Divock Origi

I dha Liverpulit Champions-in, vjen “dhurata” për Origin

Sport Ekspres — Wed, 10 Jul 2019 20:20:14 +0000

Ashtu siç ishte njoftuar edhe më parë, Divok Orixhi do të jetë pjesë e Liverpulit për një kohë akoma më të gjatë. Belgu ishte heroi i fundit të sezonit për të kuqtë, duke shënuar ndoshta golat më të rëndësishëm të karrierës së tij.
Për këtë, Liverpul ka vendosur t’i japë besim 24-vjeçarit. Klubi ishullor ka dalë sot në një deklaratë zyrtare, ku njofton se Orixhi ka firmosur një marrëveshje afatgjatë në “Merseyside”. Nuk jepet akoma informacion sesa është jetëgjatësia e saj. Kontrata aktuale e sulmuesit skadonte verën e ardhshme.

Orixhi do të diskutojë vendin e titullarit me një lojtar si Firminjo, i cili e ka “betonuar” prej vitesh atë vend. Megjithatë, Klop pritet t’i japë minutat e merituara belgut, që sa herë është thirrur në detyrë e ka nderuar fanellën që mban veshur.

Divock Origi has committed his future to the Reds. ?

— Liverpool FC (@LFC) July 10, 2019

Heroi i Champions bind Klopin për një kontratë të re

Sport Ekspres — Tue, 09 Jul 2019 10:59:17 +0000

Liverpul përfundoi me triumfin në Chapions League një sezon spektakolar për ta. Një nga heronjtë e këtij ekipi është padyshim Divok Origi. Belgu ishte zëvendësuesi i Firminjos në disa nga ndeshjet më delikate të sezonit dhe i kaloi pritshmëritë, duke qenë shkaku kryesor i fitores historike ndaj Barcelonës. Gjithashtu, shënoi edhe në finalen ndaj Totenhem golin e qetësisë. Nuk mund të harrojmë edhe rrjetën e fitores ndaj Everton, që e mbajti në garë për Premier Ligën.
Të gjitha këto kontribute e kanë bërë të paharrueshëm për tifozët e Liverpulit, por edhe kanë bindur klubin të rinovojë kontratën me 24-vjeçarin. Marrëveshja e tij aktuale përfundon verën e ardhshme, me Liverpul që mund ta humbasë pa marrë asgjë në këmbim.

Sipas medieve ishullore, Klop dhe klubi është i bindur se Origi duhet të vazhdojë në “Merseyside”. Atij do i jepet më shumë besim dhe minuta. Gara për një vend në formacionin e parë do të jetë një luftë e vështirë, pasi Firminjo konsiderohët si një prej më të mirëve në atë pozicion. Liverpul po kërkon për një tjetër qendërsulmues, pas largimit të Starrixh.

E ardhmja e heroit të Champions Ligës, Liverpuli merr vendimin

Sport Ekspres — Thu, 20 Jun 2019 15:33:43 +0000

Kontrata e Divok Origit me Liverpulin përfundon në verën e vitit të ardhshëm. Drejtuesit e The Reds po përgatisin kontratën e re për sulmuesin. Nëse belgu refuzon të rinovojë, për Liverpulin nuk ka asnjë problem. Ata kanë vendosur të mos e shesin atë.

24-vjeçari nuk ka përfituar shumë hapësira, por ai ishte gati dhe u tregua deçiziv në momentet që Klop kishte nevojë për të. Dygolëshi kundër Barcelonës në gjysmëfinalen e kthimit nuk harrohet kurrë në Anfield, ndërsa në finalen e madhe të Champions League vulosi fitoren kundër Totenhemit me golin e dytë.

Vetë lojtari ndihet i lumtur te Liverpuli, pavarësisht se rivaliteti me Salah, Firminjo dhe Mane është i frikshëm. Kampionët e Europës e vlerësojnë shumë Origin dhe janë gati të rrezikojnë humbjen e tij me parametra zero, me qëllim qëndrimin e tij edhe sezonin tjetër në ekip.

FOTO | Çmenduri angleze, Origi “përjetësohet” nga tifozi i Liverpulit

Sport Ekspres — Wed, 05 Dec 2018 18:41:16 +0000

Derbi i Merseyside i luajtur fundajvën e kaluar pati një fund mjaft emocionues, teksa pas një gafe të Pikford në sekondat e fundit të ndeshjes, bëri Divok Origin t’i jepte fitoren Liverpulit dhe të ringjallte sulmuesin belg, pas shumë kohësh.

Goli i shënuar nga 23-vjeçari çmendi në festë Jurgen Klop, por jo vetëm. Një tifoz, duket se ka thënë përpara ndeshjes, që në rast se Origi shënon gol unë do ta bëj tatuazh. Kjo gjë ndodhi, dhe tifozi e ka mbajtur premtimin e tij.

Tifozi në fjalë, ka bërë tatuazh në këmbën e tij emrin e Origit, pra Divock dhe e ka shkruar: “D1v0ck”, ku numri 1 simbolizon shkronjën “i” dhe njëkohësisht dhe numrin e golave të Liverpulit në derbin e fundit, ndërsa numri 0 simbolizon shkronjën “o” dhe njëkohësisht shifrën e golave të Evertonit. Diçka mjaft e veçantë.