Një ndër lojtarët më të spikatur te Përfaqësuesja çame ishte padyshim Kevis Gjeçi. 22-vjeçari ka shënuar 2 gola dhe ka dhuruar tre asiste në turneun që sapo u mbyll, madje në dy sfidat e fundit ishte dhe ai që mbante shiritin e kapitenit. Mbi këtë eksperiencë, por jo vetëm, Gjeçi ka folur në një intervistë për “SportEkspres.com“.

ÇAMËRIA – “Përfaqësuesja e Çamërisë është e sapoformuar dhe ftesa që ata më bënë ishte një vlerësim që normalisht duhet ta respektoja. Është një fillim i mbarë, me kalimin e kohës jam i bindur që do të ketë progres.”

GRUMBULLIMI DHE TURNEU NË ARMENI – “Jemi grumbulluar shumë pak kohë para nisjes për në Armeni dhe nuk kishim periudhën e mjaftueshme për t’u njohur sa duhet me njëri-tjetrin. Sidoqoftë, u ambientuam mirë dhe kemi zhvilluar një turne të kënaqshëm. Në fushën e lojës jemi munduar të kuptohemi dhe kemi dhënë maksimumin, duke marrë parasysh që vinim nga një sezon i gjatë dhe lodhja fizike ndikon jo pak. Turneu ishte një suprizë e bukur, pasi ishte i organizuar mirë në çdo detaj. Një eksperiencë që do të mbetet gjatë në mendjen time.“

Gjeçi përveç paraqitjeve të mira, binte në sy edhe për faktin se në listën e lojtarëve të Çamërisë, ishte i vetmi që vinte nga jashtë Shqipërisë, konkretisht nga Franca, ku luan prej dy vitesh.

LARGIMI NGA SHQIPËRIA – “Çdo lojtar shqiptar ëndërron qe të luajë në Europë dhe kjo më ka bërë te largohem nga Shqipëria, ku për fat të keq jo gjithmonë vlerësohesh aq sa duhet. Në Francë pas disa provave te kaluara me sukses, më hapën dyert dhe të tregohem i sinqertë më kanë pritur shumë mirë. Normalisht fillimi ishte i vështirë edhe për shkak të dokumentacionit, por tani falë edhe presidencës së klubit aktual çdo gjë po shkon shumë mirë.“

KARRIERA NË FRANCË – “Pavarësisht se ekipi im nuk arriti të ngjitej një kategori më lart, sezoni që po lëmë pas ka qenë shumë pozitiv për mua në aspektin individual. Golat dhe paraqitjet e mira, kanë bërë që të kem edhe një ofertë në ´National’ (Liga e tretë franceze), hap i cili do të më ndihmonte akoma më shumë për karrierën time. Sidoqoftë, për momentin nuk mund ta zbuloj emrin e klubit.”

Mesfushori në të shkuarën ka qenë pjesë edhe e Kategorisë së Parë në Shqipëri, ku në sezonin 2015/2016 ka zhvilluar 22 ndeshje (20 prej të cilave si titullar) me Sopotin. Në lidhje me një rikthim të mundshëm në Shqipëri, ai është shprehur:

“Superliga shqiptare është në progres të vazhdueshëm dhe po e rrit nivelin çdo sezon. Për momentin të jem i sinqertë nuk po e mendoj rikthimin në Shqipëri, sepse dua te shkoj sa më lart në Francë ose diku tjetër në Europë, por më vonë nuk i dihet. Shqipëria është vendi im dhe ndoshta një ditë mund të rikthehem.“
OBJEKTIVAT PËR TË ARDHMEN – “Që në moshë të vogël, ëndrra ime ka qenë që familja ime të më shohë teksa luaj në nivelet më të larta të futbollit. Gjithsesi, për momentin bazohem te një parim kryesor: Hapat duhet t’i hedh të vegjël dhe të sigurtë, në mënyrë që të arrij sa më lart.“

Edhe pse bëhet fjalë për një turne krejtësisht miqësor, ndeshje e sotme u shoqërua me tension midis futbollistëve të të dyja skuadrave. Në minutën e 62-të Çamëria mbeti me 10 lojtarë. Në përfundim të 90 minutave rezultati ishte 0 – 0 dhe të dyja skuadrat iu drejtuan goditjeve të 11-metërshave ku fati i buzëqeshi ekipit kundërshtar.

Kjo është hera e dytë në këtë turne që Çamëria eliminohet në goditjet e 11-metërshave, pasi një gjë e tillë ndodhi dhe në gjysmëfinalen ndaj Osetisë së Jugut. Turneu “European Football Cup” u organizua nga Konfederata e Shoqatave Futbollistike të Pavarura (CONIFA), një organizatë që ka si synim të përfaqësojë të gjitha territoret që nuk njihen ndërkombëtarisht.

Çamëria 0 – 0 Abkazia
Penalltitë (4-5)

Pasi pësuan një disfatë 3-1 një ditë më parë ndaj Akbazisë, Çamëria arriti të triumfonte me spektakël pasditen e sotme me shifrat 4-1 ndaj Artsakh. Fillimisht ishte Marko Van Basten Çema, i cili shënoi në minutën e 58-të për t’i dhënë çamëve avantazhin.

Vendasit e Artsakh e rritën presionin dhe në minutën e 84-të barazuan me një goditje dënimi. Gjithsesi, vetëm dy minuta më vonë, ishte numri 19-të Mziu, i cili riktheu avantazhin te Çamëria.

Për të hipotekuar fitoren mendoi Kevis Gjeçi. Ky i fundit finalizoi në mënyrë spektakolare një kundërsulm në minutën e 92-të. Me vendasit që ishin hedhur të gjithë në sulm, çamët përfituan nga hapësirat e shumta, me Gjeçin që i vetëm përballë portierit shënoi me parabël.

Më pas, me shturjen e vendasve, çamët gjetën dhe golin e katërt për shifrat përfundimtare 4-1. Ditën e nesërme Çamëria zbret përsëri në fushë, për ndeshjen vendimtare dhe të fundit në grup, që do të luhet përballë Sapmit, i cili mban vendin e fundit në renditje.

Ky institucion është i përbërë nga 55 anëtarë, ku 30 janë nga Europa, një prej tyre është edhe Kombëtarja e Çamërisë. Këta të fundit janë bërë pjesë e CONIFA-s pranverën e vitit të shkuar.

Turneu që do të marrë pjesë Çamëria zhvillohet në fillimin e muajit qershor, ku do të marrin pjesë 12 përfaqësuese, të cilat janë ndarë në katër grupe, me nga 3 ekipe secili.

Çamëria është shortuar në grupin 2, së bashku me Akbazinë (krahinë në afërsi të Rusisë) si dhe vendet e Nisës (krahinë në juglindje të Nisës, Francë).

Trajner i Kombëtares është Ejup Mehmeti, i cili do të ketë përkrah edhe Bardhyl Minxhajn. Presidenti është Festim Lato, ndërsa rolin e drejtorit e mbulon Arben Arkaxhiu.