dony van de bek

“Skautët ishin dështakë, tani Van de Bek është një ëndërr!”

Sport Ekspres — Thu, 20 Jun 2019 20:05:36 +0000

Doni van de Bek është një nga lojtarët më të spikatur të Ajaksit të sivjetshëm. 22-vjeçari bën pjesë në grupin e lojtarëve, që kërkohen nga shumë klube evropiane dhe largimi është gati i pashmangshëm. Ai ka treguar një vizion dhe nuhatje goli të jashtëzakonshme. Çmimi i holandezit tashmë ka prekur qiellin.
Martin Jol, ish-trajner i Totenhemit në periudhën 2004-2007 ka folur rreth evolimit të fantazistit dhe mundësisë së tij për të shkuar te Totenhem. 63-vjeçari holandez shprehet se zbuluesit e lojtarëve duhet të jenë më të vëmendshëm dhe të kujdesshëm në gjetjen e talenteve. Ai shpjegon se në merkaton e dimrit Van de Bek mund të vinte për një çmim shumë më të ulët se ç’vlerësohet tani.

“Van de Bek në dimër mund të blihej për një shifër shumë më të ulët. Ai nuk ishte gjithmonë pjesë e ekipit të parë. Kjo është ajo që zbuluesit duhet të bëjnë, të njohin talentet, të njohin tregun. Kjo është e vetmja gjë që mund të them pasi tani është vonë dhe Totenhem për të nuk mund të paguajë 50 apo 60 milionë paund”, u shpreh Martin Jol.

Regjisori i Ajaksit i hap derën interesit të Barçës

Sport Ekspres — Sat, 08 Jun 2019 11:05:08 +0000

Një nga zbulimet më të mëdha të Ajaksit të sivjetshëm quhet Doni van de Bek. Mesfushori është treguar shumë vendimtar dhe i akullt, duke shënuar në ndeshje tepër delikate në Champions, por edhe në kampionat. Ai arriti të grumbullonte plot 17 gola dhe 13 asiste.

22-vjeçari kërkohet nga disa klube të mëdha. Juventus, Totenhem, Barcelona dhe Inter janë në kërkim të shërbimeve të tij. Djaloshi ka folur pas ndeshjes që Holanda fitoi mbrëmë ndaj Anglisë, ku siguroi një biletë për finalen e “Nations League” ndaj Portugalisë. Ai mohon të ketë pasur oferta drejt tij. Fantazisti i hap rrugën një transferimi në Barcelonë kur shprehet se ndihet i kënaqur për interesin e katalanasve.

“Nuk është e vërtetë se ka pasur oferta drejt meje. Shumë gjëra janë shkruar nëpër gazeta, por unë nuk di asgjë. Kam një kontratë me Ajaksin dhe jam i lumtur këtu. Është shumë bukur të dëgjoj se Barcelona interesohet për mua, por ajo çka dua është të luaj dhe të përmirësohem. Do të shohim se çfarë do të ndodhë në verë, askush nuk e di se ç’rezervon e ardhmja”, u shpreh Van de Bek.

Dështon transferimi i Pogba? Reali gati planin B!

Sport Ekspres — Fri, 03 May 2019 09:05:53 +0000

Reali i Madridit pritet që të jetë një ndër klubet më aktivë në merkaton e ardhshme, me “Los Blancos” që mund të bëjnë një revolucion të vërtetë në ekip. Eden Hazard dhe Pol Pogba janë emrat më të përfolur për të zbarkuar në Madrid.

Pikërisht për këtë të fundit, francezin e Mançester Junajtid, drejtuesit e Realit duket se kanë bërë gati një plan B, gjithmonë në rast se tratativat me “Djajtë e Kuq” dështojnë. Ai është njeriu i momentit në Europë, Doni Van de Bek.

Mesfushori i talentuar i Ajaksit ka mahnitur me paraqitjet e tij dhe shumë klube janë vënë në radhë për të. Gjithsesi, një futje në garë e Realit do t’i bënte madrilenët favoritët kryesorë, pasi këta të fundit janë të gatshëm të paguajnë deri në 60 milionë euro për holandezin, çmim që zor se mund ta ofrojë ndonjë klub tjetër. Gjithsesi, mbetet për t’u parë me interes se si do të shkojë operacioni “Pogba” si fillim.