VIDEO: Gafa e Çupo-Moting, me “slow motion” edhe më skandaloze

Sport Ekspres — Fri, 12 Apr 2019 08:20:27 +0000

Erik Maksim Çupo-Moting është në qendër të vëmendjes në rrjetet sociale, pasi sulmuesi i PSG-së bëri gafën më të rëndë të këtij sezoni deri më tani. Një top i cili po shkonte drejt rrjetës ndalohet në vijën fatale nga Moting, i cili i mohoi golin skuadrës së tij.

30-vjeçari bëri “mbrojtësin” për ekipin kundërshtar dhe ky veprim i tij është tallur shumë në rrjetet sociale, sidomos në “Twitter”, aty ku ka shpërthyer ironia dhe kritikat ndaj tij. Sot, video virale është bërë i njëjti rast, por me pamje të ngadalësuara, çka e bëjnë edhe më të pakuptueshëm veprimin e sulmuesit të PSG-së.

The slow-mo camera angles don’t do Choupo-Moting any favours ? pic.twitter.com/jkX0VxFgJN

— Premier League Panel (@PremLeaguePanel) April 7, 2019

Surpriza Çupo-Moting, asi nën mëngë i Tomas Tuhel

Sport Ekspres — Tue, 25 Sep 2018 20:06:50 +0000

Tifozët e PSG janë mësuar të presin yje të mëdhenj që zbarkojnë në Paris, ndërsa mbeten paksa të befasuar kur klubi përforcoi repartin e sulmit me Erik Maksim Çupo Moting, i cili erdhi me parametra zero nga ekipi i Stok Sitit. Ai ishte goditja e tretë e klubit francez, pas afrimit të Bufon dhe gjermanit Kehrer.

Trajneri Tuhel, i cili ka punuar me Çupo-Moting tek ekipi i Maincit, u shpreh me këto fjalë gjatë prezantimit të 29-vjeçarit. “Është një futbollist, i cili di të jetë deçiziv, kur niset nga pankina.” Lojtari, i cili ka lindur në Gjermani, por aktivizohet me kombëtaren e origjinës së tij, Kamerunin, ka ardhur të zëvendësojë Kavanin dhe po fillon të japë frytet e tij.

Sulmuesi debutoi në Champions kundër Liverpulit dhe me hyrjen e tij në lojë, PSG gjeti barazimin e përkohshëm me golin e Kilian Mbape. Në fundjavë, Çupo-Moting e nisi prapë nga pankina ndeshjen kundër Rene, duke zëvendësuar Verratin. Ai gjeti golin e parë personal dhe të tretin për ekipin, duke vulosur fitoren e PSG. Lojtari ndihet i lumtur

“Ndihem mirë te PSG dhe të gjithë më kanë pritur mirë. Pak skepticizëm është normale dhe më duhet ta pranoj, sepse te PSG priten të vijnë lojtarë të mëdhenj. I njoh mirë cilësitë e mia dhe e di se mund t’i jap një dorë ekipit”, komenton Çupo-Moting duke buzëqeshur. Ai e di mirë se duhet punojë fort dhe të jetë gjithmonë gati, kur Tuhel ta thërrasë në detyrë.