De Sciglio

De Shilio prezantohet, 5 vite i Juves

Sport Ekspres — Thu, 20 Jul 2017 11:04:14 +0000

Juventusi ka zyrtarizuar sot firmën me mbrojtësin e blerë nga Milani, Matia De Shilio. Anësori i djathtë prëforcon kështu “Zonjën e Vjetër”, që kërkonte prej kohësh një pasues të Dani Alveshit.

Mbrojtësi 25-vjeçar ka firmosur një kontratë deri në vitin 2022.

UFFICIALE – @mattia_desci è bianconero! https://t.co/BFgqIsMKWJ pic.twitter.com/EZCy02w3cX

— JuventusFC (@juventusfc) July 20, 2017

Largimi i tij nga Milani ishte traumatik, sepse prej vitesh shihej si pasardhësi i Paolo Maldinit, por jo vetëm që nuk u ngjit asnjëherë në lartësinë e pritshmërive, por u bë edhe armik me tifozët, kur refuzoi rinovimin me Milanin dhe kërkoi transferimin te Juventusi.

Milani do të marrë 12 milionë euro në total, plus 0,5 milionë në varësi të ecurisë së mbrojtësit.

Zyrtare/ De Shilio lë Milanin për Juven

Sport Ekspres — Mon, 17 Jul 2017 17:33:52 +0000

Milani e ofroi në marrëveshjen për Leonardo Bonuçin, por Juventusi refuzoi, sepse dëshironte t’i mbante bisedimet të ndara.

Milani pranoi, duke blerë Bonuçin, por tani e ka radhën Juventusi të paguajë, sepse ka marrë Matia De Shilion për 12 milionë euro.

Mbrojtësi, i kërkuar me ngulm nga Maks Alegri, hynte në vitin e fundit të kontratës dhe kishte deklaruar me kohë se nuk do të rinovonte, duke tërbuar tifozët e Milanit e duke u kthyer në armik në Milano.

Në këtë moment De Shilio është në Kinë, ndërsa nesër do të niset për në Itali, për kontrollet mjekësore dhe për firmën.

Shçesni – Ka marrë fund edhe tratativa për portierin polak Vojçeh Shçesni. Bisedimet me Arsenalin janë mbyllur për 12 milionë euro, ndërsa Shçesni bëhet zëvendësuesi i Bufonit, me planin që pas një viti të jetë ai titullari. Ndërkaq, së shpejti pritet që Juve të mbyllë edhe operacionin Federiko Bernardeski me Fiorentinën.

Hakmarrja, Juve i kërkon Lokatelin Milanit

Sport Ekspres — Sun, 16 Jul 2017 08:32:35 +0000

Leonardo Bonuçi nga Juventusi te Milani, lëvizja më e papritur dhe e bujshme e verës, që ka tronditur tifozët e Juventusit dhe ka entuziazmuar kuqezinjtë.

Tani Juve bëhet gati për përforcime të tjera dhe një ide ka nisur të qarkullojë në mediat italiane: bardhezinjtë duan Manuel Lokatelin nga Milani, përveç Matia De Shilios.

Mesfushori i talentuar 19-vjeçar konsiderohet një futbollist me të ardhme të madhe dhe vetëm i duhet kohë që të rritet, ndaj Juventusi e sheh si lojtarin perfekt për ta rritur në një mesfushë klasi.

Milani ka refuzuar prerë çdo mundësi shitjeje, duke e deklaruar të pashitshëm, por kjo thjesht tregon që lëvizje ka në këtë drejtim dhe duket se Juve kërkon hakmarrje, sepse ka nisur kontaktet me agjentin e lojtarit.

Ndërkaq, vazhdon presioni i Juves për të marrë Matia De Shilion, që Alegri e do me çdo kusht dhe Milani e vlerëson 12 milionë euro, 4 më shumë nga sa ofron Juventusi, që kërkon urgjentisht pasardhësin e Dani Alveshit.