David Domgjoni

Nga mbrojtja, në sulm: lëvizjet e fundit te Laçi

Sport Ekspres — Thu, 31 Jan 2019 15:55:54 +0000

Laçi ishte hedhur në kërkim të një mbrojtësit, pasi Irlian Ceka është dëmtuar dhe e ka mbyllur sezonin. Lojtari i Shqipërisë U21 ka këputur ligamentin dhe drejtuesit kurbinas kanë nënshkruar me David Domgjonin. Kontrata për të është afatgjatë, 3-vjeçare.

Futbollisti nga Prizreni është produkt i Shkëndijës së Tiranës, ndërkohë që më pas ka provuar një eksperiencë te Tirana. Kastrioti ishte stacioni i radhës në Kategorinë e Parë. Sezonin e shkuar Domgjoni luajti për Lirinë e Prizrenit dhe në verë u rikthye në Superiore me krutanët. Ai mund të luajë në qendër të mbrojtjes dhe mesfushës, si dhe në të majtë të prapavijës.

View this post on Instagram

Zyrtare:Vjen goditja e gjashtë,David Domgjoni firmos për 3 vite me K.f Lacin ???????? @paralaci

A post shared by K.F.Laçi Official (@k.f.laci_official) on Jan 31, 2019 at 7:10am PST

SULMUESI – Laçi ka nënshkruar prej kohësh me sulmuesin Malik Mane, i cili sezonin e fundit ka qenë pjesë e Akzhajik në Kazakistan. SportEkspres.com mëson se futbollisti 30-vjeçar nesër pritet të vijë në Shqipëri. Shpresohet që të ketë bërë stërvitje individualisht dhe të mos duhet shumë kohë që të bëhet gati për lojë.

Një formacion i larguar, Kastrioti zyrtarizon dy lëvizjet e radhës

Sport Ekspres — Thu, 27 Dec 2018 15:32:16 +0000

Kastrioti njeh vetëm largime deri më tani. Krutanët kanë zyrtarizuar ditën e sotme edhe dy lëvizje të tjera. Kështu të larguarit e radhës janë mbrojtësi David Domgjoni dhe sulmuesi nigerian Çarles Atsina. E gjitha ka marrë formë zyrtare dhe tanimë shkon në 11 numri i lojtarëve që e kanë mbyllur bashkëpunimin me Kastriotin.

“KS Kastrioti zyrtarizon mbylljen e bashkëpunimit me mbrojtësin David Domgjoni dhe sulmuesin Çarls Atsina. Të dy lojtarët u bashkuan me skuadrën në merkaton e verës, ndërsa me konsensusin e plotë të të dy palëve e kanë mbyllur bashkëpunimin me KS Kastriotin. Klubi i falënderon të dy lojtarët për kontributin e dhënë me fanellën e Kastriotit dhe njëkohësisht i’u uron suksese në karrierë! KS Kastrioti”, njofton klubi krutan.

Domgjoni u aktivizua në 14 ndeshje me Kastriotin, 12 prej të cilave i nisi nga minuta e parë. Vjet ai ishte pjesë e Lirisë së Prizrenit, ndërkohë që në të shkuarën ka qenë me Tiranën. Mbrojtësi qendror ëshët formuar si lojtarë te Shkëndija e Tiranës.

Për Çarles Atsina hapësirat ishin më të pakta. Ganezi, i cili vjet ishte pjesë e Vllaznisë, largohet nga Kastrioti pa shënuar gol në kampionat. Futbollisti 29-vjeçar në vetëm 4 ndeshje luajti në formacion, nga nëntë ndeshje që u aktivizua në total.

Domgjoni: Nica na ka ndryshuar, mbijetesa e mundur

Sport Ekspres — Thu, 29 Nov 2018 12:00:54 +0000

Te Kastrioti është rritur ndjeshëm besimi për të qëndruar në Superiore. Ndeshja e fundit në Laç tregoi se krutanët e kanë forcën për ta bërë diçka të tillë dhe nëse vazhdohet me këtë ritëm, gjithçka është e mundur.

Kështu shprehet edhe mbrojtësi David Domgjoni, i cili është parë të luajë në qendër të mesfushës këto javë. “Ndeshja me Laçin na dha një shtysë, pavarësisht rezultatit. Luajtëm mirë dhe kemi fituar vetëbesim. Kemi dalë në lojën tonë. Është e vështirë me Flamurtarin, por duam maksimumin. Luajmë në shtëpi. Po u paraqitem si në ndeshjet e fundit, do marrim rezultat pozitiv”, u shpreh ndër të tjera Domgjoni në “Supersport”.

Më tej ai flet edhe për objektivin mbijetesë dhe për ndryshimin që Kastrioti ka pësuar me trajnerin Nica: “ Shpresoj të vazhdojmë me këtë ritëm., po luajmë rrjedhshëm. Jemi aty-aty me të gjitha ekipet, do mundohemi të marrim maksimumin. Është një mision i mundur, kemi krijuar një fizionomi të lojës. Kemi një ekip të ri, Nica ka futur një frymë të re. Jemi shumë djem nën 21 vjeç që po luajmë”.

Sa i përket të ardhmes së tij, Domgjoni shprehet se për momentin mendon të ndihmojë Kastriotin ën realizimin e objektivit për të qëndruar në Superiore. “Do mundohem të bëj mirë, të realizojmë objektivat e vendosura në fillim të sezonit nga klubi. Shpresojmë t’i arrijmë ato, në fund të shohim. Momentalisht jam i fokusuar të ndihmoj ekipin në realizimin e objektivave”.

U dëmtua ndaj Teutës, mbrojtësi i Kastriotit drejt rikuperimit

Sport Ekspres — Wed, 10 Oct 2018 11:34:29 +0000

Kastrioti u mund nga Teuta në ndeshjen e fundit dhe mbetet në vendin e fundit në klasifikim. Në fundin e pjesës së parë pati probleme për një nga titullarët. Mbrojtësi David Domgjoni mori një goditje në kavilje dhe trajneri Elvis Plori u detyrua ta zëvendësonte.

Nga goditja e marrë i është ënjtur këmbë, por dita ditës gjendja e mbrojtësit të majtë po përmirësohet. Pushimi i kombëtares i jep mundësinë atij të rikuperohet në kohë për takimin radhës kundër Kukësit në shtëpi.

Krutanët do mundohen të shfrytëzojnë kalendarin, pasi veçse me verilindorët në shtëpi do të përballen më pas edhe me Luftëtarin. Është një mundësi e mirë për të treguar se deri në fund nuk do të dorëzohen për të siguruar qëndrimin në Superiore.

Zyrtare: Plorit i plotësohet një dëshirë merkatoje

Sport Ekspres — Wed, 08 Aug 2018 11:44:29 +0000

Kastrioti ka bërë edhe një tjetër përforcim në merkato. Krutanët kanë zyrtarizuar marrëveshjen me mbrojtësin David Domgjoni, i cili edhe më parë ka qenë pjesë e tyre. Ata e kishin marrë në huazim nga Tirana asokohe.

“David Domgjoni është futbollisti më i ri i Kastriotit. Mbrojtësi 21-vjeçar, ka firmosur ditën e sotme kontratën 1-vjeçare me klubin dhe që sot i është bashkuar skuadrës në stërvitje”, njofton klubi i Kastriotit përmes faqes zyrtare në “Facebook”.

Sezonin e shkuar Domgjoni ishte pjesë e Lirisë së Prizrenit, skuadra e vendlindjes. Si futbollist ai është formuar te Shkëndija e Tiranës. Trajneri Elvis Plori e njeh mirë lojtarin, pasi e ka pasur vetë nën urdhra për gjashtë muaj te Kastrioti. Ai mund të luajë në qendër dhe në të majtë të mbrojtjes. Me të bisedimet kishin nisur prej kohësh, por vetëm sot është konkretizuar gjithçka.