U shpërfytyruan 20-0, zbardhet dënimi për skuadrën italiane

Sport Ekspres — Mon, 18 Feb 2019 16:57:33 +0000

Pro Piaçenza, skuadër që militon në Serie C, bëri xhiron e Botës një ditë më parë, teksa u shkatërrua 20-0 nga ekipi i Kuneos. Në atë ndeshje, Pro Piaçenza luajti me vetëm 7 futbollistë në fushën e lojës, por jo vetëm kaq, pasi një nga lojtarët u mësua se ishte fizioterapist.

Lidhur me këtë takim, i cili u quajt si një njollë për futbollin italian sipas presidentit të federatës, Gravina, është marrë vendimi. Komisioni i Disiplinës (Giudice Sportivo) ka marrë vendimin për Pro Piaçenzën, ku dënimi i dhënë është mjaft i ashpër.

Përjashtim i menjëhershëm nga gara (Serie C), humbje në tavolinë 3-0 përballë Kuneos dhe humbje në tavolinë 3-0 në të gjitha ndeshjet e mëparshme të këtij sezoni. Gjithashtu, klubi është dënuar edhe me 20 mijë euro gjobë. Këto dënime, pritet të çojnë skuadrën e Pro Piaçenzës drejt shkrirjes si klub.

20 gola me 7 adoleshentë në fushë, skandaloze ç’ka ndodhur në Itali!

Sport Ekspres — Sun, 17 Feb 2019 17:10:45 +0000

Futbolli nuk rresht kurrë së surprizuari, por në divizionin e tretë të futbollit italian është regjistruar një rezultat i pabesueshëm gjatë ditës së sotme. Kuneo ka mposhtur ekipin e Pro Piaçenzës me rezultatin 20-0!

Miqtë renditen në vendin e fundit dhe nuk zhvillonin një ndeshje zyrtare që nga 30 dhjetori i vitit të kaluar. Pro Piaçenza ndodhet në krizë prej kohësh dhe drejtuesit e klubit nuk kanë paguar rrogat e lojtarëve që në fillim të sezonit.

Federata i ka detyruar të zbresin sot në fushë (në të kundërt do i priste skualifikimi nga kampionati), aty ku janë paraqitur me vetëm 7 lojtarë (të gjithë të moshës 16-19 vjeç), pa stafin teknik, ndërsa rolin e trajnerit dhe kapitenit të ekipit e ka kryer një… 18-vjeçar!

Vendasit kanë zbritur në fushën e blertë me formacionin e tyre më të mirë, ndërsa miqtë e kanë nisur sfidën me vetëm 7 futbollistë! Rregullorja e lejon një gjë të tillë, pasi një skuadër mund të zbresë në fushën e blertë me minimalisht 7 lojtarë.

Në minutën e 60-të në fushë për Pro Piaçenzën është futur dhe Isufi, i cili ishte programuar të luante si titullar, por nuk kishte asnjë mjet identifikimi me vete. Lojtarit i ka ardhur në ndihmë i ati që ka sjellë mjetin e identifikimit dhe Isufi është futur në fushë në vend të Piçiarelit, masazhatorit të ekipit. Ky i fundit ishte detyruar të zbriste në fushë si titullar për t’i lënë postin më pas Isufit.

Kanis ka qenë golashënuesi i Cuneos me tetë gola të shënuar, ndërsa Gabriele Gravina është prononcuar për këtë ndeshje të turpshme. Presidenti i FIGC (Federata italiane e futbollit)

“Ajo që ka ndodhur sot është një fyerje për sportin dhe parimet themelore të tij. Në këtë situatë surreale, Federata kishte për detyrë të zbatonte rregulloren dhe e ka ushtruar këtë rol. Përgjegjësia jonë është që të mbrojë pasionin e tifozëve, sipërmarrësit e shëndoshë dhe kredibilitetin e kampionatit tonë. Ajo që pamë sot të gjithë do të jetë farsa e fundit”, përfundon Gravina.