Ai titull iu hoq Juves si pasojë e Calciopolit të famshëm dhe më pas i kaloi Interit, duke bërë që armiqësia mes dy klubeve dhe tifozëve të arrijë kulmin.

Juve nuk e pranoi kurrë atë vendim, duke shkuar nëpër gjyqe, por gjithçka kishte mbetur e ngrirë prej 2011, kur dolën edhe përgjime telefonike që fajësonin edhe drejtuesit e lartë të Interit në kohën e ngjarjeve, Giacinto Façhetti.

Sot Kolegji i garancisë së Komitetit Kombëtar Olimpik Italian (CONI) i ka vënë vulën: Juve nuk e fiton apelin dhe detyrohet të paguajë edhe 1500 euro, për shpenzimet e CONI-t.

Sot një senator italian, Etore Likeri, ka folur për emisionin Un Giorno da Pecora në Rai Radio 1, duke iu kthyer hetimit pjesë e të cilit ishte edhe ai, sepse ishte zëvendësprokuror i Federatës Italiane të Futbollit në atë kohë.

“E takova disa herë Moxhin. Një herë ishim në Kaliari, hëngrëm mish derri sard në stadium, në tryezën e rojës së stadiumit Sant’Elia. Moxhi ishte një person i rafinuar, miqësor, por nuk e pranonte kurrë humbjen“, tregon Likeri, i cili zbulon edhe një detaj interesant, ndoshta edhe komik, sepse fut edhe Shqipërinë në valle.

“Skedat telefonike që përdorte Moxhi? Nuk e di, më duket se nuk ishin zvicerane, ndoshta ishin shqiptare. Arbitrat kishin skeda të personalizuara, flisnin me drejtuesit, edhe ata të federatës. Akuza ishte që Moxhi kishte ndikim te proceset e vendimmarrjes kur përzgjidheshin arbitrat“.