Një shembull unikal na vjen nga futbolli italian, konkretisht divizioni i tretë i saj. Lukeze po përjeton një periudhë shumë të vështirë jashtë fushave të blerta. Presidenca është ndërruar shumë herë gjatë këtij sezoni, ndërsa ekipi po menaxhon veten që nga muaji dhjetor.

Për rroga nuk bëhet fjalë, madje Federata ka dënuar ekipin me 16 pikë për shkak të borxheve të shumta, rrogave të papaguara dhe gjobave pafund. Sot ata renditen të tretët nga fundi me 24 pikë, ndërkohë që në fushë kanë grumbulluar 40 të tilla. Kriza i ka larguar të gjithë, përveç futbollistëve dhe tifozëve. Të parët po tregohen heronj të vërtetë, ndërsa të dytët nuk e njohin fjalën braktisje.

Lojtarët kanë nisur nga puna, paguajnë vetë udhëtimet (si në rastin e udhëtimit me traget në ndeshjen e fundit në transfertë kundër Olbias, fituar me rezultatin 0-1) korrin barin e stadiumit, lajnë rrobat dhe shesin biletat e ndeshjeve!

Tifozët janë befasuar kur janë nisur për të blerë biletat e ndeshjes Lukeze-Novara, që zhvillohet ditën e shtunë. Në sportel ata janë përballur me portierin, Stefano Aiolfi dhe mbrojtësin, Rikardo Martineli.

Një gjest sakrifice dhe dashurie në këto ditë të vështira. Klubi duket i pashpresë, ka rreth 1.2 milionë euro borxhe, por lojtarët dhe tifozët po japin gjithçka me shpresën që një president do të marrë drejtimin e Lukezes së tyre të dashur.

Diçka e tillë ka ndodhur në divizionin e tretë të futbollit grek. Luhej ndeshja PAO Vardas-Foivos Kremasti, që përfundoi me fitoren 0-1 të miqve. Goli i ndeshjes është një perlë e vërtetë.

Rreth 90 metra sprint me topin në këmbë nga Lamin de Phoivu, i cili shmang këdo që i del para dhe në fund shënon me një lehtësi për t’u duartrokitur. Festë e madhe për miqtë, të cilët vrapojnë të gjithë pas “heroit” të tyre, ndërsa ky mund të jetë një nga golat më të bukur të vitit 2019.

Një rast i veçantë ka ndodhur në futbollin holandez, konkretisht në divizionin e tretë. Luhej ndeshja mes Rijnsburgse Bojs dhe AFC Amsterdam. Miqtë fituan me rezultatin tenistik 2-6 dhe vazhdojnë të kryesojnë renditjen, por ndeshja është ndërprerë për disa momente, si pasojë e një tifozeje.

Një bionde është futur në fushën e blertë dhe ka ndërprerë ndeshjen. Me një flamur në duar dhe komplet nudo, ajo ka vrapuar e lumtur pa u shqetësuar nga askush. Ilaritet mes lojtarëve në fushë dhe tifozëve, madje një gjë e tillë ka “paralizuar” dhe forcat e sigurisë, të cilët nuk kanë ndërhyrë.

Si të gjithë kanë preferuar të shijojnë skenën e veçantë, me vajzën që provokon dhe një nga futbollistët. Pasi ka kryer misionin e saj, ajo ka dalë jashtë fushës mes duartrokitjeve dhe të qeshurave të tifozëve të pranishëm.