E do Milani dhe Arsenali, flet agjenti i fantazistit belg

Sport Ekspres — Sat, 15 Jun 2019 18:52:38 +0000

Arsenal kërkon me ngulm fantazistin e Sampdorias, Denis Praet. Mesfushori ka bërë një sezon shumë cilësor, duke luajtur të gjitha ndeshjet me ekipin e tij. Arsenal e dëshiron belgun për të zënë vendin e lënë bosh nga ikja e Aron Ramsej. Përveç klubit londinez ai është objektiv i disa skuadrave, mes tyre edhe Milani.

Kalimi i trajnerit Xhampaolo te kuqezinjtë, mund të shtojë mundësinë e kalimit në San Siro. I pyetur nga mediet italiane, agjenti i 25-vjeçarit ka folur rreth ofertave për klientin e tij. Ai shprehet se Milani është një klub i madh, por ka skuadra të tjera jashtë Italisë, të cilat kanë shfaqur interes konkret ndaj Praet.

“Të gjithë e dimë se çfarë mendon Xhampaoli për Denis. Tani për tani nuk mund të them asgjë më shumë. Milan është një klub i madh. Por ka disa klube të tjera jashtë vendit, që kanë shfaqur interes”, u shpreh ai, duke nënkuptuar edhe interesimin e Arsenalit.

Agjentja e Simeones zbulon të ardhmen: Diego i lidhur me Interin dhe… Lacion

Sport Ekspres — Sun, 09 Sep 2018 13:53:36 +0000

Diego Simeone është ëndrra e Interit për stolin, ndërsa trajneri argjentinas e ka shprehur gjithmonë që do të drejtojë zikaltrit një ditë. Diçka të tillë e konfirmon dhe Natalia Simeone, motra dhe menaxherja e trajnerit.

Në një prononcim për “Gazzetta dello Sport”, Natalia flet për lidhjen me Diegon, Atletikon e Madridit dhe Interin.

“Kam një raport të veçantë me Diegon. Jemi tre fëmijë, Diego është më i madhi, pastaj unë dhe Karla, motra e vogël. Luanim futboll bashkë të vegjël dhe Diego nuk humbiste kurrë. Vëllai im ka shumë respekt për profesionin tim dhe më beson shumë. Ka shtatë vite që ai punon te Atletiko dhe pasioni fiton gjithmonë në fund. Ai është një nga trajnerët më të mirë në botë, por qëndron aty ku beson se mund të arrijë akoma dhe më shumë. Unë e shoqëroj gjithmonë, nëse largohet, unë e ndjek pas.

Inter? Do të ndodhë herët, ose vonë dhe diçka të tillë e ka thënë dhe Diego. Besoj se është një çështje kohe, sepse i pëlqen shumë roli, ambienti dhe të jetojë në Milano. Inter është një skuadër që do i pëlqente shumë ta trajnonte. Por, ai ka mbetur shumë i lidhur dhe me Lacion”, përfundon menaxherja e Simeones.

Klubi i Interit po punon dhe për përforcimin e skuadrës dhe tre janë objektivat e zikaltërve siç citon “Corriere dello Sport”. Lukas Tusart i Lionit, Çesk Fabregas i Çelsit dhe Denis Praet i Sampdorias.

21-vjeçari i Lionit pëlqehet shumë dhe po ndiqet prej kohësh nga drejtuesit e Interit, por problem mbetet shuma e lartë që kërkon Lioni për të. Fabregasit i skadon kontrata në verë me Çelsin dhe konkurrenca për të do të jetë e fortë, por Inter shpreson ta bindë mesfushorin spanjoll. Në fund dhe organizatori belg i Sampdorias. Praet po bën mirë në klubin xhenovez dhe 24-vjeçari pëlqehet nga drejtuesit e Inter.