Celta Vigo

Bajern piketon një spanjoll, do i paguajë klauzolën

Sport Ekspres — Thu, 18 Jul 2019 16:40:24 +0000

Bajernit i duhet dy lojtarë cilësorë krahu, ndërkohë që ka fuqi financiare të marrë vetëm një emër të madh dhe një talent të ri. Këtë të fundit e ka gjetur dhe po pregatit planin e “rrëmbimit”. Brais Mendez është i riu që ka rrëmbyer zemrat e drejtuesve bavarezë.
22-vjeçari aktivizohet me Selta Vigon në La Liga. Titullar i padiskutueshëm te spanjollët dhe autor i 6 golave dhe 7 asisteve në La Liga sezonin e shkuar. Kaq mjaftojnë për të bindur Bajernin ta marrë pa lejen e skuadrës së tij.

Rumenige është gati të paguajë klauzolën e largimit të Mendez. 25 milionë euro është vlera që ka vendosur klubi i tij aktual për ta lënë të lirë pa kushte. Shumë që nuk e kanë aspak problem në “Allianz Arena” dhe në ditët në vijim pritet që lojtari të vijë në Mynih.

Uest Hem gati për blerjen historike, sulmuesi zhduket në male!

Sport Ekspres — Wed, 10 Jul 2019 12:22:28 +0000

Maksimiliano Gomez është një nga pikat më të forta të Selta Vigos. Sulmuesi uruguaian ka një kontratë me klubin galician deri në vitin 2022, por ai mund të transferohet në Premier Ligë.

Uest Hemi dhe Valencia interesohen për shërbimet e tij. Anglezët ofrojnë më shumë (rreth 45 milionë euro, rekord i “çekiçëve”), por Celta kërkon 50 milionë euro, që është edhe çmimi i klauzolës së 22-vjeçarit, i cili shënoi 13 gola sezonin e kaluar.

Por ka një problem. Super Deporte raporton se Gomez ka humbur në Uruguai! Sulmuesi është zhdukur në malet e vendit të tij, aty ku ka qenë duke kaluar pushimet.

Gara për shërbimet e Gomez është e fortë, por në fillim duhet gjetur ai. Selta Vigo shpreson të përfitojë sa më shumë nga lojtari, i cili ka shënuar 2 gola në 12 ndeshje të luajtura me kombëtaren e tij.

Mesfushori rikthehet në vendlindje, Barcelona arkëton 16 milionë euro

Sport Ekspres — Sun, 30 Jun 2019 21:27:42 +0000

Barcelona ka njoftuar shitjen e mesfushorit Denis Suarez. Futbollisti spanjoll është transferuar te klubi i fëmijërisë së tij Selta Vigo për shumën e 16 milionë eurove së bashku me bonuset.

25-vjeçari nuk arriti të merrte minuta të mjaftueshme të kampionët e Spanjës, duke mos përballuar konkurrencën e madhe. Sezoni i fundit ishte ndoshta më i vështiri i karrierës së tij, teksa një huazim në Angli te Arsenal shkoi së mos më keq për shkak të një dëmtimi.

Agreement with @RCCelta for the transfer of @DenisSuarez6
More info: https://t.co/pxqpnXZafv pic.twitter.com/pAR7S4mRPB

— FC Barcelona (@FCBarcelona) June 30, 2019

Suarez rikthehet në vendlindje nëntë vite pasi u largua nga Selta kur ishte vetëm 16 vjeç

Një shqiptar pranë largimit, Lacio po mendon huazimin

Sport Ekspres — Tue, 15 Jan 2019 21:09:12 +0000

Valon Berisha dhe Riza Durmishi ishin dy ndër goditjet e Igli Tares në merkaton e verës. Drejtori sportiv i Lacios ofroi dy shqiptarët në ekip, por aventura e tyre nuk po shkon mirë. Të dy lojtarët kanë pësuar dëmtime dhe nuk po arrijnë të bindin Inzagin t’i përfshijë si titullarë.

Tare pagoi 6.5 milionë euro te Betisi për të siguruar shërbimet e Durmishit, por 25-vjeçari, i cili numëron 466 minuta aktivizim me bardhekaltrit, është pranë rikthimit në kampionatin spanjoll. Mediat italiane flasin për një huazim të anësorit të majtë tek ekipi i Selta Vigos.

Riza Durmishi

Lojtari i përfaqësueses së Danimarkës, me të cilët ka zhvilluar 23 ndeshje, do të kalojë te Selta gjashtë muaj huazim, ndërsa mbetet për t’u përcaktuar nëse ekipi spanjoll do të zotërojë të drejtën e blerjes së lojtarit në fund të sezonit, apo do të jetë thjeshtë një huazim.

VIDEO | Gafa e vitit, trajneri i ri i Seltës falënderon rivalët gabimisht

Sport Ekspres — Tue, 13 Nov 2018 18:20:28 +0000

Selta Vigo zyrtarizoi shkarkimin e trajnerit të saj pas humbjes ndaj Realit të Madridit në fundjavë. Ditën e sotme drejtuesit e klubit spanjoll prezantuan trajnerin e ri, i cili është Migel Kardozo. Portugezi, së fundmi ishte në krye të francezëve të Nantës, por nuk pati rezultatet e duhura dhe u largua.

Në prezantimin e sotëm, tekniku portugez ka bërë një gafë të pafalshme, teksa ka dashur të falenderoj Seltën për mundësinë e dhënë, gabimisht ka falënderuar Deportivo La Korunjën. Portugezi citoi se falënderonte Real Klub Deportivon, kur ndërkohë duhej të thoshte, Real Klub Seltën.

Pavarësisht se Kardozo e kuptoi gabimin e bërë, tashmë ishte tepër vonë. Një gjest që vuri mjaft në siklet dhe presidentin e klubit të Seltës, i cili ishte krah trajnerit të ri, që me sa duket e nisi me “këmbën e mbarë” aventurën e tij të re.

Miguel Cardoso nós sabemos que não foi por mal, mas digamos que trocar o nome do clube por o de um eterno rival não é propriamente a melhor forma de começar… ?pic.twitter.com/jeeKKmnSTG

— Remate Digital (@Remate_Digital) November 13, 2018

PSG-Totenhem, duel për mesfushorin e Selta Vigos

Sport Ekspres — Thu, 20 Sep 2018 11:23:34 +0000

Stanislav Lobotka është gati të transferohet në një klub të madh. Mesfushori sllovak ka oferta të rëndësishme dhe në janar Selta Vigo mund të përfitojë nga shitja e futbollistit 23-vjeçar. I blerë vjet nga Nordsalland në Norvegji për shumën e 5 milionë eurove, tanimë lojtari në fjalë kushton disa herë më shumë.

Në La Liga një vit më parë u aktivizua në 38 ndeshje, nga të cilat 34 i nisi nga minuta e parë. Mesfushori me tipare mbrojtëse ka kontratë deri në vitin 2023, por nëse PSG e do një futbollist, atëherë asgjë nuk është e pamundur.

Por nuk janë vetëm francezët që interesohen për lojtarin e Seltës. Totenhemi gjithashtu interesohet për Lobotka dhe e duan që në janar.

Video | Atletiko turpërohet në Vigo, Selta nuk e lë të shikojë portën

Sport Ekspres — Sat, 01 Sep 2018 18:33:59 +0000

Diego Simeone ka shtatë vite që është trajneri i Atletiko Madridit, por deri më sot argjentinasit nuk i kishte ndodhur që skuadra e tij të mos arrinte të gjuante të paktën njëherë në portën e kundërshtarit. Çudia e madhe ndodhi sot. Grizman & Co. dukeshin si lojtarë krejtësisht të tjerë nga ata që mundën Realin në finalen e Superkupës së Europës pak javë më parë.

Pjesa e parë rezultoi e ekuilibruar nga të dyja palët, që mbajtën portat e paprekura por e dyta ishte një histori krejt tjetër. Selta gjen avantazhin shumë shpejt me anë të sulmuesit të talentuar Maksimilano Gomez. Pak minuta më vonë Iago Aspas dyfishon avantazhin e vendasve dhe morali i madrilenëve bie përtokë.

Kartoni i kuq i Stevan Saviç në minutën e 70-të i vë kapak takimit. Statistika në fund të 90-minutëshit është e frikshme. 10 gjuajte, por asnjë në kuadratin e Seltës. Simeone do i duhet të reflektojë shumë mbi këtë takim që me siguri dhemb shumë.

Konkurrencë për Benzeman, Reali në dilemë midis dy spanjollëve

Sport Ekspres — Thu, 23 Aug 2018 12:07:47 +0000

Karim Benzema do të jetë sulmuesi kryesor i Realit për sezonin që sapo ka nisur. Kampionët e Champions-it nuk mundën të siguronin shërbimet e Levandovskit, pavarësisht se i luajtën të gjitha kartat e mundshme.

Por, merkato në sulm nuk është mbyllur, pasi Lopetegui kërkon të ketë në dispozicion një sulmues tjetër për t’i bërë konkurrencë francezit. Sipas së përditshmes sportive “AS”, madrilenët janë në negociata me Rodrigo Morenon dhe Iago Aspasin.

Rodrigo, shënoi 16 gola sezonin e shkuar me Valencian, si dhe është një njohje e vjetër e Lopeteguit, pasi kanë punuar sëbashku kur tekniku bask ishte trajneri i shpresave të Spanjës. 30-vjeçari Aspas, i cili është plani B në rast se negociatat me Rodrigon dështonë, zhvilloi një sezon akoma më të mirë me 22 finalizime, vetëm Suarez, Ronaldo dhe Mesi shënuan më shumë se ai, por mosha e madhe e tij është një disavantazh për të.