UEFA e bën zyrtare, në vitin 2021 nis një turne i tretë

Sport Ekspres — Sun, 02 Dec 2018 21:50:11 +0000

Presidenti i UEFA-s, Aleksandr Ceferin, ka lajmëruar sot krijimin e një turneu të ri për klubet europiane. Kompeticioni më i ri do të fillojë në vitin 2021 dhe mban emrin provizor “UEL2”. Në turneun risi do të marrin pjesë 32 skuadra të ndara në 8 grupe me nga katër skuadra.

Kreu i UEFA-s tha se ky vendim erdhi si pasojë e kërkesave të vazhdueshme të klubeve për përfaqësim më të madh në arenën evropiane. Ndeshjet e “UEL2” do të luhen në ditën e enjte dhe fituesi i trofeut do të fitojë të drejtën e kualifikimit direkt në “Europa League”.

Falë këtij kampionati të ri skuadra nga kampionatet e vogla do të kenë mundësi të tregojnë veten në arenën evropiane. Një tjetër ndryshim që do të vijë prej këtij turneu do të jetë ulja e numrit të skuadrave në “Europa League” nga 48 që është aktualisht në 32.

FIFA dhe UEFA në luftë, Infantino projekton Botërorin e ri të klubeve

Sport Ekspres — Tue, 23 Oct 2018 19:11:15 +0000

Presidenti i FIFA-s, Xhani Infantino, ka paraqitur një propozim që shihet me mjaft potencial dhe duket shumë fitimprurës. Ky propozim konsiston në riformatimin e Kupës së Botës për klube, duke përfshirë ekipe nga ligat më të forta dhe do të luhet çdo sezon. UEFA kuptohet se kundërshton ashpër këtë propozim, i cili do të shqyrtohet në mbledhjen e Këshillit të FIFA-s në Ruanda, ditën e mërkurë. Organi qeverisës i futbollit evropian do të konsiderojë çdo plan për një turne vjetor klubesh, si një sfidë e drejtpërdrejtë për “UEFA Champions League”.

Uefa dhe Shoqata e Klubeve Europiane ishin shumë kritikë ndaj propozimeve të FIFA në fillim të këtij viti për të rikonfiguruar Botërorin e klubeve. Duke folur në atë kohë, Infantino tha se kishte investitorë, të cilët kurrë nuk ishin identifikuar, të gatshëm të paguajnë 12 miliardë dollarë për katër turne çdo katër vjet, duke nisur nga viti 2021. Pavarësisht se nuk është asgjë zyrtare, thuhet se një pjesë e madhe e parave vjen nga Arabia Saudite.

Klubet të mëdha në Evropë, duke përfshirë Real Madridin dhe Barcelonën, si dhe klube të mëdhenj të Premier Ligës, kanë dalë në mbështetje të idesë për një Botëror të ri klubesh çdo katër viti, që i premton një mesatare prej më shumë se 100 milionë sterlinash për secilin klub pjesëmarrës.

Këtë javë, 36 anëtarët e këshillit nga gjashtë konfederatat rajonale të FIFA-s do t’u prezantohet riformatimi i projektuar i Kupës së Botës për klube. Propozimet kuptohen të përfshijnë një mundësi për një turne të ri klubesh me një numër në rritje të ekipeve (opsionet e fundit ishin 16 ose 24) që do të zhvillohen çdo katër vjet, në vend të Kupës aktuale të Konfederatave, në qershor, një vit përpara Kupës së Botës.

Infantino po kërkon rizgjedhjen si president i FIFA vitin e ardhshëm dhe ka premtuar shoqatat kombëtare të futbollit të FIFA-s se organi qeverisës botëror do të shpenzojë më shumë se 4 miliardë dollarë për zhvillimin e futbollit globalisht deri në vitin 2026.

Ndërkohë, presidenti i UEFA-s, Aleksander Ceferin, u tall me planin e FIFA-s në maj, në një fjalim për ministrat e sporteve të BE, duke thënë: “Nuk mund ta pranoj që disa njerëz të verbuar nga ndjekja e fitimit po konsiderojnë të shesin shpirtin e turneve të futbollit për fonde private. Paraja nuk sundon dhe modeli evropian i sportit duhet të respektohet. Futbolli nuk është për shitje”.

Gjithashtu lidhur me këtë temë ka ndërhyrë dhe presidenti i ECA dhe presidenti i Juventus, Andrea Anjeli, po ashtu ishte i shqetësuar rreth propozimit, duke përshkruar përfitimet e mundshme financiare si “të dyshimta”. Anjeli theksoi se kalendari i turneut të futbollit është pajtuar globalisht deri në vitin 2024 dhe përparësia e tij pas kësaj është të kërkojë zgjerimin e formatit të “UEFA Champions League” për të përfshirë më shumë ndeshje dhe kjo do të sjellë më shumë të ardhura për ekipet pjesëmarrëse.