Zbulohet skandali, Ramos rezultoi pozitiv në testin anti-doping

Sport Ekspres — Fri, 23 Nov 2018 17:59:13 +0000

Dokumentet sekrete të zbuluara nga platforma “Football Leaks” vazhdojnë të tronditin futbollin europian. Ditën e sotme media prestigjioze gjermane “Der Spiegel”, zbuloi se kapiteni i Real Madrid, Serxho Ramos ka rezultuar pozitiv në testet anti-doping të bëra menjëherë pas përfundimit të finales së Champions League më 3 qershor të 2017-ës.

Sipas dokumentit sekret të zbuluar nga gazetarët gjermanë, UEFA pranoi të bënte një përjashtim special për spanjollin, duke u mjaftuar me një komunikatë faljeje nga ana e drejtuesve të klubit dhe gjithçka u la në harresë.

Substanca për të cilën Ramos rezultoi pozitiv quhet “Desametazon”, një substancë kjo që mund të përdoret vetëm me leje paraprake nga UEFA. Real Madrid u justifikua me faktin se doktori i klubit kishte bërë një “ngatërresë”, dhe se faji i takonte “bluzave të bardha”, e jo lojtarit.

Bomba e “Der Spiegel”, UEFA fshehu dopingun e një fituesi të Champions-it

Sport Ekspres — Sat, 03 Nov 2018 08:33:27 +0000

Media e njohur gjermane “Der Spiegel” ka tronditur botën e futbollit duke nxjerrë publike disa nga dokumentet sekrete të platformës investigative “Football Leaks”. Ditën e djeshme, artikulli mbi marrëveshjet e fshehta të UEFA-s me klubet e PSG-së dhe Mançester Sitit bëri shumë zhurmë, por në të njëjtin artikull thuhej se në ditët në vazhdim do të ketë zbulime të tjera tronditëse.

“Der Spiegel” pritet të nxjerrë emrin e një futbollisti të njohur, i cili ka fituar disa herë trofeun e Champions League. Lojtari në fjalë ka rezultuar pozitiv pas një testi dopingu, por ndërhyrja e zyrtarëve të lartë të klubit të tij ka bërë që UEFA të bëjë një sy qorr.

UEFA është krenuar shpesh mbi faktin që aplikon një politikë me “tolerancë zero” ndaj dopingut, por nëse ky rast do të jetë i mbështetur në prova konkrete, atëherë kredibiliteti i këtij institucioni do të marrë një goditje dërrmuese.

Fakti që “Der Spiegel” thotë se lojtari e ka fituar disa herë Champions-in, na bën të mendojmë që kemi të bëjmë me një prej lojtarëve të skuadrës së Real Madrid, pasi klubi spanjoll ka fituar 4 nga pesë edicionet e fundit të këtij turneu.