Gjithsesi, goli i Danilos në minutën e 37-të që vuri baraspeshën e përkohshme, u bë i pavlefshëm në pjesën e dytë, pasi në minutën e 74-të, ishte Xhon që i dha fitoren miqve të Kaisar.

Pas 11 javësh të luajtura ekipi i Okzhetpes renditet në vendin e tetë me 14 pikë, ndërsa Danilo Alvesh numëron dy gola në aventurën e tij aktuale në Kazakistanin e largët.

Sfida u mbyll me barazimin spektakolar 2-2, me Danilo Alvesh që ishte protagonist me golin e tij të parë në Kazakistan. Në minutën e 77-të, ish-sulmuesi i Flamurtarit i dha avantazhin e përkohshëm ekipit të tij, duke u treguar i saktë përballë portierit.

Nga ana tjetër, Donjet Shkodra vijon të konfirmohet një pjesë e rëndësishme e Karagandit, me mesfushorin që ishte titullar për 90 minuta.

Me kalimin e javëve u bë e qartë se mes brazilianit dhe klubit vlonjat s’mund të kishte më pajtim dhe ditën e djeshme sulmuesi ka është prezantuar si lojtari më i ri skuadrës së kazake të Okzhetpes Kokshetaus.

Gjithsesi situata ka ende “kleçka” në mes, pasi burime nga klubi vlonjat bëjnë me dije se lojtari ende nuk e ka marrë lejekalimin, por po bisedohet për gjetjen e një marrëveshjeje. Kontrata e Danilos me Okzhetpes është e vlefshme deri në fund të vitit 2019.

Ai pret edhe një lojtar tjetër dhe së fundmi po bisedohet me brazilianin Danilo Alvesh. Aktualisht sulmuesi është e Afjet Afjonspor në Turqi dhe ka luajtur në dy takime. Dy javët e fundit nuk është aktivizuar dhe ka një opsion që të rikthehet në Vlorë.

Administratori Sinan Idrizi e pëlqen lojtarin dhe ia pat bërë ofertën e vet, ndërkohë që edhe Daja e priste sulmuesin brazilian,  i cili ka luajtur për dy sezone e gjysmë me kuqezinjtë, duke shënuar 13 gola në kampionat.

Edhe pse i ka dhënë fjalën presidentit Sinan Idrizi se do të jetë në Vlorë këto ditë, Danilo Alvesh me shumë gjasa do të ndryshojë destinacion, sepse i ka ardhur një ofertë shumë joshëse nga Korea e Jugut,  mëson “Sport Ekspres”.

Duhet kujtuar se jo vetëm kampionati i Koresë së Jugut, por gjithë rajoni paguan shifra marramendëse në krahasim me futbollin shqiptar, mjafton të kujtohet që lojtarët e huaj në Tailandë paguhen me shifra që i kalojnë 20.000 eurot në muaj.

Natyrisht, nuk është e lehtë t’ia dalësh në një kampionat me mentalitet krejt ndryshe nga Europa dhe në një vend me kulturë mjaft ndryshe nga e jona, ndaj jo rastësisht Cikalleshi e shumë të tjerë nga Ballkani nuk ia kanë dalë të ambientohen.

Megjithatë, Danilo Alvesh nuk mund ta humbasë këtë shans, aq më shumë që është lojtar i lirë në treg dhe do të përfitonte shumë ekonomikisht nga kjo gjë.

Një sulmues shumë i fuqishëm dhe një motor në fushë, Danilo Alvesh është një futbollist që krijon hapësira pa fund për sulmuesit, edhe pse nuk shënon shumë, vetëm 15 gola në 83 ndeshje në Vlorë. Pikërisht shpirti luftarak dhe vrapi pa fund në fushë e kanë bërë Danilon shumë të respektuar në Vlorë, me presidentin Idrizi që nuk e ka lëshuar as kur në garë për ta marrë është futur fuqishëm edhe Skënderbeu.

Jurgen Zela

Danilo Alvesh është njeriu i momentit te Flamurtari, sepse në vitin e ri ka shënuar 2 nga 3 golat e Flamurtarit. Mposhti Partizanin në kupë, shënoi edhe në Kukës, aty ku Flamurtari nuk kishte marrë kurrë pikë deri të dielën. Sulmuesi brazilian duket se më në fund është zhbllokuar, pasi në pjesën e parë të sezonit shënoi vetëm një gol dhe po e vuante jo pak këtë gjë, edhe pse trajneri Duro e vlerësonte shumë faktin që sulmuesi vrapon pa fund e krijon raste për shokët, ndërsa problem ishte finalizimi. Edhe në Kukës Danilo e humbi një rast të pabesueshëm në fund, kur Koliçi doli në mënyrë të gabuar dhe Kukësin e shpëtoi fati nga pësimi i golit të dytë. Gjithsesi, Alvesh është i kënaqur me atë që po bëjnë ai dhe Flamurtari dhe tani sheh përpara, nga finalja kundër Skënderbeut të premten. Është një finale e vogël, këtë gjë e kanë të qartë në Vlorë, por Danil Alvesh ul presionin, pasi ashtu si trajneri Duro, edhe ai shprehet se vendi i dytë konsiderohet sërish sukses, nëse nuk kapet kreu.

– Dy gola në dy ndeshjet e fundit, duket se viti i ri ka nisur mbarë.

– I lumtur për golin, i lumtur që më në fund morëm pikë në Kukës, edhe pse meritonim fitoren. U ndëshkuam në fund, jemi pak të mërzitur, sepse ishim shumë pranë fitores, edhe unë humba një rast të pastër në fund, nuk e godita si duhej topin, sepse nuk e pandeha që portieri do gabonte në dalje. Tani mendojmë për ndeshjen në Korçë, që është më e vështira e sezonit, synojmë rezultat pozitiv.

– Penallti kundër, protesta pa fund nga ju…

– Nuk e di, të them të drejtën, në fushë nuk e pashë mirë, por ishte edhe një penallti pro nesh në pjesën e parë. Nëse na jepet penallti e dyshimtë kundër, le të jepet edhe ajo për ne, duhet pak drejtësi. Për këtë protestuam dhe protestojmë, sepse rastet e dyshimta trajtohen ndryshe kur janë për ne dhe ndryshe kur janë kundër nesh.

– Duke parë renditjen, synim më real Europa League? A jeni të kënaqur me vendin e dytë?

– Të shohim, pak nga pak, javë pas jave. Nëse nuk arrijmë dot të shkojmë më lart, do të mundohemi të ruajmë vendin e dytë. Për ne edhe kualifikimi në Europë është sukses.

– Kujt ia kushtoni këtë gol?

– Familjes sime, si dhe tifozëve të Flamurtarit, të cilët presin shumë prej meje dhe prej gjithë skuadrës.

“Po, 4 muaj janë shumë për një sulmues. Shënova në një ndeshje shumë të rëndësishme, jam shumë i lumtur, por mbi të gjitha e rëndësishme është të fitojë Flamurtari. Unë jap gjithnjë maksimumin, jam në shërbim të skuadrës dhe jam i kënaqur, tani shpresoj te fitorja edhe në Tiranë për të shkuar në gjysmëfinale”, u shpreh sulmuesi brazilian pas ndeshjes në mikrofonin e “Gol pas goli” në Supersport.

Për Danilon është shtuar ndjeshëm konkurrenca në sulm, por ai nuk shqetësohet: “Po, është rritur ndjeshëm rivaliteti për një vend në formacion, jemi shumë sulmues, por unë punoj dhe jap maksimumin. Shumë mirë për Flamurtarin që jemi shumë sulmues, sepse duhet të shënojmë sa më shumë gola për të qëndruar në vendet e para të renditjes. Tani kemi dy ndeshje mjaft të rëndësishme, shpresojmë të fitojmë”.

Titulli kampion nuk është tabu, por Alvesh kërkon durim, ashtu si trajneri Duro: “Profesor Duro na thotë gjithnjë që të shohim ndeshjet e radhës, shohim ndeshjen e radhës në Kukës, më pas me Skënderbeun, e me radhë. I marrim ndeshjen një nga një, të shohim ku jemi në renditje pas dy ndeshjeve direkte, nëse do të jemi afruar dot me kreun”.

Elton Nika

“Sado që të jenë, nuk ka pengesë që nuk mund të kapërcehet”, ky është mendimi i sulmuesit brazilian Danilo Alvesh, natyrisht i thënë në gjuhën e tij, por që nënkupton shumë. Lidhet pikërisht me vendimet e gjyqtarëve në ndeshjet e fundit të Flamurtarit, teksa braziliani ka postuar edhe në rrjetet sociale një pamje filmike nga ndeshja e fundit, kur goditja e tij drejt portës u ndalua me dorë nga një prej lojtarëve të Laçit. Vetë sulmuesi i Flamurtarit pranon dukshëm se në javët e fundit vendimet ndaj gjyqtarëve kanë qenë dukshëm kundër Flamurtarit. “Sido që të jenë, nuk ka pengesë që nuk mund të kapërcehet. Ne do të vijojmë përpara për të kërkuar maksimumin në çdo ndeshje. Kjo është një fatkeqësi e madhe për të gjithë, pasi po shohim nga ndeshja në ndeshje se po goditemi vetëm ne, teksa na janë mohuar raste mjaft të pastra të penalltive, që duhej të ishin dhënë. Në këtë mënyrë do të kishim pikë më shumë në renditje. Por pavarësisht pengesave, ne jemi të bindur se gjithçka do të arrijmë ta kapërcejmë me sukses, me lojën dhe fitoret tona në çdo ndeshje. Megjithatë të vjen keq kur sheh se gabimet përsëriten çdo ndeshje dhe çdo javë të kampionatit, pikërisht ndaj nesh, në ndeshje ku dukshëm duhej t’i kishim fituar, pasi kemi shënuar dhe kemi ruajtur avantazhin, madje kemi shkuar pranë golit të dytë dhe na kanë barazuar vetëm me anë të penalltive, të cilat nuk kanë qenë aspak. Ndërsa Flamurtarit nuk i janë akorduar penallti nga më flagrantet.

Gjithsesi ne do të kapërcejmë çdo pengesë, duke parë që tani nga ndeshja e radhës, ku duhet të kthehemi te fitorja. Besojmë plotësisht te ky rezultat, pavarësisht emrit të kundërshtarit që kemi përballë. De e respektojmë dhe vlerësojmë kundërshtarin në fushën e lojës, por do të kërkojmë vetëm tre pikët”, thekson sulmuesi i Flamurtarit, që deri më tanika shënuar një gol kampionat, në sfidën e fituar me Lushnje. Gjithsesi me asistet e tij i ka dhënë dy gola Bushiçit. 

MUSTA – Nuk është vetëm Danilo Alvesh që sheh pengesa të mëdha përpara, por edhe lojtarët e tjerë të Flamurtarit. Në rrjetet sociale nuk kanë nguruar të rendisin situatën e krijuar deri më tani në gjashtë javë kampionat. Emiljano Musta, lojtari i linjës së majtë, nuk ka nguruar të postojë në faqen e tij një foto të tre gjyqtarëve me syze, shoqëruar me mbishkrimin: No Coment! Gjyqtarët këtë vit kundër Flamurtarit””. Nënkuptimi i fotos është i qartë: gjyqtarët nuk arrijnë të shohin asgjë që është në favor të Flamurtarit, por gjithçka kundër e japin menjëherë pa u menduar aspak. Pas administratorit Idrizi, i cili e ka cilësuar si komplot situatën e krijuar ndaj Flamurtarit, tashmë edhe lojtarët duket se nuk mund ta pranojnë më situatën e krijuar, teksa nuk kanë munguar komentet ironike në rrjetet sociale për situatën që ka kaluar me gjykimet klubi vlonjat.

Nuk ka patur një takim Duro-Alvesh, ndërsa duket se në ditën e rikthimit në stërvitje, skuadra ka zhvilluar një përgatitje të qetë. Trajneri i Flamurtarit, Shpëtim Duro, nuk ka qenë i pranishëm  në stërvitje, për arsye të tij personale, ndërkohë që duket se ballafaqimi pas çështjes së krijuar, pas ndeshjes me Luftëtarin, pritet ditën e mërkurë. Vetë trajneri i skuadrës vlonjate, nuk ka dashur ta quajë problematike situatën, ndërsa i kontaktuar nga “Sport Ekspres” ka konfirmuar se ai nuk ka vetëm një lojtar në skuadër, por gjithë ekipin dhe duhet të mendojë pikërisht për të gjithë grupin, ndërsa konfirmon se për çdo çështje ka një rregullore të brendshme të klubit. “Kemi një rregullore të brendshme të klubit”, ka konfirmuar trajnerin Duro. – “Për çdo individ që thyen rregulloren, duhen marrë masat e duhura. Pikërisht për këtë rregullore unë jam strikt. Për disiplinën në ekip ka qenë në një linjë me mua edhe presidenti Idrizi, qysh në kohën kur unë u emërova trajner i ekipit. Për këtë jam mjaft i qartë. Nuk kam vetëm një lojtar në skuadër, por të gjithë ekipin, për të cilin duhet të mendoj. Unë sot nuk kam qenë në stërvitje, por duhet të kuptohet se më duhet të mendoj për të gjithë skuadrën dhe jo lojtarë në veçanti. Është klubi që  ka rregulloren e vet të përcaktuar dhe natyrisht mua si trajner më takon të kem mendimet dhe vendimet e mia, sa i përket skuadrës dhe lojës së saj. Ne kemi përcaktuar një rregullore të brendshme të klubit dhe për këtë besoj jam plotësisht i qartë. Gjithsesi, ajo që thashë më lart, mbetet, pasi jam shumë strikt dhe i prerë në rregulloren dhe zbatimin e saj. Një trajner nuk ka vetëm një lojtar, por të gjithë skuadrën për të cilën duhet të mendojë”, ka konfirmuar trajneri i Flamurtarit, Shpëtim Duro. “Çështja Alvesh” nisi menjëherë pas ndeshjes me Luftëtarin, ku vetë trajneri u shpreh i pakënaqur me lojën, por edhe faktin se sulmuesi Alvesh humbi shumë topa gjatë lojës. Një kritikë, që nuk u përtyp mirë nga vetë Danilo Alvesh, i cili reagoi menjëherë mes një postimi në rrjetet sociale, por duket se drejtuesit e klubit kanë kërkuar që gjithçka në brendësi të skuadrës të mbetet sa më e qetë. Edhe vetë administratori Idrizi e quajti një “çështje brenda familjes”, ndërsa ditën e martë, me rifillimin e seancave stërvitore, pritej edhe një ballafaqim mes trajnerit dhe sulmuesit brazilian. Ballafaqim që nuk ka ardhur, ndërsa ditën e mërkurë, pritet që trajneri Duro të ketë ndoshta pse jo edhe një takim me vetë lojtarin, në një situatë, ku të gjithë në Vlorë, kërkojnë që të arrihet sa më shpejt qetësia. Në një moment, kur skuadra është me pikë të barabarta në vendin e dytë në renditje, duket se një konflikt i tillë, nëse mund të quhet kështu, nuk i duhet Flamurtarit, që tashmë ka nisur të mendojë për ndeshjen e radhës në kampionat përballë Vllaznisë në transfertë dhe të harrojë gjithçka sa i përket çështjes së krijuar gjatë këtyre ditëve.

Tani edhe Danilo Alvesh nuk ka duruar më dhe ka shfryrë nervat në Facebook, me një postim plot mllef dhe që i vë flakën ambientit në Vlorë, që dukej i qetë deri ndeshjen e djeshme.

Danilo pranon se nuk ka marrëdhënie të mira me trajnerin, por refuzon të etiketohet si fajtori për mungesën e fitores.

“Ne mund ta kishim fituar ndeshjen dje, por për fat të keq morëm një barazim në shtëpi. Edhe një herë tjetër trajneri me fajëson mua. Mendoj se ai duhet të pranojë gabimet e tij si trajner, disa lojtarë luajnë jashtë pozicionit. Skuadra nuk mund te shkëmbeje pozicionet midis mbrojtjes dhe mesfushës për të hedhur topin ne sulm. Mund të them që bëra mjaft gabime dje, por isha i vetmi lojtar që të shumten e kohës e vendosi topin në tokë për ta mbajtur atë, të pasoja dhe të bëja diçka në fushë.

Trajneri nuk më ka qejf mua, ashtu siç nuk e kam unë atë. Ne duhet të bëjmë më të mirën për Flamurtarin, kështu që është e thjeshtë, le të futë një lojtar tjetër në lojë në vendin tim.

Nuk është faji im për çdo gjë që shkon keq. Skuadra ka 11 lojtarë dhe secili lojtar duhet të marrë përgjegjësitë e tij, veçanërisht trajneri.

Jam lodhur, sepse është gjithmonë i njëjti avaz “Danilo Alvesh është problemi”, “Nuk jam i lumtur me Danilo Alvesh”. Nëse nuk je i lumtur, atëherë fut një lojtar tjetër, ose më prish kontratën dhe trajneri të vazhdojë me skuadrën që dëshiron të ketë në dispozicion.

Dua ta mbyll me kaq dhe të lë përgjigjen time këtu, sepse pas çdo rezultati negativ trajneri flet keq për mua në shtyp“.

Një verë plot polemika, me sulmuesin që ka pasur hatërmbetje me klubin vlonjat për pagat e vonuara, por gjithçka është zgjidhur mjaft mirë.

Tani braziliani, i kontaktuar nga “sportal.al”, Danilo flet për kthimin e tij në Vlorë dhe për ambiciet: “Jam i qetë, kam qenë gjithnjë i qetë, por tani jam i lumtur, sepse këtë javë do të bëj atë që dashuroj, të luaj futboll. Gjërat janë qartësuar dhe rregulluar, tani po i kthehem punës. Si gjithnjë, do të punoj fort dhe do të përqendrohem maksimalisht në arritjen e synimeve të klubit. Shpresoj të fitoj trofe me Flamurtarin këtë sezon, jam shumë optimist”.

Flamurtari është në Mavrovë, aty ku pritet edhe braziliani: “Po, të shtunën do të jem në Mavrovë. Pres me padurim të nis stërvitjen”.

“Kam ndjekur me vëmendje lëvizjet e klubit dhe më vjen mirë që janë afruar emra mjaft cilësorë. Trajneri ka ndërtuar një skuadër mjaft interesante, jam i bindur që do të jetë një sezon i shkëlqyer, thjesht duhet të punojmë fort dhe me ndihmën e tifozëve do të shkojmë shumë lart”.

Elton Nika

Danilo Alvesh do të rikthehet në Vlorë. Braziliani e ka konfirmuar diçka të tillë pas një kontakti me trajnerin Shpëtim Duro dhe do të jetë pranë skuadrës më 26 korrik, duke i dhënë zhvillime të reja “telenovelës” që vijon prej qershorit dhe që lidhet me të ardhmen e sulmuesit brazilian. Trajneri i Flamurtarit, Shpëtim Duro, ka konfirmuar për “Sport Ekspres” se lojtari ka komunikuar me vetë trajnerin, por edhe me klubin, se rikthimi i tij në Vlorë nuk do të jetë në datë më 19 korrik, por në datën 26, duke e lidhur gjithçka me një problem familjar. Kështu, ka marrë kthesë të rëndësishme e ardhmja e lojtarit, që tashmë dhe për sezonin e ardhshëm futbollistik do të jetë pjesë e Flamurtarit, duke respektuar kontratën që ka me vlonjatët deri në maj të vitit 2018. Drejtuesit dhe administratori Idrizi e kanë deklaruar disa herë se lojtari është likuiduar totalisht dhe se nuk ka një çështje financiare ndaj tij. Sulmuesi deklaronte nga Brazili se nuk kthehej në Vlorë, por në mes qëndronte edhe një kontratë që ai ka nënshkruar me Flamurtarin, çka nuk e lejonte të bënte asnjë lëvizje. Tashmë Alvesh do t’i bashkohet skuadrës në Mavrovë gjatë fazës përgatitore.

DURO – Trajneri Shpëtim Duro që dje nisi punën në krye të Flamurtarit për sezonin e ri dhe pritet shumë, pasi skuadra ka bërë disa lëvizje në merkato dhe bëhet fjalë për lojtarë cilësorë. Ekipi është ngritur bazuar në idetë e trajnerit Duro dhe tanimë duhen marrë frytet e punës në fushën blertë. “Ne startuam dje, por stërvitja fillon sot, kur edhe do të kryhen testet mjekësore. Gjatë tre ditëve që do të qëndrojmë në Vlorë, ne do të kryejmë nga një seancë stërvitore gjatë pasdites. Do të mungojë vetëm Alvesh, i cili vjen pas disa ditësh. Alvesh është i yni, ka një kontratë dhe kjo mbyll gjithçka, referuar asaj çfarë është thënë gjatë kësaj kohe. Ditët e para në Vlorë do të kryejmë nga një seancë stërvitore.

“Sezoni i ardhshëm? Tashmë fillimisht mendojmë vetëm të përgatitemi dhe të kryejmë stërvitje, pasi ka ende shumë kohë nga nisja e kampionatit. Jemi një skuadër me shumë ndryshime, megjithatë jam i mendimit se kemi bërë një merkato mjaft të mirë, megjithatë tani është ende shumë shpejt. Qëllimi mbetet përgatitja dhe të jemi gati kur të nisë kampionati”, është shprehur Duro për gazetën.

Elton Nika

Me Bakajn që për momentin synon një kampionat jashtë vendit dhe Danilo Alvesh që duket gjithmonë edhe më larg Flamurtarit, në Vlorë nuk kërkojnë të jenë të papërgatitur për një tjetër sulmues. Duket se do të jetë sërish i huaj lojtari i sulmit që pritet t’i bashkohet Flamurtarit në këtë merkato vere ,megjithatë janë disa pista që po studiohen me kujdes nga stafi teknik dhe drejtuesit e Flamurtarit.

Gjasat janë që afrimi në sulm të ndodhë gjatë kohës kur skuadra të jetë në fazë përgatitore, pasi tek Flamurtari nuk kërkojnë të nxitohen. Fillimisht do të pritet përgjigja përfundimtare nga Elis Bakaj, që pavarësisht faktit se nuk është arritur akordi me të, ka ende një shteg të hapur që lojtari të vishet kuqezi për sezonin e ardhshëm, gjithmonë nëse ky i fundit nuk largohet për të luajtur jashtë vendit.

Një tjetër fakt që bën vlonjatët të mos nxitohen lidhet edhe me të ardhmen e Danilo Alvesh, ndaj deri në datë 19 korrik, kur skuadra do të grumbullohet nuk do të ketë lëvizje të tjera në merkato. Pavarësisht deklaratave të brazilianit, në Vlorë e kanë shprehur disa herë se lojtari do të pritet te Flamurtari deri në ditën e parë të përgatitjeve dhe më pas do të shihet se si do të veprohet kundrejt tij. Nëse Alvesh nuk rikthehet, siç dhe janë të gjitha gjasat, çështa do të përfundojë në gjykatë. Atëherë vlonjatët do të hidhen sërish në sulm për Bakajn, sigurisht nëse do të jetë lojtar i lirë.

Ajo që është e qartë, ka të bëjë me faktin se vlonjatët nuk do të lëvizin për momentin në merkato, por burime nga klubi vlonjat kanë saktësuar se deri më tani ka patur kontakte me dy futbollistë  cilësorë, por emrat e tyre nuk zbulohen. Pra, duket se merkato e Flamurtarit për momentin është ndaluar, ndërsa në vijim do të ketë sërish të tjera zhvillime, të lidhura kryesisht me afrimin e një sulmuesi, fundit të menduar në këtë merkato vere dhe që është pikërisht sulmi, reparti ku edhe vetë trajner Shpëtim Duro ka deklaruar se duhet të plotësohet.

Braziliani më parë është shprehur se prej pesë muajsh nuk paguhet, ndërsa nga ana tjetër administratori Sinan Idrizi ka deklaruar për gazetën se në llogarinë e futbollistit ka kaluar çdo detyrim, pa përcaktuar se kur ka ndodhur kjo. Alvesh, i cili javën e shkuar pati një komunikim me gazetën, u shpreh se çështjen do ta çonte në FIFA, por aty nuk është marrë në shqyrtim, duke iu kërkuar që fillimisht të merret një vendim nga Federata Shqiptare e Futbollit.

Sulmuesi brazilian e ka ndarë mendjen për t’i shkuar deri në fund, duke qenë gati ta dërgojë çështjen edhe nën KAS nëse është nevoja. Alvesh erdhi te Flamurtari janarin e viti 2015 dhe ka edhe një vit kontratë me vlonjatët, që për ta lënë të lirë duan 500 mijë euro, shifër kjo e thënë publikisht nga administratori Idrizi. Sulmuesi 26-vjeçar numrin 45 ndeshje me skuadrën vlonjate dhe ka shënuar dhjetë gola. Ai nuk shquhet për golat e shënuar, por për hapësirat që krijon për shokët e skuadrës, duke vënë nën presion kundërshtarët në çdo moment. Ai konsiderohet si një lojtar i rëndësishëm për sezonin e ardhshëm, ndaj trajneri Duro e pret me krahët hapur.

Sulmuesi brazilian Danilo Alvesh ka postuar sot një letër të hapur ku në mënyrë të përmbledhur i jep lamtumirën Flamurtarit dhe Vlorës.

“Mbylla një sezon të vështirë dhe u përballa me shumë probleme, që më trishtuan. Njerëzit tani flasin për mua dhe harrojnë që 25 njerëz të tjerë punuan në mënyrë të jashtëzakonshme dhe meritojnë respekt. Nuk është koha të flitet për mua, por për të gjetur një zgjidhje për ata lojtarë që shpëtuan Flamurtarin nga rënia. Shokët e mi të skuadrës janë baballarë ose djem që punojnë shumë për të realizuar ëndrrat e tyre, duke kërkuar një të ardhme sa më të mirë, për vete dhe familjet. Njerëz, mos u shqetësoni për mua, por shqetësohuni për shokët e mi të skuadrës, ata kanë nevojë për një zgjidhje. Kam respekt për Vlorën dhe tifozët, ata na qëndruan gjithnjë pranë”.

Danilo mohon të ketë agjent, brazilian apo italian, ndërsa kërkon respekt për të dhe sidomos shokët e skuadrës në Vlorë, pas sezonit të vuajtur ku me zor u arrit mbijetesa. Braziliani tregon se ka marrë kërcënime javët e fundit dhe për këtë ka informuar ambasadën braziliane: “Dua të sqaroj se NUK KAM AGJENT, AS BRAZILIAN E AS ITALIAN. Nuk kam nevojë që ndokush të flasë në emrin tim. Dua të sqaroj disa fakte, sepse po punoj me ambasadën time dhe avokatët e mi në Brazil, rreth kërcënimeve që kam marrë në dy javët e fundit. Uroj që herët a vonë Shqipëria të çlirohet nga njerëz që nuk e duan zhvillimin e futbollit dhe që njollosin emrin e Shqipërisë në botë. E di që njerëzit do të më paragjykojnë dhe do të japin opinionet e tyre. Do doja të shihja si do vepronin ata në vendin tonë, as atyre që përjetuam sezonin e fundit. Uroj që të bëhet më mirë. Shqipëria do të mbetet në zemrën time, ashtu si shokët e mi të skuadrës dhe tifozët. Uroj që një ditë ta vizitoj Shqipërinë dhe të shoh që gjithçka ka ndryshuar”, shprehet Danilo, një sinjal i qartë se nuk ka ndërmend të kthehet më, edhe pse ka një kontratë edhe për një vit në Vlorë.

Italiani që përfaqëson sulmuesin brazilian është shprehur për “Sport Ekspres” se gjithçka për Danilon shkon më së miri dhe vetë ai e dëshiron qëndrimin te Flamurtari. Gjithashtu ai sqaron se nuk ka asnjë problem financiar mes klientit të tij dhe klubit vlonjat.

“Gjithçka shkon mirë. Nuk ekziston asnjë problem me Flamurtarin. Danilo po trajtohet shumë mirë në Vlorë, ndaj ka vendosur të qëndrojë te Flamurtari, jo vetëm sepse e detyron kontrata, por edhe sepse kjo është dëshira e tij. Kjo edhe për faktin se me shumë gjasa Flamurtari sezonin e ardhshëm do të luftojë për diçka të rëndësishme. Aludimet në media për paga të prapambetura? Asgjë e vërtetë”, ka thënë La Mana për gazetën, ndërkohë që kjo deklaratë me siguri do t’i qetësojë tifozët vlonjatë, që e kanë Alveshin një nga idhujt e tyre.

Për sulmuesin brazilian gjithçka shkon sipas planeve, pasi para se të largohej drejt Brazilit kishte kërkuar që Flamurtari këtë sezon të luftojë për vendet e larta në klasifikim dhe lëvizjet e deritanishme tregojnë se vlonjatët janë në rrugën e duhur.

“Nuk e kam menduar asnjëherë largimin nga Vlora. Te Flamurtari jam ndier gjithmonë i vlerësuar dhe kjo skuadër mbetet në zemrën time. Nuk ka dyshime se dua të vijoj këtu. Por pres që sezonin e ardhshëm të jemi një skuadër, që të pretendojmë gjëra të rëndësishme. Me atë çfarë po shoh këtë periudhë, jam i bindur se kështu do të ndodhë. Duhet të harrojmë çfarë sezoni lamë pas, ku luftuam deri në fund për të qëndruar në Superiore. E pra, kjo nuk duhet të ndodhë më dhe kështu shpresoj të jetë. Flamurtari duhet të jetë një nga skuadrat elitare në kampionatin shqiptar dhe besoj se do të jemi konkurrentë të fortë. Për këtë fakt nuk kam pse të mendoj largimin nga Flamurtari. Kam bindjen se kampionatin e ardhshëm do të jemi protagonistë. Jam ndier gjithmonë mirë në Vlorë dhe kjo është diçka e rëndësishme për një lojtar”, – është shprehur sulmuesi i Flamurtarit, Danilo Alvesh.

Sërish vuajtje, sërish luftë për qëndrim në Superiore, një turp për Flamurtarin dhe fatkeqësi për Vlorën.

Danilo e pranon dhe lëshon thirrjen, me një postim në Facebooj, ku kërkon ndryshim dhe nxjerrjen e leksioneve të duhura.

“Edhe një sezon për t’u harruar. Është turp që një skuadër si Flamurtari të luftojë për mbijetesë. Presidenti dhe drejtuesit duhet të analizojnë gjithçka ka ndodhur me klubin vitet e fundit, për të përmirësuar gjërat. Sepse jam tepër i lodhur me këtë betejë për mbijetesë, me 3 skuadra të tjera në javën e fundit. Dua të luftoj me skuadrat e kreut, për titull, pasi të gjithë në Vlorë duan të kujtojnë gjëra të mira, jo luftën për mbijetesë. Vlora meriton një titull, njerëzit e presin me padurim, tifozët sërish nuk na braktisën.

Të shpresojmë që nuk do të luftojmë më për mbijetesë dhe sezoni i ardhshëm të jetë ai i ndryshimit të madh.

Falënderoj tifozët, që më kanë mbështetur gjithnjë, që kur kam ardhur në Vlorë.

Kampionati shqiptar humbi një emër të madh si Tirana, le të shërbejë si shembull për klubet e tjerë të mëdhenj në të ardhmen”.