Carlo Ancceloti

Ançeloti bindet nga Hysaj, Napoli bën gati “shpërblimin”

Sport Ekspres — Sun, 24 Mar 2019 18:41:12 +0000

Elseid Hysaj vuajti jo pak te Napoli pas ardhjes së Karlo Ançelotit. Trajneri italian shpesh herë e la në stol mbrojtësin shqiptar duke i besuar serbit Nikola Maksimoviç ose francezit Kevin Malkyit.

Megjithatë, viti 2019 ka ndryshuar krejtësisht raportin mes lojtarit dhe trajnerit. Hysaj është kthyer në të luajë si titullar te Napoli, duke fituar plotësisht besimin e trajnerit të njohur.

Me rregullimin e raportit mes të dyve hapi i radhës është rinovimi i kontratës. Marrëveshja aktuale midis Hysajt dhe klubit italian mbaron në vitin 2021, por sipas “Corriere dello Sport”, te Napoli kanë filluar negociatat e para për rinovimin e kontratës.

Kjo lëvizje vjen me miratimin e vetë trajnerit Karlo Ançeloti. Në javën në vazhdim drejtuesit e Napolit do të ulen në tavolinë me agjentin e lojtarit shqiptar për të parashtruar ofertën e tyre dhe për të dëgjuar kërkesat e futbollistit.

Hysaj: Po përmirësohem me Ançelotin, do jepja gjithçka për një gol

Sport Ekspres — Wed, 13 Mar 2019 17:30:26 +0000

Elseid Hysaj ka qenë përkrah Karlo Ançelotit në daljen për shtyp para takimit të nesërm ndaj Red Bull Salcburg. Mbrojtësi shqiptar ka siguruar se rezultati i ndeshjes së parë (Napoli fitoi 3 – 0 në “San Paolo”) nuk e shpërqendron skuadrën e tij.

“Nuk besoj se rezultati i ndeshjes së parë na shpërqendron. E dimë që Salcburgu është një skuadër e mirë me lojtarë cilësorë. Do tregohemi të qetë në fushë, por natyrisht me dëshirën për të marrë një rezultat pozitiv”.

MUNGESA E KULIBALI DHE MAKSIMOVIÇ – “Ata janë dy lojtarë të rëndësishëm për ne, por ata që do t’i zëvendsojnë do japin maksimumin e tyre. Jemi një grup i bashkuar”.

GOLI I PARË ME NAPOLIN ? – “Do të jepja gjithçka për ta shënuar, por nuk po vjen”.

EKSPERIENCA ME ANÇELOTIN – “Për mua ishte një ndryshim i rëndësishëm pasi kisha pasur të njëjtin trajner për 6 vite rresht. Ndonjëherë është mirë që të provosh ndryshime. Mendoj se përmirësohem nga ndeshja në ndeshje”, përfundoi Hysaj.

Ançeloti: Futbolli ka ndryshuar, e dini me sa pasime shënohet?!

Sport Ekspres — Sat, 23 Feb 2019 12:08:47 +0000

Napoli do të luajë pasditen e nesërme në transfertën delikate të Parmës. Ekipi i kaltër vjen nga një ecuri jo pozitive në kampionat, teksa në dy ndeshjet e fundit janë ndalur në dy barazime, respektivisht ndaj Fiorentinës dhe Torinos.

Në kuadër të ndeshjes së nesërme, përpara mediave ka folur numri një i stolit, pikërisht Karlo Ançeloti. Tekniku italian u pyet për disa çështje, një ndër të cilat ishte dhe mënyra e lojës që duhet të luajë Napoli, ku sipas tij nuk duhet të luhet me mënyrën e Sarrit, apo Guardiolës, por është më mirë të luhet në tipin e Simeones, ku me pesë apo gjashtë pasime të shkosh te goli.

“Mendoj se posedimi i topit është i rëndësishëm në kontrollin e lojës, por në rast se kjo sjell diçka. Mjafton të shohim se sa ka ndryshuar roli i portierit. Statistikat thonë që mbrojtësit dhe portierët janë bërë lojtarët që prekin më së shumti topin.

Të mbash topin në zona të panevojshme nuk është efektive, pasi nuk sjell asgjë. E dini se sa herë ka ndodhur që një ekip të shënojë pas më shumë se 20 pasimesh? Mendoj se në një vit mund të ndodhë dy herë. Goli shënohet pas pesë apo gjashtë pasimesh.”