoviç, numri i lojtarëve të larguar zyrtarisht shkon në tre me Lushtakun dhe Meminin që janë njoftuar që më parë. Ditët në vijim pritet që të zyrtarizohet dhe largimi i disa lojtarëve të tjerë, me Grecën dhe Rangelin që rrezikojnë më së shumti.

AFRIMET

Edhe pse skuadrat e tjera kanë nisur me goditjet e para, në Kukës ende nuk ka zbarkuar askush. Normalisht fakti që do të luajnë në Champions dhe aventura në arenën ndërkombëtare nis në turin e dytë, koha në dispozicion për të bërë goditjet e nevojshme është më e madhe se skuadrat e tjera. Strategjia duket e qartë si në merkaton e janarit, ku pritet që blerjet të jenë “të goditura”, por ndryshe nga merkato e dimrit, mund të jenë dhe të kushtueshme, pasi pretendimet për të arritur në grupet e Europa League kërkojnë dhe të tilla sforco financiare. Përforcime do të ketë nga mbrojtja në sulm, por kampionët po presin qetësisht momentin e duhur, për të mos gabuar dhe afruar lojtarë që më pas kanë rezultuar shumë larg pritshmërive.