Barazon në miqësoren me Bylisin, Lushnja teston Brahimajn dhe Jaupaj “zhduket”

Sport Ekspres — Wed, 10 Jul 2019 20:07:21 +0000

Pasditen e së mërkurës, Lushnja e Bylisi u ndeshën mes tyre në një miqësore, e cila përpos rezultatit të barabartë 1-1, në këtë periudhë më shumë i shërbeu hyrje-daljeve që kanë pësuar skuadrat. Edhe pse takimi u luajt në një mot me reshje shiu, të dyja skuadrat aktivizuan shumë futbollistë, ndërkohë që te Lushnja, nga dy emrat e përfolur në merkato, vetëm mbrojtësi Denis Brahimaj u paraqit, ndërsa sulmuesi Ardit Jaupaj nuk u duk në fushë.

Për SportEkspres.com, zëvendëstrajneri i Lushnjes, Dritan Çuko, deklaroi se ishte një ndeshje testuese për të dyja skuadrat, ndërkohë që për skuadrën e tij në fushë ishin edhe prurjet e reja. “Ne i testuam të tre afrimet e reja në këtë merkato dhe deri tani vlerësimet janë normale. Por, prisnim edhe sulmuesin Jaupaj, ndërsa Brahimaj tregoi vlera. Gjithsesi, u luajt një ndeshje e barabartë, me objekt vëzhgimin e gjendjes së lojtarëve”.

Ndërsa për fillimin e përgatitjeve dhe vazhdimin e merkatos, Çuko e fokuson te siguria financiare që bashkia i ka garantuar. “Lushnja ka disa sezone që lojtarët i ka të mirëpaguar dhe siguria financiare nga bashkia ka qenë shumë korrekte. Ndaj edhe ardhjet e reja tregojnë se ky është një tregues pozitiv për skuadrën tonë, e cila javën e ardhshme ka menduar që të nisë përgatitjet e sezonit të ri, dhe do vazhdojmë me merkato, ku 2-3 futbollistë janë në planet tona”.

AGRON KAJA

Dritan Çuko: Zgjatja e kampionatit e tëpërt, sytë nga të rinjtë

Sport Ekspres — Thu, 14 Mar 2019 12:37:19 +0000

Duke qenë se skuadra e Lushnjes u rendit në pesë skuadrat e para të Grupit B, në fazën e tretë ka dalë jashtë synimeve të saj për këtë sezon dhe ndjeshjet po i luan vetëm për ta respektuar kampionatin. Pushimi që u krijua nga bojkoti i arbitrave, për drejtuesit e skuadrës lushnjare është quajtur si i tepërt për skuadrën e tyre.

Këtë e deklaron për SportEkspres.com edhe zëvendëstrajneri Dritan Çuko, i cili thekson se te skuadra e tyre po mendohet edhe për të ardhmen. “Ne jemi skuadër që kemi dalë nga objektivat dhe në ndeshjet e fazës së tretë nuk kemi motivimin e duhur. Zgjatja e kampionatit për ne është e tepërt, por gjithsesi jemi duke punuar edhe me të rinjtë.

Kjo pasi në përbërje kemi disa futbollistë me moshë të madhe që nuk japin shumë garanci për të ardhmen. Në këtë fazë krijohet mundësia e aktivizimit të atyre futbollistëve që jo vetëm kanë pak eksperiencë, por janë edhe në moshë të re”, përfundon Çuko.

AGRON KAJA