Didier Deschamps

Zemërimi i Deshamp: Çfarë shuplake nga Turqia, nuk zbritëm fare në fushë

Sport Ekspres — Sun, 09 Jun 2019 10:06:39 +0000

Franca pësoi një humbje të papritur në Turqi. 2-0 fituan vendasit me dy gola të shënuar në pjesën e parë. Kampionët e botës nuk reaguan në 45-minutëshin e dytë dhe lejuan ekipin e Gynesh të renditet në vendin e parë me 9 pikë në grupin H, aty ku bën pjesë edhe kombëtarja jonë.

Kjo disfatë e ka zhgënjyer pa masë Didier Deshamp. Trajneri i Francës nuk i ka kursyer kritikat për ekipin e tij, ndërsa thekson se asgjë pozitive nuk ndodhi në këtë ndeshje. Djemtë e tij nuk goditën njëherë portën gjatë gjithë 90-minutëshit dhe kjo është e patolerueshme.

“Kur zhvillohen ndeshje kolektive si kjo kundër Turqisë, nuk ka asgjë pozitive për të shprehur. Nuk luajtëm fare ndaj një ekipi që bëri çfarë deshi në fushën e blertë. Nuk ishim fare prezentë. Kështu të ndodh kur luan pa asnjë qëllim, edhe pse jemi kampionët e botës. Morëm një shuplakë të madhe kundër Turqisë, të cilën do e analizojmë thellësisht. Nuk kam asgjë tjetër për të shtuar, përveçse të uroj kundërshtarin për fitoren”, përfundon Didier Deshamp.

Tre kandidatë për stolin bardhezi, zbulohen kërkesat e Alegrit

Sport Ekspres — Fri, 17 May 2019 12:25:37 +0000

Masimiljano Alegri nuk është më trajner i Juventusit, zyrtarisht. Tanimë në kampin bardhezi duhet të gjejnë pasuesin dhe emrat që qarkullojnë janë disa. Sky Sport liston si kandidatët kryesorë Didië Deshamp, Mauricio Poçetino dhe Simone Inzagi. Nuk përjashtohet as pista Antonio Konte, edhe pse ky i fundit është shumë pranë Interit.

LARGIMI – Trajneri donte të dinte planet e klubit dhe synonte të ishte i rëndësishëm. Kontrata e re për të nuk kishte shumë rëndësi në aspektin financiar. Ai kërkonte bashkëpunim të gjatë, të paktën deri në vitin 2022. Gjithashtu ish-trajneri kërkonte të paktën katër afrime cilësore. Shqetësimi kryesor i tij ishte reparti i mbrojtjes, teksa Aleks Sandro dhe Zhoao Kanselo nuk bënin pjesë më në planet e tij. E njëjtë situatë edhe për Paolo Dibala, që me Alegrin i kishte paketuar valixhet.

Tekniku italian, veç Ramsej kërkonte edhe një tjetër mesfushor. Alegri ka qenë i qartë ndaj presidenti Andrea Anjeli dhe drejtuesve të tjerë. Ai ka kërkuar që në skuadër të merrte Toni Kros nga Reali i Madridit, një preferencë e Kristiano Ronaldos. Tanimë në kampin bardhezi kanë llogari të tjera për të bërë, pasi Alegri është zyrtarisht i shkarkuar.

Dëshira e madhe e Anjelit, Juventusi përgatit rikthimin e bujshëm

Sport Ekspres — Tue, 14 May 2019 13:41:30 +0000

Të gjithë po presin takimin midis Andrea Anjelit dhe Maks Alegrit për të marrë vesh të ardhmen e stolit juventin. Presidenti dhe trajneri do të takohen ditën e nesërme, që mund të jetë dhe i fundit midis tyre.

Aventura 5-vjeçare e Alegrit me Juventusin është në hapat e fundit të saj, edhe pse nuk përjashtohen surprizat në takimin kokë me kokë.

Zëvendësuesi është gati dhe Anjeli preferon t’i besojë drejtimin e ekipit një emri të njohur të tifozëve bardhezinj. Ai është Didier Deshamp, aktualisht kampion bote me Francën e tij.

50-vjeçari ka luajtur për 5 sezone me “Zonjën e Vjetër” ku ka fituar 3 tituj kampionë dhe një Champions Ligë, ndërsa në sezonin 2006/2007 drejtoi Juven si trajner, duke rikthyer ekipin në Serie A.

Tani është gati për t’u rikthyer sërish me qëllimin e madh fitimin e Champions Ligës edhe si trajner.