Është një sezon i zi në Berat, sepse klubi ka probleme pa fund, mjafton të kujtohen vonesat e pagave në fund të vitit të shkuar, apo kushtet skandaloze ku jetojnë futbollistët jabanxhinj dhe të huaj, në ambientet e stadiumit Tomori.

Megjithatë, ajo që ka ndodhur këtë radhë konsiderohet një padrejtësi e madhe në Berat, sepse prisnin ndonjë dënim fushe e shumta, por jo masa të tilla, duke qenë se gjithçka ndodhi nga tribunat, ashtu si në shumë ndeshje të tjera, edhe në Superiore, ku ka pasur arbitra të goditur, por asnjë vendim kaq drastik.

Trajneri i Tomorit, Santiliano Dule, i cili është dënuar për shumë javë që të mos e drejtojë skuadrën, flet për ngjarjen e fundit dhe për dënimin e tij, duke akuzuar hapur zyrtarët e ndeshjes, ndryshe nga klubi, që ka akuzuar FSHF-në.

– Dule, çfarë mund të thoni për ngjarjet e fundit dhe për dënimin e rëndë dhënë nga Komisioni i Disiplinës?

– Për të qenë sa më i qetë dhe për të artikuluar sa më mirë reagimin tim zyrtar, unë po dal pas 24 orësh për të qartësuar këdo në opinionin futbolldashës shqiptar, në lidhje me atë vendim sa skandaloz, aq edhe masakrues për mua dhe skuadrën e Tomorit, por edhe fyes për një qytet si Berati, që jeton me futbollin dhe reagon me të drejtë ndaj një poshtërimi të tillë si rasti më i fundit. Sot ka pasur një deklaratë zyrtare nga ana e klubit dhe presidencës, por kjo nuk do të thotë që edhe unë si trajner dhe viktimë e kësaj maskarade të mos jap prononcimin dhe qëndrimin tim.

– Më konkretisht Dule, çfarë kontestimi keni dhe si i argumentoni ju vendimet ekstreme apo maskaradë, siç e cilëson klubi.

– E nisim qysh nga dënimi më skandaloz, kur na zbriten tre pikë, edhe pse ndeshja është zhvilluar shumë korrekte në fushë dhe s’ka pasur asnjë element plotësues që të zbatohej rregullorja për ndryshimin e rezultatit. Ne kemi fituar një ndeshje me gjak dhe shumë sakrificë, edhe pse kemi luajtur ndaj Apolonisë dhe tre gjyqtarëve që kanë qenë tërësisht të njëanshëm, dhe për çudi kryesori Halo jo vetëm që nuk ka konstatuar asgjë të parregullt në fushë, ku s’ka elementë të dhunës dhe goditje të gjyqtarëve apo kundërshtarit, por as nuk ka pasur asnjë ankesë që loja  duhej ndërprerë apo duhej luajtur për publik. Edhe kaseta e ndeshjes e vërteton këtë dhe ajo mund të shkojë deri në FIFA për ta gjykuar specialistë më të aftë atë që ndodhi në 96 minuta lojë. Për të vijuar me dënimin tim, kur vetëm në pushim të ndeshjes i kam kërkuar kryesorit që të mos irritojë popullin në stadium sepse moviola do ta nxirrte zbuluar për mosakordimin e dy 11-metërshave. Unë motivoj skuadrën dhe kjo është e drejta ime dhe aspak një mëkat, ashtu sikur kam të drejtën që të kërkoj edhe mbështetjen e publikut.

– Po për dënimin e fushës çfarë komenti keni?

– Çfarë duhet të them, në një kohë që delegati Haxhia na kërkoi përpara ndeshjes 7 stjuardë dhe ne i sollëm 8? Po kështu, kërkoi mjetet e zjarrfikëses dhe autoambulancën dhe ato ishin në kohën e duhur, kërkoi shtesë të forcave të policisë bashkiake dhe i sollëm edhe 8-10 forca shtesë dhe si përfundim ndëshkohemi kaq rëndë, kur gjykimi i kryesorit Halo dhe dy ndihmësve të tij kanë irrituar ata 2000 sportdashës. Duke luajtur me ndjenjat e tyre dhe skuadrën e Tomorit, detyrimisht që do të ketë edhe sharje si në çdo stadium, ashtu edhe ndonjë bidon uji, por të dënohet fusha pa spektatorë, jo të na degdisin katër ndeshje jashtë Beratit dhe pa spektatorë, sepse kështu shtohet mëkati i atyre që erdhën si delegat dhe vëzhgues, të cilët u bënë palë me Apoloninë dhe gjyqtarët, dhe për mua s’ka asnjë faj as Disiplina dhe as FSHF, sepse jemi të bindur që “lepuri” fle diku tjetër dhe e gjitha kjo është një inskenim i turpshëm nga drejtuesit e Apolonisë, sipas asaj që komentohet gjerësisht në Berat.

– Ç’doni të thoni me ‘”lepuri” fle diku tjetër’?

– Unë vetë nuk akuzoj asnjëri, por nuk dua të fsheh për opinionin futbolldashës atë që po komentohet gjerësisht në qytetin tonë, teksa janë ngritur dyshime të forta për një takim të kryesorit Elidon Halo me drejtuesit e Apolonisë gjatë rrugës për në Berat ditën e ndeshjes. Së dyti, ka dyshime të forta dhe të arsyeshme, që delegati Petrit Haxhia ka qenë pjesë e inskenimit të kësaj maskarade për të dëmtuar Tomorin dhe për të ndihmuar Apoloninë, që ashtu si Tomori pretendonte vendin e pestë. Së treti, flitet se gjyqtarët që i ka kërkuar Apolonia janë përzgjedhur nga njerëz të njohur në komisionin tekniko-gjykues, që janë miq të presidentit të Apolonisë. Për të vijuar me dyshimin tonë më të fortë, se protokolli i ndeshjes që i është çuar Disiplinës është ribërë nga e para diku jashtë Beratit nga delegati dhe vëzhguesi i ndeshjes, sipas kërkesave të drejtuesve të Apolonisë. Personazhi më negativ përveç gjyqtarit është padyshim delegati Haxhia, që pas ndeshjes i shkoi për të komunikuar me presidentin e Apolonisë tek makina e tij, ndërsa Kokëdhima i shtyu derën në nerva e sipër! Është po delegati Haxhia që çuditërisht na kërkonte që në gjysmën e tribunës qendrore që koincidonte me pankinën e Apolonisë dhe vijërojtësin e parë, të vendoseshin sportdashësit e Apolonisë, në një kohë që “specialisti” Haxhia ka harruar me sa duket  që klubi Tomori i ka vendosur sportdashësit miq në këtë sezon dhe në pesë vitet e fundit në të gjitha kategoritë, në pjesën pas portave ku ka qenë ishte ora e stadiumit.

– Së fundi, ndryshe nga pretendimet për bojkot, sot keni dalë në stërvitje. Çfarë hapash do të ndiqni për në shkallën e dytë në Apel dhe çfarë prisni prej tij?

– Po, sot kemi kryer pagesën pranë FSHF për të nisur procedurën e Apelimit të vendimit të Disiplinës dhe do të kërkojmë anulimin në themel të tre vendimeve që na masakruan padrejtësisht. Një ekip profesionistësh me juristë, së bashku me kasetën e ndeshjes, jo vetëm që do të kërkojnë rikthimin e fitores dhe faljen e fushës dhe timen dhe të ndihmësit tim, por do të shkojmë më tej, duke kërkuar që të dënohen treshja e gjyqtarëve dhe mundësisht delegati Haxhia dhe vëzhguesi Koreshi të gëzojnë ditët e tyre të pleqërisë larg stadiumeve dhe jo të penalizojnë një qytet futbolldashës si Berati dhe një skuadër si Tomori. Fitorja me Apoloninë ishte me meritë dhe me gjak, sepse i kishim të gjithë kundër, ndaj nuk e falim dhe s’ka asnjë dyshim për këtë, ndërsa Apolonia dhe presidenti i saj besoj se kanë zgjedhur gabim “viktimën” e tyre me emrin Tomori, sepse dirigjuan një maskaradë pa llogaritur se ndeshja në fushë dha një tjetër shfaqje dhe kaseta e ndeshjes e vërteton këtë. Duhet të akuzojmë ne dhe do të denoncojmë deri në fund atë që kërkuan të na bëjnë në fushën tonë këta gjyqtarë dhe zyrtarë të papërgjegjshëm që ju dogj skenari që desh i vunë flakën Beratit.

EDI SPAHIU

– Si do ta vlerësoni rikthimin tuaj pas një viti tek Tomori dhe votëbesimin që ju ka dhënë klubi me presidentin Sinaj?

– Është një rikthim shumë emocionues dhe pse jo shumë i rëndësishëm, në një moment të vështirë kur skuadra kërkon mbështetjen por edhe një motivim dhe garanci për ta nxjerrë nga situata ku ndodhet. Si njeri dhe trajner që jam shumë i dashuruar me sfidat profesionale, kam zgjedhur që të marr përgjegjësi në këtë moment, ku duhet që t’u shërbej si interesave të skuadrës, por pse jo dhe të përmbush besimin që më ka dhënë klubi dhe presidenti Petrit Sinaj që gjithnjë kanë lënë një derë të hapur për rikthimin tim, qysh nga momenti kur jam larguar një vit më parë.

– Vlerësimi juaj për gjendjen e skuadrës pas katër ditëve të para të stërvitjes?

– Fillimisht më duhet të them se pas 4 ditëve të para që drejtoj Tomorin, kam vlerësimet më pozitive për të gjithë skuadrën dhe mënyrën se si po stërvitet grupi i futbollistëve, nën drejtimin e kapitenit Çaço, i cili mbetet një shembull pozitiv. Jemi në pritje të qendërmbrojtësit Mujkiç dhe përforcimeve të merkatos dimërore, por starti 4-ditor është shumë i larmishëm në stërvitje, dhe djemtë janë shprehur të kënaqur, dhe kjo natyrshëm që më gëzon. Unë synoj në punën time që si komponent bazë të kem punën e përbashkët të shoqëruar me një dozë të lartë serioziteti dhe profesionalizmi dhe duke jetuar si një familje në fushë dhe jashtë saj, le t’i shërbejmë punës me rezultate pozitive, të cilat nuk do të na mungojnë.

– Në cilën fazë është merkatoja dimërore dhe a ka momentalisht emra konkretë që kanë ardhur apo synohen si përforcime?

– Jemi në hapat e parë të merkatos dhe ditë pas dite presim që ta intensifikojmë atë duke e konkretizuar me emra konkretë. Bisedimet janë të frytshme me disa emra të njohur dhe ajo që mund të bëj me dije fillimisht është se për momentin në skuadër ka ardhur sulmuesi i njohur dhe me përvojë Elhan Galica. Po kështu jemi në bisedime me Jurgen Voglin si dhe Karakaçin, ku i pari ka ndërprerë marrëdhëniet me Teutën dhe i dyti ka përpara një ofertë financiare më të lartë se tek Egnatia ku ndodhet aktualisht. Për sa kohë ne jemi një skuadër që garantojmë paga të larta dhe garanci financiare, të gjithë futbollistët cilësorë janë të sigurt se në Berat do të gjejnë ambientin e duhur, ndaj dhe ne nuk do të kursehemi askujt, aq më shumë për futbollistët cilësorë. Tashmë jemi në fillim të vitit të ri kalendarik  dhe buxheti prej 26 milionë lekësh të reja është një garanci maksimale për të zhvilluar një merkato cilësore, aq më shumë në Berat, ku futbollistët jabanxhinj ndihen shumë të respektuar dhe të privilegjuar edhe financiarisht.

– Kur pritet që të zbrisni në fushë për miqësoren e parë dhe pse ka dështuar miqësorja me Teutën të dielën e kaluar?

– Besoj se këtë javë do të zhvillojmë miqësoren e parë dhe brenda 2-3 ditëve do të bëjmë të njohur emrin e skuadrës kundërshtare. Për sa i përket ndeshjes së anuluar me Teutën, ajo që mund të them me shumë siguri është se dështimi i kësaj miqësore nuk ishte për fajin tonë, pasi ishte vetë Teuta që kërkoi miqësore, dhe fillimisht ra dakord për në Berat dhe më pas e kërkoi ndeshjen në Durrës, kur ne nuk ishim të përgatitur për të udhëtuar në Durrës.

– Sa besoni realisht te vendi i pestë në përfundim të fazës së dytë?

– Sigurisht që unë qysh në momentin kur kam pranuar të firmos për të drejtuar Tomorin kam qenë shumë i bindur se skuadra ka realisht mundësinë dhe potencialin për të marrë maksimumin në 4 javët e mbetura të fazës së dytë. Besoj plotësisht se do të bëjmë maksimumin për tu renditur në vendin e pestë, dhe për sa kohë unë edhe skuadra besojmë tek mundësitë tona, atëherë s’kam dyshimin më të vogël që në fazën e tretë do të jemi në pesë të parat e grupit. Fundja për këtë mision unë erdha në krye të skuadrës, por edhe se fryma e grupit që po përcjellim është një garanci për suksesin që na pret, pasi dhe sportdashësit tanë këtë presin nga ne.

EDI SPAHIU