Partizani është pa trajner, skuadra do të pushojë deri në gusht dhe Luçiano Moxhi ende nuk dihet se çfarë lojtarësh ka piketuar.

Një prej tyre, ish-sulmuesi i Milanit Mateo Kinelato, ka pritur gjatë javët e fundit, ka studiuar ofertat dhe tashmë ka firmosur për Padovan, duke u prezantuar zyrtarisht.

Sulmuesi 25-vjeçar shënoi 13 gola sezonin e fundit te Komo dhe 12 gola një vit më parë te Kuneo, ku ishte i huazuar nga Milani, ndaj këtë verë kishte oferta nga shumë klube.

Tani ai ka zgjedhur Padovan, duke parë edhe pasivitetin e Partizanit dhe faktin që në Serinë B Peskara nuk i garantonte vendin në formacion.

Pas prezantimit, Kinelato tha ndër të tjera: “Jam i lumtur që kam firmosur për këtë klub me histori. Kisha mundësi të tjera, në kategori superiore, por zgjodha Padovan, që e konsideroj zgjidhjen më të mirë për mua. Doja një zgjidhje të shpejtë dhe ramë dakord menjëherë, jam i lumtur. Pas 5 vitesh në pronësi të Milanit, duke qenë gjithnjë i huazuar nëpër Itali, mendoj se jam gati për të tentuar ngjitjen në B me Padovën dhe e shoh këtë skuadër si trampolinën e duhur për mua. Vitin e shkuar shënova shumë, edhe pse luanim me sistem mbrojtës 3-5-2, ndërsa në Padova do të luajmë një futboll më sulmues”.

Eraldo Harlicaj

Ku është Moxhi? Çfarë po bën Moxhi? Pyetje të tilla kanë qenë shumë prezente ditët e fundit pas eliminimit të Partizanit nga Europa League, por duket se tashmë italiani ka nisur të lëvizë. Ndoshta gabimi i tij është se kërkon shumë lart, por duket se e ka vendosur të sjellë një superlojtar në Shqipëri.

Burime të klubit të kuq për “Sport Ekspres” kanë bërë të ditur se emri i fundit që është shfaqur në listën e italianit është Mateo Kinelato. Sulmuesi italian do të ishte një lëvizje mjaft e gjetur dhe mund të shihet si zëvendësuesi ideal i Ekubanit, ndryshimi i vetëm, italiani ka përvojën në kombëtare më shumë se ganezi. Kinelato ka mbyllur sezonin e fundit me Komon dhe pas falimentit të klubit italian ka dalë si lojtar i lirë. Moxhi si “ujk” i vjetër kërkon të shfrytëzojë rastin dhe ta bindë të vijë në Shqipëri edhe pse konkurrenca është e ashpër.

TRATAVITAT – Drejtori i Përgjithshëm e pëlqen shumë sulmuesin 25-vjeçar. CV-ja e tij e pasur, por edhe të dhënat mjaft të mira bëjnë të besosh se në Shqipëri do të bënte diferencën. Italiani menjëherë është futur në bisedime me lojtarin dhe menaxherin e tij dhe i ka prezantuar ekipin e Partizanit. Për momentin bëhet fjalë vetëm për bisedime paraprake dhe shprehje interesi, pasi nuk ka asgjë konkrete, por në kampin e kuq shpresojnë ta bindin ish-sulmuesin e Milanit dhe të Komos.

5 VJET I MILANIT – Afrimi i tij në Shqipëri do të bënte që të ishte sulmuesi me CV-në më të pasur që ka mbërritur në vendin tonë. Kinelato është 25 vjeç dhe në kulmin e karrierës. Ai është i gjatë 188 cm. Sezonin e fundit e ka mbyllur me Komon ku ka qenë edhe titullar. Ka luajtur në 36 ndeshje dhe ka shënuar 12 gola. Të njëjtën shifër që ka shënuar edhe në edicionin 2015-2016 përsëri në ekipin e Kuneos. Kartoni i tij deri në verën e vitit të kaluar ka qenë në pronësi të Milanit. Pas mbarimit të kontratës me të kuqtë kaloi te Komo.

Kinelato ka provuar shumë ekipe dhe eksperienca në karrierën e tij, pasi ka qenë shumicën e kohës i huazuar. Asnjë ndeshje me Milanin. 25 vjeçari ka qenë edhe pjesë e kombëtares së Italisë për moshën deri në 20 vjeç. Ka luajtur 1 ndeshje pa gjetur rrugën e rrjetës, në karrierën e tij rendit edhe ekipe si Fiorentina, Xhenoa, Rexhina, Suditirol, etj.

MUNDËSITË – Afrimi i tij me Partizanin është mjaft i vështirë, pasi ka edhe konkurrencë të madhe. Ekipi i Peskarës por e monitoron, po ashtu Padova dhe Viçenza. Në garë për shërbimet e tij është edhe Partizani që penalizohet nga forca e kampionatit dhe paragjykimi i Superligës, por i sigurt është fakti që ka njeriun më të “fortë” se gjithë të tjerët në bisedime. Mbetet të shihet se çfarë do të ndodhë mes palëve.