cordeiro

Uilliam: Debutimi në Champions special, shfrytëzojmë faktorin fushë

Sport Ekspres — Wed, 10 Jul 2019 10:35:30 +0000

Uilliam Kordeiro Melo la skuadrën e Kukësit për t’iu bashkuar projektit të Partizanit. Futbollisti i “demave” pritet të debutojë me kryeqytetasit në takimin e sotëm ndaj azerëve të Karabak, ndeshje kjo e vlefshme për raundin e parë eliminator të Champions League.

Braziliani ka dhënë një prononcim për portalin “gazetaonline.com.br”, ku ka folur mbi takimin e sotëm. Sipas 25-vjeçarit faktori fushë do të jetë i rëndësishëm për të kuqtë. “Të debutosh në ndeshjet e Champions League është një rast shumë special. Jam shumë i motivuar, ashtu si pjesa tjetër e skuadrës së Partizanit.

Kemi bërë një fazë përgatitore shumë të mirë për këtë ndeshje. E dimë që Karabak është një kundërshtar shumë i fortë. Kemi si qëllim që të shfrytëzojmë faktorin fushë. Duhet të marrim një rezultat pozitiv, në mënyrë që të shkojmë në Azerbajxhan me një situatë sa më komode”, ka deklaruar braziliani.

Kukësi i Ndreut, ide të reja dhe rikthime të rëndësishme

Sport Ekspres — Thu, 21 Mar 2019 20:28:54 +0000

Kukësi do ta mbyllë sezonin me një trajner të ri në krye të pankinës. Armando Cungu nuk është më trajner i verilindorëve, që tashmë do të drejtohen nga Ramadan Ndreu. Ndryshimet kanë filluar menjëherë, që nga kohëzgjatja e seancave stërvitore, deri te formacioni me të cilin Kukësi pritet të luajë.

Ndreu do të debutojë kundër Partizanit në kampionat, një sfidë që mund të vendosë dhe titullin kampion. Një debutim aspak i lehtë për Ndreun, por për teknikun ka lajme të mira. Siç mëson “SportEkspres.com”, te Kukësi ka rikthime të rëndësishme. Cuculi, Rrumbullaku dhe Uilliam Kordeiro do të jenë të gatshëm në ndeshjen kundër “Demave”.

Megjithatë, kapiteni Shameti është ai që shqetëson, me mbrojtësin gjirokastrit që pritet të mungojë për 3 javët e ardhshme. Titulli kampion është një objektiv ende i arritshëm për verilindorët, por nuk duhet të bëjnë më hapa fals, duke filluar që nga ndeshja kundër Partizanit.

MOVIOLA | Ndeshja e çmendur në Durrës, sa shumë pretendime (VIDEO)

Sport Ekspres — Fri, 15 Feb 2019 20:07:07 +0000

Ndeshja mes Teutës dhe Kukësit, e vlefshme për javën e 22-të të Superiores, dhuroi spektakël dhe gola, si dhe mund të konsiderohet si një nga sfidat më të bukura të këtij sezoni. Që në minutën e parë, deri në sekondat e fundit, ndeshja ishte shumë e luftuar dhe pati polemika të shumta.

Fillimisht, ishte skuadra e Kukësit që pretendoi për një penallti. Braziliani Kordeiro depërton nga e majta dhe ndalohet nga Frashëri, që sipas gjyqtarit, ishte një ndërhyrje e rregullt. Të gjithë lojtarët e Kukësit protestojnë, por ndeshja vazhdon.

Episodi i dytë i takon Teutës. Kamara bën gjithçka mirë dhe lë pas Maliqin. Mesfushori Dzaria ndërhyn për ta ndalur dhe sulmuesi i Teutës rrëzohet brenda zonës. Të gjithë sytë nga gjyqtari, i cili sërish e cilëson një ndërhyrje të rregullt.

Dy penallti të paakorduara dhe në momentin më kritik të ndeshjes, gjyqtari drejton gishtin nga pika e bardhë. Në minutën e 90+3’ të takimit, Osmani ndal me dorë një goditje të një prej lojtarëve të Kukësit. Për kryesorin Xhaja, penallti dhe karton i kuq për mbrojtësin e Teutës. Kukësi pati mundësinë të marrë një pikë nga kjo sfidë, por Hidi ndali brazilianin Kordeiro dhe Teuta triumfoi 2-1 në fund, duke marrë tri pikë shumë të rëndësishme.