Costacurta

“Jam dakord me Kapelon dhe Ançelotin, te Juve duhej revolucion”

Sport Ekspres — Fri, 17 May 2019 16:11:35 +0000

Maks Alegri dhe Juventusi u ndanë ditën e sotme dhe ish-futbollisti i Milanit, Alesandro Kostakurta, reagoi menjëherë. Për “SkyItalia”, Kostakurta u shpreh: “Në dy ose tre javët e fundit, Juventusi e kuptoi se duhet një trajner tjetër për të ardhmen. Palët dukeshin të ndara që pas eliminimit në Champions League.

“Jam dakord me Kapelon dhe Ançelotin, të cilët janë të mendimit se pas 4-5 vitesh, skuadrat kanë nevojë për revolucion, si në lojtarë, ashtu dhe te stafi teknik”, u shpreh ish-mbrojtësi. Juventusi deklaroi më herë sot se Alegri nuk do të jetë më trajner dhe se shumë skuadra të tjera kërkojnë shërbimet e tij.

Kostakurta: Bakajoko bëri të mbushej kupa, Romanjoli po gabon gjithnjë!

Sport Ekspres — Thu, 02 May 2019 08:48:49 +0000

Milani po kalon padyshim një ndër momentet më të errët të sezonit, me kuqezinjtë që renditen në vendin e shtatë, me shpersat për Champions që po shuhen nga java në javë.

Së fundmi, Bakajoko u vonua për në stërvitje, ndërsa trajneri Gatuzo vendosi të ndëshkonte të gjithë ekipin, duke i mbajtur të grumbulluar deri në sfidën ndaj Bolonjës. Lidhur me gjendjen e kuqezinjve, ka folur një legjendë si Billi Kostakurta, i cili është ndalur edhe te Romanjoli, të cilin e ka kritikuar ashpër.

BAKAJOKO – “Skuadra duhet shkundur në ndonjë mënyrë, në stërvitje, në fushë apo në grumbullim të detyruar. Besoj se vonesa e Bakajokos ka qenë pika që ka bërë të derdhet gota, sepse një vonesë mund të ndodhë, edhe pse nuk ishte hera e parë.

Duhej një shkundje, paraqitjet e skuadrës kohët e fundit kanë qenë mediokre. Bakajoko ishte thjesht justifikimi, sepse besoj se Gatuzo kishte kohë që mendonte se duhej bërë diçka. Gjeste të tilla mund të nevojiten, por duhet gjetur mënyra dhe momenti i duhur. Duhet edhe autoritet”.

ROMANJOLI – “E mori atë karton të kuq si pasojë e gjithë protestave. Një kapiten i Milanit nuk mund të protestojë në atë mënyrë, gjithmonë. Nuk është e mundur, Romanjoli është një djalë inteligjent dhe nuk mund të bëjë gafa të tilla”.

“Po të fliste si Uanda Nara, do e përzija gruan”, sqarim dhe ndjesë nga Kostakurta

Sport Ekspres — Wed, 20 Feb 2019 14:32:18 +0000

Alesandro Kostakurta, i njohur nga tifozët si Billi Kostakurta, ka përfunduar nën akuzë së fundmi për shkak të një fraze të shkëputur gjatë një diskutimi në “Sky”. Ai shfaqet duke thënë një fjali që është konsideruar seksiste dhe debatet kanë qenë të shumta.

“Nëse gruaja ime do të thoshte ato gjëra që ka thënë Uanda, do e përzija nga shtëpia”, është ajo çka ka thënë zyrtari i Federatës Italiane të Futbollit Gjithsesi, ish-mbrojtësi i Milanit ka kërkuar ndjesë për situatën e krijuar. Kostakurta ka sqaruar gjithçka në një intervistë për Corriere della Sera.

“Nuk e mohoj atë që kam thënë. Ishte një frazë e vetme brenda një diskutimi më të gjerë mes kolegëve mbi rolin e Uanda Nara. Prokuratorët (meshkuj) të Zanetit, Bergomit, Maldinit apo Del Pieros ju siguroj që nuk do ia lejonin kurrë vetes të lëshonin deklarata si ato të Uanda Narës. Kam kritikuar prokuratoren Uanda Nara, pavarësisht gjinisë. I gjithë diskutimi sillej në këtë linjë”, ka deklaruar ish-milanisti.

Shprehja “do e përzë nga shtëpia” nuk ka qenë e duhura dhe Billi e pranon: “Jam dakord, kam gabuar dhe kërkoj falje. Një frazë të tillë nuk do ta dëgjoni më kurrë. Dua të jemi qartë: i dua femrat në futboll. Puna ime në Federatë e dëshmon diçka të tillë. Patricia Paniko tek ekipi U15 e kam propozuar unë. Nuk pretendoj se jam në pararojë, por diçka të vogël e kam bërë. Çfarë më ka thënë gruaja kur e ka parë videon? Mendoj se e ke dreqosur Billi”.