Davide Calabria

Infermieria përforcon Milanin, lajme pozitive për Gatuzon

Sport Ekspres — Mon, 15 Apr 2019 13:39:27 +0000

Fitorja me Lacion ka rikthyer qetësinë dhe ka rritur moralin e Milanit. Kuqezinjtë renditen përsëri në vendin e katërt dhe gara për kualifikimin në Champions po bëhet gjithnjë e më e bukur.

Ndeshja e radhës për ekipin e Gatuzos është përballë Parmës. Trajneri ka marrë tre lajmë të mira përpara përballjes që do të zhvillohet ditën e shtunë në drekë.

Alesio Romanjoli dhe Davide Kalabria u larguan të dëmtuar nga sfida me Lacion. Dëmtimet e tyre nuk janë serioze dhe dy mbrojtësit do të jenë gati për transfertën emiliane. Kapiteni do të vazhdojë edhe disa ditë me terapi, por mjekët janë të sigurt që Romanjoli do të jetë nën urdhrat e Gatuzos për “finalen” e radhës.

Gati është edhe Xhanluixhi Donaruma. Portieri i ka lënë pas krahëve problemet dhe pritet të rikthehet në mes të shtyllave. Pak më ndryshe situata e Lukas Paketa. Riaftësimi i brazilianit po ecën mirë, por rikthimi i tij është akoma larg. Objektivi është që lojtari të jetë i gatshëm për ndeshjen e 28 prillit, Torino-Milan.

Donaruma, Piatek dhe objektivi Champions: Kalabria i prek të gjitha…

Sport Ekspres — Mon, 04 Feb 2019 17:30:48 +0000

Davide Kalabria është një ndër lojtarët më të dalluar në prapavijën e Milanit. Anësori i majtë ishte titullar për 90 minuta në sfidën e një natë më parë ndaj Romës. Mbrojtësi ka folur për mediat, teksa ka komentuar ndeshjen e mbrëmshme si dhe ka diskutuar dhe mbi tema të tjera.

NDESHJA – “E ulëm shumë ritmin, pasi mund të kishim krijuar më shumë raste. Për fat të keq, kjo na penalizoi për mosmarrjen e tre pikëve. Gjithsesi, duhet të jemi pozitivë. Kishim dy ndeshje brenda tre ditësh kundër një ekipi si Napoli dhe për të thënë të vërtetën shpenzuam shumë energji”.

LOJA – “Bëmë mirë, pasi edhe shënuam. Mund ta kishim evituar golin që pësuam, por ndodhi. Roma luajti lojë shumë sulmuese. Presingu i tyre nga vuri pak në vështirësi, kështu që luajtëm me topa të gjatë”.

DONARUMA – “Xhixhio ka bërë më shumë se 100 ndeshje. Është i jashtëzakonshëm, edhe pse ndonjëherë disa e harrojnë këtë gjë”.

MBROJTJA – “Po bëjmë mirë në mbrojtje, sidomos në ndeshjet e fundit. Kemi punuar shumë gjatë javës”.

PENALLTIA E SUSOS – “Nuk ishte e qartë se çfarë ndodhi. Duhej hapur sistemi VAR, e njëjta gjë si në rastin e Pelegrinit për kartonin e kuq”.

PITATEK – “Kishte të drejtë të kërkonte topa të gjatë. Ka bërë mirë, po ashtu si Paketa me asistin e tij te goli”.

CHAMPIONSI – “Është një sfidë për ne dhe jemi shumë të fokusuar. Çdo ndeshje është e rëndësishme dhe na duhet të marrim tre pikët, sidomos në fushën tonë”.

Junajtid vëzhgon mbrojtësin në “San Siro”, kundërpërgjigjet Milani

Sport Ekspres — Tue, 25 Dec 2018 17:09:07 +0000

Fitorja e thellë kundër Kardifit në transfertë ka rikthyer qetësinë tek Mançester Junajtid, ndërsa Ole Gunar Soskjaer e nisi mbarë aventurën në stolin e “Djajve të Kuq”. Drejtuesit e klubit kanë hedhur sytë drejt merkatos dhe objektivi i tyre kryesor është një mbrojtës i djathtë.

Mateo Darmian nuk do të rinovojë dhe e ardhmja e italianit është larg ishullit. Megjithatë, Junajtid ka një objektiv të ri dhe ai është Davide Kalabria. Një vëzhgues i klubit anglez ka qenë i pranishëm në “San Siro” gjatë ndeshjes Milan-Fiorentina për të ndjekur nga afër 22-vjeçarin italian. Kalabria luajti si mesfushor të shtunën, për shkak të mungesave të shumta në ekipin e Gatuzos. Kontrata e tij me Milanin skadon në vitin 2022 dhe Junajtid është gati të bëjë ofertën e parë për shërbimet e tij.

Nga ana tjetër është Milani që kërkon një lojtar të Junajtid. Siç raporton “Daily Mirror”, kuqezinjtë pëlqejnë Markus Rashford, sulmuesin e ekipit të Solskjaer, por gara për të është shumë e fortë, pasi për 21-vjeçarin interesohen dhe Juventus, Barcelona dhe Real Madrid.