De Vrij

De Vrij: Jam gati për Interin! Goli në derbi? Një emocion i pabesueshëm

Sport Ekspres — Fri, 12 Apr 2019 20:55:34 +0000

Stefan De Vrij është gati të rikthehet në fushat e lojës. Mbrojtësi i Interit foli sot për “SkyItalia”, ku preku shumë tema të rëndësishme. Sa i takon rikthimit nga dëmtimi, De Vrij tha: “Kam pasur disa probleme ditët e fundit, por kemi punuar në mënyrë të shkëlqyer deri më tani dhe mund të them se jam gati.

Me Frosinonen do të jetë një ndeshje e vështirë, pasi ata kanë fituar ne Fiorentinën në transfertë dhe po kalojnë një moment të mirë.

Goli im në derbi? Ishte një emocion i pabesueshëm. Ne gjithashtu fituam, ajo ndeshje do të mbetet gjatë në memorien time. Gjithsesi, është një takim që është mbyllur dhe duhet të shohim ndeshjet e ardhshme”, tha De Vrij.

VIDEO | Dy gola në gjashtë minuta, ndryshon rezultati në “San Siro”

Sport Ekspres — Sun, 17 Mar 2019 20:51:49 +0000

Kanë mjaftuar vetëm pak minuta nga fillimi i pjesës së dytë që Milani dhe Interi të gjejnë rrugën e rrjetës. Fillimisht Inter çoi rezultatin në 2 – 0 falë golit të De Vrij, ndërsa gjashtë minuta më vonë Milan kundërpërgjigjet me Bakajokon.

Budallallëku i Lacios, “CAS”-i i jep të drejtë Fejnordit

Sport Ekspres — Tue, 25 Sep 2018 17:07:53 +0000

Transferimi i Stefan De Vraj nga Fejnordi te Lacio në verën e vitit 2014-të u shoqërua me polemika të shumta. Problemet midis palëve nisën pasi Lacio ra pre e një skeme mashtrimi, që u krye nëpërmjet email-it.

Si pasojë e skemës, një këst prej 2 milionë eurosh që supozohej të shkonte në llogarinë e Fejnordit ka përfunduar në drejtim të paditur. Klubi holandez ka kërkuar prej vitesh këtë shumë, por Lacio s’ka pranuar, pasi sipas tyre mashtruesit kanë pasur informacion konfidencial të përfituar nga persona brenda klubit holandez.

Por, sot Gjykata e Arbitrazhit Sportiv (CAS) ka urdhëruar Lacion t’i paguajë Fejnordit 1 milionë euro. Skuadra holandeze nuk është e kënaqur me shumën, pasi ata thonë se nuk është faji i tyre që punonjësit e Lacios ranë në grackën e mashtruesve dhe prandaj duhet që ta marrin të plotë këstin prej 2 milionë eurosh.

De Vrij “thumbon” Ronaldon: Ju tregoj sulmuesin më të fortë!

Sport Ekspres — Thu, 13 Sep 2018 08:41:21 +0000

Stefan De Vrij ishte një nga afrimet e goditura të Interit këtë verë. Zikaltrit e ndiqnin prej kohësh dhe fituan garën me Lacion që po tentonte ta bindte të rinovonte me holandezin. Nga ana tjetër pas tij ishin edhe klube të tjera, më i lakuari Mançester Junajtid. Mbrojtësi në fund u vesh zikaltër.

Së fundmi ai ka dhënë një intervistë për “Corriere dello Sport”, teksa flet për nisjen e kampionatit, garën me Juventusin dhe transferimin e Kristiano Ronaldos te bardhezinjtë. De Vrij ndërkohë zbulon edhe sulmuesin më të fortë me të cilin është përballur dhe ai nuk është CR7.

STARTI DHE OBJEKTIVI – “Sigurisht që nuk jam i kënaqur me rezultatet e marra. Është për të ardhur keq që kemi humbur pesë pikë në tre ndeshjet e para. Gjithsesi jemi në rrugën e duhur. Në ndeshjen e fundit pashë një Inter të mirë dhe duhet të vazhdojmë kështu. Objektivi? Ta përfundojmë kampionatin në katër vendet e para dhe të konfirmohemi në Champions.

ANTI-JUVENTUS – “Nuk i lexoj shumë gazetat italiane, si dhe nuk dëgjoj shumë programe televizive. Kam mësuar të mos kushtëzohem dhe të përqendrohem në fushë. Më mirë të mendosh për ndeshjen e radhës, ndryshe anti-Juventusi kthehet në fiksim dhe ne do të flisnim vetëm për këtë”.

“Toti ka thënë se Juventusi do të bëjë një kampion më vete? Nëse shohim organikën, Juventusi është ai që ka më shumë cilësi. Por në futboll mund të ndodhë gjithçka. Sezoni është i gjatë”.

KRISTIANO RONALDO – “E pranoj, në fillim nuk e besoja se do të vinte në Itali. Por kur vazhdohej të flitej akoma, atëherë… Për futbollin italian ardhja e tij është pozitive, pasi është një nxitje e madhe për të gjithë”.

“Po mendoni për përballen me Ronaldon? E kam sfiduar me kombëtaren, në një miqësore kundër Portugalisë para Kupës së Botës 2014. Përfundoi 1-1 dhe shënoi në fund, por pas një goditjeje këndi”.

“Sulmuesi më i fortë më të cilin jam përballur? Është Kilian Mbape”.