Daniele Nervi

Kukësit i vjen në ndihmë teknologjia, tani me risi në stërvitje

Sport Ekspres — Tue, 16 Oct 2018 19:36:27 +0000

Gjatë viteve të fundit teknologjia po merr një rol gjithmonë e më të madh në industrinë e futbollit. Thuajse të gjitha klubet elitare në Europë regjistrojnë të dhëna mbi rendimentin e lojtarëve në stërvitje fale jelekëve të pajisur me çipe speciale që masin rrahjet e zemrës dhe distancën e përshkruar të secilit lojtar.

Ekipi i parë që vjen me këtë risi në Shqipëri është Kukësi. Me anë të një postimi në “Facebook” klubi ka njoftuar mbi përdorimin e këtyre pajisjeve që janë diçka e zakonshme nëpër kampionatet e zhvilluara në Europë dhe më gjerë.

Njeriu pas kësaj ideje është përgatitësi atletik Daniele Nervi. Italiani, i cili më parë ka punuar te Vllaznia, shquhet mbi ekspertizën e tij në këtë lloj fushe dhe pritet që kjo lloj mënyre e të stërviturit të jetë e përjavshme në kampin kuksian.

Vjen momenti i zyrtarizimit, një italian te Kukësi

Sport Ekspres — Tue, 02 Oct 2018 11:57:03 +0000

Prej ditësh i është bashkuar skuadrës së Kukësit, por zyrtarizimi ka ardhur vetëm sot. Daniele Nervi, përgatitësi atletik që në të shkuarën ka qenë pjesë e Vllaznisë, do të jetë pjesë e stafit të Armando Cungut.

Klubi verilindorë, përmes një postimi në faqen zyrtare në “Facebook” e ka njoftuar diccka të tillë. “Në kuadër të objektivave dhe të një ekipi modern, afrohet një profesionist tjetër në stafin e Kukësit! Klubi i FK Kukësit ka nënshkruar një kontratë njëvjeçare me përgatitësin e njohur atletik, Daniele Nervi. Përgatitësi italian ka punuar edhe në të kaluarën e tij në Shqipëri, me ekipin e Vllaznisë dhe eksperienca që mbart mbi shpatulla, është padyshim një vlerë e shtuar për klubin tonë. FK Kukësi i uron suksese në sfidën e re”, shkruhet në njoftimin e Kukësit.

Pak kohë më parë presidenti Safet Gjici bëri një tjetër lëvizje, teksa afroi në ekipi edhe Ramadan Ndreun. Ish-trajneri, i cili ka qenë në të shkuarën edhe drejtor teknik, u emërua Drejtor Menaxhimi dhe praktikisht është numri dy i klubit të Kukësit.

Kukësi shton stafin, rikthen në Superiore një italian

Sport Ekspres — Tue, 25 Sep 2018 15:16:34 +0000

Kukësi i këtij sezoni është një ndër skuadrat me kontingjentin më të plotë në Kategorinë Superiore. Por, presidenti Gjici nuk ka lënë pa harruar dhe stafin teknik. Sipas asaj që raporton “Telesport”, në stërvitjen e sotme të verilindorëve ka qenë i pranishëm dhe përgatitësi i ri atletik.

Bëhet fjalë për ish-përgatitësin atletik të Vllaznisë, Daniele Nervi. Eksperienca e parë e italianit në Shqipëri zgjati më pak se tetë muaj, por aq mjaftuan që ai të linte përshtypje nga më të mirat me punën e tij te skuadra shkodrane.

Nervi kur ishte pjesë e Vllaznisë në vitin 2014

Nervi do të jetë ndihmësi i tretë i trajnerit i Armando Cungut, krahas zëvendës-trajnerit Rrahman Hallaci dhe trajnerit të portierëve Ermal Nexhipi.