Një nga arsyet e kësaj rënieje është dëmtimi i kapitenit Bushiç, i cili ka lënë një gropë të madhe në sulmin kuqezi. Kroati ka folur në “Supersport”, para ndeshjes kundër Skënderbeut, duke treguar se do të kthehet në Kroaci, ku do të qëndrojë disa javë: “Jam i mërzitur nga kjo situatë dhe shpresoj të rikthehem për 2-3 javë. Nesër në mëngjes do të iki në Split të Kroacisë për një periudhë një-javore dhe më pas do të bëj një eko tjetër”.

Bushiç sheh i shqetësuar renditjen: “Vllaznia, Kamza dhe Teuta janë shumë afër, tani na duhen pikë urgjentisht. Kemi shumë probleme këtë vit dhe që nga ndeshja e Kupës ndaj Partizanit na iku situata nga duart, duke u rënduar psikologjikisht”.

HOXHAJ – Sulmuesi tjetër i Flamurtarit, Hoxhaj, është transportuar për në spital në pushimin e ndeshjes kundër Skënderbeut. Një përplasje e fortë me Vangjelin në fillim të ndeshjes bëri që Ardit Hoxhaj të vijonte lojën i fashuar në kokë, por në pushim ishte e pamundur të vazhdonte dhe u bë i detyruar transportimi për në spital, për të marrë ndihmë të specializuar.

– Bushiç, pritët kaq muaj për një penallti dhe erdhi më në fund?

– Shumë i kënaqur me këtë penallti. Përsëri nuk shënova, gjithsesi. Ishte një ndeshje shumë e rëndësishme dhe jam shumë i kënaqur për 3 pikët.

– Afrimet e reja, prisni më shumë tani e tutje?

– Po, kanë ardhur lojtarë cilësorë, por sot mungoi Muarem dhe mungesa e tij u ndje shumë. Në Turqi punuam shumë dhe u ambientua mirë, duke luajtur lojë të shpejtë e me top në tokë. Na prishi punë mungesa e tij.

– Titullin, e mendoni?
– Mendojmë Europën, ai është synimi kryesor. Sot humbi Skënderbeu, lajm i mirë për ne, por jemi ende larg. Mendojmë për ndeshjen e radhës dhe të shohim.

– A mendon se ishe më i miri në fushë?

– Jo, gjithë skuadra ishte në lartësinë e duhur.

– Penalltia, Partizani proteston shumë.

– Mendoj se penalltitë e padhëna, nga kroset, ishin penallti. Rasti kur Telushi ndal një kros me dorë për mua është penallti. Edhe rasti i Kotobellit për mua është penallti. Atanda? Shoh prekje me dorë, por ndoshta edhe me kokë. Është vendimi i arbitrit, nuk di ç’të them”.

Bushiç
“Kemi kryer një fazë përgatitore të rëndësishme, për të punuar në qetësi dhe për të kryer stërvitje edhe me afrimet e reja. Janë lojtarë cilësorë, do të na ndihmojnë shumë”.
“Synimi? Duam të kthehemi në kupat e Europës, ky është prioriteti. Nuk përjashtoj asgjë, nëse do të ecim me ritëm të mirë dhe Skënderbeu do të gabojë, por së pari duam kualifikimin në Europa League”.

Pollozhani
“Kushte komode, fushat, hoteli, të gjitha. Ishte një fazë pozitive, kemi marrë ngarkesën e duhur dhe jemi përgatitur mirë për pjesën e dytë të kampionatit. Qëllimi i Flamurtarit është t’i marrë ndeshjet njëra pas tjetrës, të mundohemi të japim gjithçka për atë fanellë dhe objektiv të veçantë nuk ka ende, është shumë herët.
Afrimet? Janë pozitive, janë lojtarë me bagazh mjaft të mirë teknik, si Muarem dhe Gafuri, por edhe Nedeljkoviç e Zuka. Mendoj se do na ndihmojnë shumë për të rritur nivelin në pjesën e dytë të kampionatit”.

Në fakt, ka shumë të përbashkëta mes tyre, duke përfshirë faktin që edhe Bushiç ka luajtur te Slaven Belupo, por ndoshta Bushiç nuk ka pasur fatin dhe nuk ka bërë zgjedhjet e Pejiçit, i cili ka luajtur gjithnjë në skuadra milionere, të ndërtuara për tituj. Jo Bushiç. Ai ka luajtur te Vllaznia, jo ajo e lavdishmja që ia kemi harruar bëmat; ka luajtur te Tirana, edhe ajo një hije e vetvetes prej vitesh; ka luajtur te Flamurtari i vjetshëm, plot halle e stres, ku gjithsesi i shënoi 10 gola në kampionat. Flamurtari i këtij sezoni duket ndryshe. Duket, sepse duhet të presim ende, por për momentin Sinan Idrizi meriton lëvdata për organizimin e ri të punës në klub. Mos ta teprojmë, sepse lëvdatat duken servilizëm dhe Idrizi duhet të tregojë me fakte se mund ta mbyllë një sezon pa revolucion e pa vonesa pagesash (nuk është faji i tij, thotë Idrizi, por ku duan t’ia dinë lojtarët e tifozët).

Duke u kthyer te Bushiç: Flamurtari ka realisht sulmuesin më të mirë të kampionatit në përbërje, harrojini Soue, Çani e Alijev. Qoftë edhe për faktin se këta të fundit nuk e njohin fare Superioren, Bushiç qëndron më lart dhe Shpëtim Duro e di mirë, ndaj e donte me çdo kusht. Skuadra funksionon, topat në sulm po shkojnë me shumicë, jo vetëm për Bushiç, ndaj në Vlorë duhet të buzëqeshin dhe të shkojnë në stadium, sepse ky Flamurtar premton shumë. Ia thoni edhe kryetarit të bashkisë, se zor se lexon gazeta sportive!

Blerim Jahaj

“Dy golat e mi? Jam i kënaqur, sepse po ndihmoj skuadrën dhe kjo është detyra ime.

“Golat e shumtë në këtë fillimsezoni? Jam shumë i qetë në Vlorë, është njësoj si shtëpia ime në Split, ka detin dhe mentalitet të njëjtë. Jam shumë i qetë dhe ndihem mirë, ndaj ndoshta kjo më ndihmon”.

“A është skuadra e aftë të shkojë në kupat e Europës? Të shpresojmë, për atë po punojmë.

“Goli i shënuar? Është detyra ime, ashtu si shërbimi për shokët e skuadrës. Sot jam i kënaqur.

Sa larg mund të shkojmë? Ne kemi si synim kupat e Europës, ky është plani. Personalisht nuk kam synim të caktuar për golat, të shohim.

“Problemet financiare në Vlorë? Këtë vit nuk kemi më asnjë problem, gjithçka po shkon mirë dhe shpresojmë të vazhdojmë kështu, e kemi lënë pas të shkuarën”.

Elton Nika

Tomislav Bushiç ka nënshkruar kontratën e re që e lidh edhe për sezonin tjetër me Flamurtarin. Për sulmuesin kroat ishte arritur marrëveshja që kohë më parë, ndërkohë tashmë sulmuesi ka hedhur firmën në kontratë Sezonin e kaluar Bushiç ishte ndër lojtarët më të mirë të Flamurtarit. Trajneri Shpëtim Duro e konsideron sulmuesin kroat si shumë të rëndësishëm për skuadrën, ndaj edhe e kishte deklaruar disa herë se ai duhej të qëndronte në Vlorë, madje ia kish kërkuar administratorit Idrizi rinovimin e kontratës me të që në fillim kur mori drejtimin e skuadrës. Tashmë kjo gjë është bërë realitet dhe sulmuesi do të mbetet në Superiore, ku ka veshur më parë edhe fanellën e Vllaznisë dhe Tiranës.

DEKLARATA – Bushiç pret një sezon ndryshe, me një Flamurtar që do pretendojë minimalisht kupat e Europës dhe për këtë është i bindur. Në një prononcim të dhënë për “Sport Ekspres”, Bushiç tregon arsyet e qëndrimin në Vlorë, ndërkohë që ka edhe një mesazh për Danilo Alvesh.

“Jam ndjerë gjithmonë mirë në Vlorë. Rinovimi ishte një dëshirë e të dyja palëve. Klubi dëshironte me çdo kusht të vijoja të isha pjesë e Flamurtarit. Trajneri ka shprehur gjithmonë besimin tek mua, por edhe dëshira ime ishte që të vijoja të luaja për Flamurtarin. Sezonin e kaluar kemi kaluar jo pak probleme, por fatmirësisht në fund e mbyllëm me sukses. Jam i bindur se gjithçka këtë kampionat do të jetë ndryshe. Është një projekt i rëndësishëm për Flamurtarin dhe duam të jetë aty ku e meriton. Natyrisht, projekti i klubit për këtë sezon mbetet edhe një nga arsyet që më bindën të vijoj të jem pjesë e Flamurtarit. Nuk besoj se do të përsëritet sezoni i kaluar dhe për këtë jam i bindur plotësisht.

“E kam thënë edhe më parë, pres dhe Danilon të jetë sërish pjesë e jona. Merkato që po kryen klubi dhe trajneri këtë periudhë, është mjaft aktive dhe me lojtarë që janë mjaft cilësorë. Duke nisur nga mbrojtja, për të kaluar në mesfushë dhe në sulm. Të gjitha repartet janë duke u plotësuar me lojtarë cilësorë, teksa disa prej tyre e njohin mjaft mirë kampionatin shqiptar, si Bicaj, Hoxhaj e Musta. Mjaftojmë të kujtojmë faktin që disa prej tyre kanë luajtur te Shkëndija e Tetovës. Pas merkatos na duhet të mendojmë për nisjen e përgatitjeve dhe sezonin e ardhshëm. Jam plotësisht i bindur se do jetë një Flamurtar shumë herë më cilësor këtë sezon dhe duhet të synojmë dhe të shohim sa më lart në renditje. Mendoj se kjo skuadër i ka cilësitë, por normalisht është fusha ajo që tregon gjithçka. Klubi është duke i dhënë stafit dhe ne lojtarëve besimin e duhur, por në fushë jemi ne që duhet ta tregojmë këtë besim”, deklaron sulmuesi kroat, autor i 10 golave në kampionat sezonin e shkuar.

Sulmues i fuqishëm, shënues shumë i zoti dhe tërheqës i skuadrës, Bushiç pak nga pak gjeti nivelin e tij më të mirë në Vlorë, duke shënuar 10 gola në kampionat e dy në kupë, përveçse dha shumë asiste për gol.

Trajneri Duro e kishte një ndër të preferuarit e vet dhe që në pranverë i kërkoi administratorit Sinan Idrizi që të rinovonte me kroatin.

U tha, u bë, sepse klubi e ka arritur me kohë marrëveshjen me sulmuesin kroat dhe sot ka zyrtarizuar akordin, që e mban ish-futbollistin e Vllaznisë dhe Tiranës edhe për një vit në Vlorë, ku do të jetë pikë referimi në sulm, pasi për momentin është i vetmi sulmues “pykë”.

31-vjeçari shënoi 12 gola sezonin e fundit dhe kishte shumë oferta këtë verë, por tashmë e ka vendosur të qëndrojë kuqezi.

Në Shqipëri Bushiç ka luajtur edhe me Vllazninë e Tiranën, duke shkëlqyer në Shkodër.

Së bashku me Danilo Alvesh, sezonin e fundit Bushiç shkëlqeu sezonin e fundit në sulmin vlonjat, ndërsa tani partneriteti vazhdon.

Drejtuesit e Skënderbeut kanë angazhuar shumë menaxherë aktualisht për të gjetur sulmuesit që ata duan, ose të paktën një të tillë me kualitet të lartë. Afrimet në këtë repart duhen bërë urgjentisht, duke parë që ndeshjet europiane po afrojnë. Presidenti Ardjan Takaj ka pranuar pak ditë më parë se e gjithë vëmendja është te sulmi dhe përforcimi i tretë për trajnerin Ilir Daja do të jetë pikërisht për këtë repart. Dhe dje ka dalë në skenë një emër i njohur në kampionatin shqiptar, Tomislav Bushiç. Sulmuesi kroat është vënë në “radarët” e Skënderbeut dhe gjasat janë të mëdha të arrihet akordi mes tij dhe klubit korçar. Sezonin e fundit Bushiç luajti për Flamurtarin, ndërkohë që më parë ka veshur edhe fanellat e Vllaznisë dhe Tiranës në Superiore. Mësohet se lojtari nuk ka kontratë me klubin vlonjat dhe korçarët mund të përfitojnë në këtë moment. Burime pranë klubit bardhekuq bëjnë me dije se kontaktet mes palëve kanë filluar dhe pritet përgjigja e Bushiçit. Trajneri Daja e pëlqen Bushiçin, i cili i bën punë skuadrës së tij. Bushiç është 31 vjeç dhe ka përvojë të mjaftueshme për të qenë pjesë e bardhekuqve, sidomos në Kupat e Europës. Karriera e tij është e pasur, teksa në Kroaci ka luajtur me Hajdukun e Splitit dhe Slaven Belupon. Eshtë huazuar edhe te Dinamo e Kievit, por nuk ka mundur të luajë asnjë ndeshje. Po ashtu, Tomislav Bushiç ka qenë pjesë e Kombëtareve të moshave të Kroacisë, deri te U-21-shi. Në sezonin 2013-2014 erdhi në Shqipëri për të luajtur me Vllazninë e më pas edhe me Tiranën e Flamurtarin. Me këtë të fundit shënoi 10 gola sezonin e kaluar. Pas Donjet Shkodrës, korçarët duan të marrin nga vlonjatët një tjetër titullar të rëndësishëm, siç është Bushiç. Situata po ndiqet me kujdes dhe që sot mund të kemi një përgjigje përfundimtare nga kroati.

TË TJERËT – Nëse Tomislav Bushiç pranon të vishet bardhekuq, nuk do të jetë sulmuesi i fundit, që do të vijë te Skënderbeu. Klubi bardhekuq është duke punuar çdo ditë e më shumë që të afrojë edhe lojtarë të tjerë për sulmin. E veçanta është se këtë herë te Skënderbeu duan t’ua besojë këtë repart vetëm lojtarëve të huaj. Flitet se do të ketë edhe një goditje të madhe për sulmin, por është shumë e vështirë të mësohen detaje të tjera, për vetë faktin se janë pista të huaja. Trajneri Ilir Daja ka kërkuar që ta shohë vetë çdo lojtar para se të hidhet e zeza mbi të bardhë. Skënderbeu ndodhet në Slloveni dhe tifozët korçarë janë me sy e veshë nga merkatoja, ku presin të mësojnë emrat e rinj. Këto dy ditë ka shumë mundësi që Skënderbeu të bëjë edhe goditjen e tretë në këtë merkato vere. Bushiç ka shanse të mëdha, por nuk është çudi të keRmi edhe ndonjë emër tjetër të zyrtarizuar shumë shpejt për korçarët.