Durmishi

Ekipet turke të “fiksuar” pas shqiptarëve, Beshiktash me ofertë konkrete

Sport Ekspres — Sun, 04 Aug 2019 09:11:47 +0000

Në kampionatin turk të futbollit, po shtohen ndjeshëm futbollistët shqiptarë. Futbollisti më i fundit me origjinë shqiptare që mund të transferohet në Turqi, është Riza Durmishi. Mbrojtësi i Lacios nuk ka arritur të bindë drejtuesit e kryeqytetasve italianë dhe me shumë gjasa do të largohet këtë verë.

Ekipi që kërkon me ngulm shërbimet e tij është Beshiktash. Gjiganti turk është gati të ofrojë 2.5 milionë euro për shërbimet e mbrojtësit të majtë, por Lacio kërkon 4 milionë. Pritet një ofertë e dytë nga gjiganti turk dhe bisedimet mes dy klubeve vazhdojnë.

Një formacion i tërë në infermierinë e Lacios, mes të dëmtuarve dhe dy shqiptarë

Sport Ekspres — Sat, 16 Feb 2019 21:16:55 +0000

Skuadra e Lacios po përjeton një krizë dëmtimesh si kurrë më parë. Infermieria e klubit të drejtuar nga Simone Inzagi është mbushur me 10 lojtarë, të cilët nuk do të jenë të gatshëm për takimin e nesërm kundër Xhenoas.

Në listën e të dëmtuarve bënë pjesë dhe dy lojtarët shqiptarë Riza Durmishi dhe Valon Berisha. Mungesa më të rëndësishme janë ato në repartin e mesfushës, Parolos Lukas Leiva dhe Milinkoviç-Saviç do ta shohin ndeshjen nga ekrani i televizorëve.

Hallet për Inzagin nuk mbarojnë këtu, pasi dhe sulmuesi kryesor i skuadrës Çiro Imobile nuk është në 100% të formës, por do të sakrifikojë duke luajtur në fushë nga minuta e parë.

Durmishi me premtim madhor: Kam vuajtur me shiringa, 2019 është viti im!

Sport Ekspres — Sun, 06 Jan 2019 18:46:37 +0000

Mbrojtësi shqiptar i Lacios, Riza Durmishi ka dhënë një intervistë të gjatë për mediat italiane sot, ku ka treguar vështirësitë e tij në dy vitet e fundit, ku ka vuajtur nga një problem madhor në shpinë.

“Kam vuajtur shumë gjatë këtyre dy viteve, kam qenë i varur prej shiringave dhe qetësuesve. Një ditë, pashë babin tim në sy dhe vendosa: Nuk do të marr më asnjë medikament.

Kam kaluar vite shumë të vështira, por kam lënë gjithçka pas dhe tani ndihem më mirë me veten time. Nëse vazhdon kështu, iu them me bindje se viti 2019 do të jetë viti im”,- u shpreh Durmishi.

Serie A vishet kuqezi, katër shqiptarë përballen në mbrëmje

Sport Ekspres — Sat, 18 Aug 2018 08:13:32 +0000

Serie A starton sot me ndeshjen Kievo – Juventus në orën 18:00 dhe Lacio – Napoli në 20:45. Sfida në Olimpiko ëshë disi e veçantë pasi do të kemi një numër rekord lojtarësh shqiptarë. Merkatoja e verës ka shtuar numrin e lojtarëve shqipfolës te skuadra e Lacios.

Igli Tare solli gjatë kësaj merkatoje vere Valon Berishën dhe Riza Durmishin. Kapiteni i përfaqësueses së Kosovës u përfol se e kishte humbur takimin hapës të kampionatit, por sipas “Gazzeta dello Sport”, mesfushori ka gjasa ta nisë nga stoli ndeshjen, pasi rikuperimi nga dëmtimi ka qenë shumë i kënaqshëm. Ndërsa, shqiptari që luan me përfaqësuesen daneze, ka shumë shanse ta nisë që nga minuta e parë, duke qenë se kapiteni Senad Luliç është në dyshime. Strakosha si zakonisht e nis si titullar.

Te Napoli, nuk dyshime për mbrojtësin e kombëtares sonë, Elseid Hysaj. Shkodrani është titullari absolut edhe në sytë e trajnerit Karlo Ançeloti. Fillimisht, transferimi i mbrojtësit të Nicës, Kevin Malkuit, krijoi përshtypjen se Hysaj do kishte më pak minuta, por kemi të bëjmë thjesht më një lojtar stoli. Shto këtu dhe faktin që Ançeloti është ndër ata trajnerë, i cili nuk njihet për rotacione të shumta, prandaj mund të themi se minutat për Hysajn do të jenë me bollëk.