E kryer | Benedeto mbërrin në Europë, firmos me “gjigantin” francez

Sport Ekspres — Thu, 01 Aug 2019 11:56:27 +0000

Dario Benedeto është një emër shumë i njohur në Amerikën e Jugut. Sulmuesi argjentinas ka qenë një ndër lojtarët më të famshëm në kontinentin e Amerikës së Jugut, por Europa nuk është më një ëndërr në sirtar për të. Në moshën 29-vjeçare Benedetos i ka ardhur një ofertë e që s’mund ta refuzojë.

Olimpiku i Marsejës dorëzoi një ofertë prej 16 milionë eurosh për kartonin e sulmuesit, çka ka bindur drejtuesit e Boka Zhuniors. Lojtari ka kaluar ditën e sotme testet mjekësore në Marsejë dhe do të firmosë një kontratë

Në tri vite te Boka Zhuniors, Benedeto ka shënuar 43 gola në 67 ndeshje, shifra këto që i kanë mundësuar pesë paraqitje me kombëtaren argjentinase. Marseja është zhgënjyer viti pas viti nga sulmues si Mitroglu, Zhërmen dhe Baloteli, ndoshta argjentinasi do ia dalë të thyejë këtë mallkim që ka prekur sulmuesit e skuadrës franceze.

Ironia ndaj tifozëve të Riverit: Mos i gjuani me gurë pilotit, nuk ka lidhje me 2011!

Sport Ekspres — Wed, 05 Dec 2018 16:33:12 +0000

Edhe pak ditë kanë mbetur nga zhvillimi i finales së kthimit të Kupës Libertadores, River Plejt-Boka Zhuniors. Derbi më i fortë në botë do të luhet në “Santiago Bernabeu” të Madridit me datë 9 dhjetor në orën 20:30.

Autoritetet spanjolle kanë marrë masat e duhura dhe po bëjnë maksimumin për të shmangur përplasjet mes dy tifozërive “armike”. Nga Argjentina do të udhëtojnë nga 5 mijë tifozë për çdo ekip, ndërsa nuk mungojnë batutat dhe polemikat mes palëve. I fundit që e ka bërë një gjë të tillë është vëllai i Dario Benedetos, sulmuesit të Bokës dhe idhullit absolut të tifozërisë së saj.

“Aerolinaes e Argjentinës u bën thirrje tifozëve të RiBerit të mos shkaktojnë probleme në aeroport dhe mos gjuani me gurë, kur piloti, kur të jeni duke iu afruar Madridit, do t’u thojë: ‘përgatitemi për zbritjen’. Është një procedurë standarde dhe nuk ka lidhje me vitin 2011”, ironizon vëllai i bomberit, duke iu referuar rënies së Riverit nga kategoria në vitin 2011, çka kuptohet dhe nga modifikimi i emrit ku bie në sy shkronja B.

Tifozët e Bokës nuk përtojnë kurrë t’ua kujtojnë atyre të Riverit rrëzimin në vitin 2011, por komenti i vëllait të Benedetos ka lidhje dhe me ngjarjet e pakëndshme, që sollën transferimin e klasikes në Spanjë, si pasojë e sulmit me gurë dhe sende të forta të tifozëve të Riverit kundrejt autobusit të lojtarëve të Bokës.