Tek Ajaksi “hapin thesin”, blerja rekord është një 18-vjeçar meksikan

Sport Ekspres — Mon, 17 Dec 2018 18:06:14 +0000

Ajaksi nuk e fiton titullin kampion të Eredivisies prej katër sezonesh. Në Amsterdam duan që t’i japin fund kësaj pritje dhe për këtë janë të gatshëm të investojnë si kurrë më parë. Sipas së përditshmes holandeze “Die Telegraaf”, gjatë merkatos së dimrit, klubi kryeqytetas do të thyejë rekordin e transfertës më të shtrenjtë që për momentin mbahet nga Miralem Sulejmani dhe Dalei Blind, kartoni i të cilëve kushtoi 20 milionë euro.

Shënjestra e Ajaksit është meksikani Diego Lainez. Lojtari është ende një emër i panjohur në Europë, por në vendlindje të gjithë po mahniten me aftësitë e sulmuesit të krahut. Sulmuesi i Klub Amerikës është vetëm 1.67 m i gjatë, por atë çfarë i mundëson në gjatësi e kompenson me aftësitë e rralla në driblim.

https://twitter.com/MexNexGen/status/1053834758306689028

Lainez është vetëm 18 vjeç dhe po hedh hapat e parë të karrierës së tij. Tek Ajaksi besojnë se ai mund të bëhet një ndër lojtarët më të mirë në planet me kalimin e viteve dhe prandaj kanë vendosur të ofrojnë 25 milionë euro për kartonin e tij. Në janar pritet që meksikani të marrë avionin për në Amsterdam, pasi asnjë klub nuk po duket i gatshëm të barazojë ofertën e holandezëve.

Video | Atletiko turpërohet në Vigo, Selta nuk e lë të shikojë portën

Sport Ekspres — Sat, 01 Sep 2018 18:33:59 +0000

Diego Simeone ka shtatë vite që është trajneri i Atletiko Madridit, por deri më sot argjentinasit nuk i kishte ndodhur që skuadra e tij të mos arrinte të gjuante të paktën njëherë në portën e kundërshtarit. Çudia e madhe ndodhi sot. Grizman & Co. dukeshin si lojtarë krejtësisht të tjerë nga ata që mundën Realin në finalen e Superkupës së Europës pak javë më parë.

Pjesa e parë rezultoi e ekuilibruar nga të dyja palët, që mbajtën portat e paprekura por e dyta ishte një histori krejt tjetër. Selta gjen avantazhin shumë shpejt me anë të sulmuesit të talentuar Maksimilano Gomez. Pak minuta më vonë Iago Aspas dyfishon avantazhin e vendasve dhe morali i madrilenëve bie përtokë.

Kartoni i kuq i Stevan Saviç në minutën e 70-të i vë kapak takimit. Statistika në fund të 90-minutëshit është e frikshme. 10 gjuajte, por asnjë në kuadratin e Seltës. Simeone do i duhet të reflektojë shumë mbi këtë takim që me siguri dhemb shumë.