Është në shitje, mbrojtësi i Milanit takim me drejtuesit

Sport Ekspres — Sat, 06 Jul 2019 06:48:19 +0000

Milani po mendon seriozisht shitjen e Laksalt. Uruguajani nuk ka bindur me paraqitjet e tij në Milano dhe largimi është zgjidhja perfekte për të dyja palët. 26-vjeçari regjistron vetëm 6 ndeshje si startues në gjithë sezonin e kaluar të Serie A.
Atalanta dhe Torino janë dy klubet, që interesohen për shërbimet e latinit. Klubi “granata” janë pala më e interesuar në këtë mes. Ndërkohë, Atalanta do të hyjë në garë për Laksalt në rast largimi të Gosenit.

Siç raportojnë mediet italiane, Laksalt ka ndërprerë pushimet dhe është paraqitur në zyrat e “Casa Milan”. Arsyeja ka qenë një takim me Ariel Krasouski, drejtor i jashtëm sportiv në klubin kuqezi. Gjatë bisedës është diskutuar e ardhmja e lojtarit. Zyrtari i Milanit i ka shpjeguar se është në shitje.

Laksalt është dakort me këtë ide dhe në konsensus me klubin do të zgjedhë ekipin e ri, ku do vazhdojë karrierën. Largimi i tij do të gjeneronte të ardhura në këto ditë të errëta financiare për Milanin. Lojtari vlerësohet rreth 14 milionë euro në merkato.

Laksalt krahason trajnerët: Ju tregoj ndryshimin mes Gatuzos e Gasperinit

Sport Ekspres — Sat, 15 Sep 2018 10:12:08 +0000

Diego Laksalt ka nisur aventurën me ekipin e Milanit dhe në një prononcim për “Sky Sport”, lojtari uruguaian bën një krahasim midis trajnerit Xhenaro Gatuzo dhe Xhampiero Gasperini. Ky i fundit është trajneri i Atalantës, por më parë ka punuar me Laksalt te Xhenoa. Anësori i majtë ndalet dhe te ndeshja me Kaljarin dhe sulmuesi Higuain.

“Mënyra e stërvitjes së Gatuzos është shumë dinamike. Stërvitjet e tij janë të shpejta dhe gjithçka bëhet me intensitet të lartë. Kjo është e përbashkëta midis të dyve. Çdonjëri ka mënyrën e tij të lojës dhe mendoj që në fushën e blertë ndryshojnë shumë. Gatuzo dëshiron t’i transmetojë skuadrës dëshirën e tij dhe ia arrin në çdo moment.

Duhet t’i marrim ndeshjet një nga një dhe ky është objektivi ynë. Kaljari? Nuk ka ndeshje të lehta, ne duhet të gjejmë dëshirën për fitore. Higuain? Sulmuesit jetojnë për të shënuar, por ka bërë një punë të madhe në ndeshjet e para”, përfundon 25-vjeçari, i cili zhvilloi një Botëror pozitiv me Uruguain dhe Milani arriti të siguronte shërbimet e tij.