Tite replikon me Donald Tramp: Dikush “harron” që Brazili ka fituar 5 Kupa Bote

Sport Ekspres — Tue, 11 Sep 2018 19:01:06 +0000

Para disa ditësh, Xhani Infantino, presidenti i FIFA-s, u takua në Shtëpinë e Bardhë me presidentin e SHBA, Donald Tramp. Tema e bisedimeve ishte Botërori 2026, që zhvillohet në Amerikë, Kanada dhe Meksikë. Gjatë takimit, Donald Tramp lëshoi një batutë për kombëtaren braziliane, duke ironizuar për eliminimin e ekipit të Tites në fazën e çerekfinaleve.

“Vendi i futbollit… besoj se ti ke patur një problem kohët e fundit”, i drejtohej Tramp një gazetari brazilian. Pasi Brazili mposhti SHBA para disa ditësh në miqësore me rezultatin 2-0, trajneri i kombëtares, Tite, i ka kthyer përgjigje presidentit amerikan.

“Kam një përgjigje për Tramp. Ne kemi fituar pesë Botërorë. Ndoshta, në aspektin e historisë së futbollit, ai duhet të mësojë më shumë”, u shpreh Tite në konferencën për shtyp para ndeshjes me El Salvadorin.

Infantino viziton Shtëpinë e Bardhë, Tramp “show” me kartonin e kuq

Sport Ekspres — Wed, 29 Aug 2018 15:35:11 +0000

Presidenti i FIFA-s, Xhani Infantino ishte i ftuar në Shtëpinë e Bardhë ku u takua me presidentin e SHBA, Donald Tramp. Infantino shoqërohej nga kreu i Federatës Amerikane të Futbollit, Karlos Kordeiro.

Tema e bisedimeve ka qenë Kupa e Botës 2026, që do të zhvillohet në tre shtete: SHBA, Kanada dhe Meksikë.

“Dëshiroj ta falënderoj që ndodhet sot këtu. Ai është një person shumë i respektuar, i cili ka kryer një punë fantastike. Kupa o Botës 2026 do të jetë një kompeticion i rëndësishëm dhe i veçantë”, u shpreh Tramp për kreun e FIFA-s.

Infantino theksoi faktin që Kupa e Botës është eventi sportiv më i rëndësishëm dhe solli një statistikë të finales së kompeticionit të zhvilluar në Rusi këtë verë. Ndeshja Francë-Kroaci u ndjek nga 1 miliardë njerëz në botë. Mbasi Infantino i dhuroi një bluzë me numrin 26 presidentit amerikan, i shpjegoi dhe rregullat e kartonëve të verdhe dhe të kuq në një ndeshje futbolli. Tramp shfrytëzoi situatën për të bërë “show” me të pranishmit dhe i nxori kartonin e kuq gazetarëve në sallë.