Tërbuni i ri, Frroku: Financa të sigurta, gati 6 afrime

Sport Ekspres — Fri, 14 Jun 2019 12:09:20 +0000

Tërbuni nuk dëshiron të jetë një ekip kalimtar në të Parën, ndaj edhe drejtuesit po mendojnë të bëjnë përforcimet e duhura për të përballuar një kampion që pritet të jetë mjaft i luftuar. Synimi është afrimi i lojtarëve që bëjnë diferencën, ndërkohë që Bashkia e Pukës ka garantuar mbështetje.

Këtë e konfirmon për SportEkspres.com vetë Sekretari i klubit të Tërbunit, Dritan Frroku. “Sapo kemi mbyllur projektin e sezonit të ri. Së pari Bashkia e kryetari Gjon Gjoni na kanë garantuar një fond pa limit për merkaton, fazën përgatitore dhe përgatitjet e tjera. Ne do përqendrohemi kryesisht në Tiranë pas datës 10 korrik, kurse më pas do udhëtojmë në Pogradec.

Përgatitjet do t’i mbyllim këtu në Pukë, me një program që stafi teknik mendoj se e ka detajuar mirë”, shprehet Frroku. Ndërkohë, për emrat në merkato dhe ku po përqendrohet Tërbuni në këtë periudhë, Frroku deklaron:

“Kam marrë përsipër të drejtoj merkaton e Tërbunit. Së bashku me stafin teknik kemi projektuar disa futbollistë nga Kategoria e Parë. Në fokus kemi dy mbrojtës, dy mesfushorë e dy sulmues, të gjithë cilësorë, jo sportistë që nuk bëjnë diferencën. Emrat e tyre do t’i zyrtarizojmë në fillimin e muajit korrik”.

AGRON KAJA

Frroku: Suksesi i ngjitjes është i të gjithëve, ju tregoj planin për sezonin e ri!

Sport Ekspres — Mon, 06 May 2019 11:22:02 +0000

Kur kanë mbetur edhe dy javë nga përfundimi i kampionatit të Kategorisë së Dytë, Tërbuni në Grupin A thuajse e ka siguruar ngjitjen në Kategorinë e Parë. Me 47 pikë, skuadra pukjane është 6 pikë para Luzi 2008 dhe 7 pikë para Gramshit e Partizanit B.

Tashmë festa e tyre është legjitime, me Administratorin e klubit, Dritan Frroku, i cili deklaron për SportEkspres.com, se u shpërblye puna e përbashkët që është bërë me skuadrën. Sipas tij, në këtë sukses kanë vend të gjithë.

SEZONI AKTUAL – “Tashmë Tërbuni është ngjitur në Kategorinë e Parë, dhe ky është një sukses që u takon të gjithëve që kontribuan në këtë sezon. Nga kryetari i Bashkisë Gjon Gjoni, stafi teknik me trajnerin Oltion Kërnaja e gjithë futbollistët që veshën fanellën e Tërbunit dhe e respektuan me këtë sukses, mendoj se kanë vend për t’u falënderuar. Jemi 6 pikë para vendit të dytë dhe vetëm 1 pikë na duhet në dy ndeshjet e mbetura.”

SEZONI I ARDHSHËM – “Janë edhe dy javë të tjera dhe të gjithë vëmendjen do ta kemi tek 180 minutat e mbetura të këtij sezoni. Ne kemi edhe synimin final të këtij sezoni, duhet të fitojmë finalen e Kategorisë së Dytë, që me sa duket kundërshtar do të kemi Devollin. Por edhe duhet thënë se ky bashkëpunim me këta futbollistë do vazhdojë edhe për sezonin e ri”.

AGRON KAJA