Në fakt, Gerhard Progni erdhi si dëshirë e teknikut korçar në merkaton e shkuar të verës, ndërsa Bushiç u largua nga Flamurtari në janar për të vazhduar karrierën e tij te “Djemtë e Detit”.

Në Superligë, Progni luajti 30 ndeshje, ku dhe shënoi 7 gola. Ndërsa Bushiç, u aktivizua 17 ndeshje me Flamurtarin dhe 12 ndeshje me Teutën, duke shënuar 6 gola në total. Të dy lojtarët janë vënë zyrtarisht nën urdhrat e Gentian Mezanit te Gjilani.

Në kornen e fundit të takimit kuqezinjtë tanë vunë baraspeshën. Sulmuesi Emiliano Bullari tregohet i saktë me kokë dhe bën që i gjithë stoli i kuqezinjve të futet në fushë për të festuar. Pika e marrë sot në Stamboll çon skuadrën tonë në kuotën e dy pikëve pas tri ndeshjeve (barazim me Andorrën dhe humbje me Turqinë).

Turqi U21 2 – 2 Shqipëria U21
Shënues: Dulmur 54’ Dervishoglu 85’/ Maloku 49’, Bullari 90+3’

Bushi nuk ka preferuar të bëjë në zëvendësim kokë për kokë, por ka ftuar një sulmues në vend të mbrojtësit të dëmtuar. Bëhet fjalë për futbollistin e Teutës Lorenco Vila, lojtar që ka qenë dhe më parë në listat e grumbullimeve të kombëtares së shpresave.

Kombëtarja U21 do të niset më datë 5 qershor drejt Stambollit, ndërsa të premten do përballet me Turqinë në kuadër të fazës së grupeve të kualifikueseve të Europianit U21.

ANDORRA – “U bë një futbollit i pisët, një futboll jo Fair-Play nga lojtarët e Andorrës, gjithsesi kjo ishte strategjia e tyre. Në pjesën e parë pati një nënvlerësim nga ana e lojtarëve, për këtë u indinjova pak, pasi nuk e prisja që të mos jepnin maksimumin, ndërsa në të dytën morën në kontroll lojën, por pati një gabim individual”.

PËRGJEGJËSI – “Do të ndjeja përgjegjësi personale nëse ekipi nuk do të luante në futboll, ata shkuan vetëm dy herë në portë dhe shënuan dy gola, ne ishim gjatë gjithë kohës në portës së tyre dhe shënuam vetëm dy gola. Shpërdoruam shumë, gjithsesi barazimi me Andorrën është i pafalshëm”.

REZULTATE APO EVIDENTIMI I LOJTARËVE – “Unë kam evidentuar shumë lojtarë. Si rasti i Bajramit që luan te Birmingami. Objektivi jonë është që të çojmë lojtarë në ekipin e parë A. Besoj se 3 ose 4 lojtarë që luajnë me shpresat tani do të jenë së shpejti pjesë e ekipit të parë A. Sigurisht dhe rezultatet janë të rëndësishme”.

SHQIPTARËT E MAQEDONISË – “Personalisht unë kam marrë 4 lojtarë nga Maqedonia, ashtu si dhe U19. Do të punojmë akoma me skautët e federatës në Maqedoni, por është një proces që do pak kohë. Unë mendoj që Shqipëria ka lojtarë, por problem është eksperienca e vogël. Kemi probleme në repartin e mbrojtjes, të gjithë shqiptarët duan t’i bëjnë fëmijët mesfushorë ose sulmues”.

AKUZAT PËR QOKA –“Janë mendime individësh dhe mua nuk më interesojnë. Nuk e imagjinoj dot si mund të bësh një qokë në kombëtaren shqiptare. Ne mundohemi gjithmonë të marrim më të mirët, patjetër që mund të gabojmë kur na duhet të zgjedhim mes dy lojtarëve shumë të mirë”.

OBJEKTIVAT – “Objektivat e mi i vendosin disa njerëz të tjerë, nuk i vendosin as specialistët e as gazetarët. Nëse kemi bërë mirë ose kemi bërë keq, janë ata që e vlerësojnë punën tonë. Pavarësisht barazimin me Andorrën që është i papranueshëm, në ndeshje ndaj Turqisë luajtëm shumë mirë”.

DËMTIMI I MALËS – “Mala ka qenë të dëmtuar në gju. Unë do ndjek atë dhe dy tre lojtarë të tjerë këtë javë nëse do të luajnë, pasi me ekipin kombëtar A ose U21 nuk mund të bësh shaka, kur vjen aty duhet të japësh maksimumin. Nëse një lojtarë është i dëmtuar me ekipin kombëtar gjatë ditës së martë e të mërkurë, ndërsa ditën e premte je 100% e tij, atëherë është shumë e vështirë që të jetë përsëri pjesë e kombëtares. Stafi mjekësor më tha se ka një tërheqje në ligament. Doktori më tha se do ishte e pamundur që të luaj për të paktën një javë. S’dua të përmend emra, por dy ose tre trajnerë marrin lojtarët e tyre marrin lojtarët  e tyre duke i thënë mundohuni të luani 30 minuta në Andorra ose fare pasi kemi ndeshje në kampionat. Çdo lojtarë duhet ta dijë se fanella e kombëtares është e shtrenjtë, gjithsesi në grumbullimin e ardhshëm mund të kemi 2 ose 3 mungesa nga këto lojtarë që thashë”.

Pas ndeshjes kundër Andorrës, fituar 3-0, ish-trajneri i Kombëtares Astrit Hafizi deklaroi se nuk duhej festuar shumë për një fitore të detyruar, ndaj një ekipi amator, ndaj “Sport Ekspres” ka komunikuar me shkodranin, për të folur pak edhe për Shpresat, meqenëse prej tyre pritej gjithashtu fitorja.

– Hafizi, në Andorrë duhej të fitonim edhe me magazinierin, siç u tha me humor. Po Shpresat, pse nuk ia dolën?
– Më vjen keq, është një rezultat shumë zhgënjyes, që flet vetë. Është e lehtë të bësh kritika në këtë moment dhe shumëkush do të sulmojë Alban Bushin, por mendoj se nuk është aq e thjeshtë, që të kufizohemi vetëm tek ai. Janë ndeshje ku vërtet mund të jesh superior në letër, por duhet karakter dhe uri, nuk jemi në balet. Është një barazim si humbje, një disfatë për t’i vënë gishtin kokës e për t’u menduar thellë.

– I habitur nga kjo ecuri e Shpresave, sepse talente kemi plot, duke parë ku luajnë?
– Nuk është një befasi, kemi vite që me Shqipërinë U21 nuk po bëjmë thuajse asgjë. Jemi kënaqur herë pas here me ndonjë ndeshje të mirë, diku 30 minuta, diku një pjesë loje, diku me lojën dinjitoze, që na kthen pas në kohë. Vërtet krenoheshim me humbjet dinjitoze para 20-23 vitesh, por ishin kohëra të tjera, edhe kur kam drejtuar unë, nuk i kishim këto kushte, këtë zhvillim, këtë profesionalizëm e organizim. Tani i kemi gjithë lojtarët që luajnë jashtë, janë rritur në kampionate të rëndësishme në Europë, me infrastrukturë shumë të mirë dhe me mentalitet tjetër, atëherë ku është problemi? Këtu ka diçka që nuk shkon, duhet një analizë e kujdesshme, duke filluar nga seleksionimet që bëhen, që ndoshta nuk janë në nivelin e duhur.

– Dëgjojmë shpesh një frazë “rritim dhe evidentojmë talente për kombëtaren, rezultatet nuk janë prioritet”…
– Nuk jam dakord, normale. Talentet nuk i evidenton kombëtarja Shpresa, i evidentojnë klubet nga vijnë. Shumica janë të afirmuar, rriten në klubet përkatës me të gjitha kushtet dhe kombëtarja i zbulon edhe vetë.

– Si ju duket puna e kryer tek ekipet e moshave?
– Nuk dua të flas keq për ish-lojtarët e mi, duke nisur nga Alban Bushi, që është një djalë shumë punëtor dhe i apasionuar. Nga ana tjetër, nëse flas vetëm mirë, do thonë që e mbaj me hatër dhe nuk flas dot hapur. Ai është trajneri i moshave që ka punuar më gjatë në një post, përveçse ka punuar edhe në poste të tjera pranë kombëtares, si menaxher i kombëtares, është duke fituar eksperiencë dhe po mundohet, edhe pse natyrisht ka shumë punë për të bërë.

– Sipas jush, a është normale që të kërkohen rezultate vetëm tek ekipi A i kombëtares?
– Normale nuk është, ashtu si nuk është normale mungesa e kontrollit tek ekipet e moshave. Aktualisht kemi një drejtor të ekipeve kombëtare, Xhemal Mustedanagiç, i cili ka rreth një dekadë që punon në Shqipëri, ka drejtuar U17 dhe ka arritur një kualifikim shumë vite më parë, më pas rezultate mediokre, ndërkohë që tani është drejtues i lartë, në një kohë që ende nuk di shqip. Kjo nuk shkon fare, për mendimin tim, sepse nuk po flasim për ndonjë legjendë të futbollit ballkanas, që do na ndihmonte me emrin dhe autoritetin e vet, si ish-yjet e Kroacisë për shembull. Nuk e di me cilin komunikon dhe si komunikon Mustedanagiç, i cili bën platformën dhe ne i besojmë të ardhmen e futbollit tonë.

Për mua këtu është zanafilla e gjithë problemeve, peshku qelbet nga koka, nuk mund të ndalemi e të kritikojmë vetëm trajnerët e moshave. Edhe pse pa eksperiencë të madhe, trajnerët e moshave janë ish-futbollistë të kombëtares, që po mundohen të rriten si trajnerë dhe kjo praktikë ndiqet kudo nëpër botë, shpesh ish-futbollistë caktohen drejtues në ekipet e moshave. Nëse këta trajnerë nuk kanë ende CV të pasur, të paktën Mustedanagiç si drejtuesi i tyre duhej të kishte një CV shumë të pasur, të ishte një personalitet i trajningut në futbollin ballkanas, gjë që nuk e ka. Që këtu fillon gjithçka, dikush duhet të flasë për këtë çështje, dikush që ka përgjegjësinë dhe vendos për emërimin e drejtorit të kombëtareve dhe më pas trajnerëve.

Më duket se presidenti i FSHF-së nuk bën ndonjë analizë kur mbaron një edicion, nuk e kuptoj çfarë po ndodh me ne, ku fle lepuri. Ne kemi pasur futboll gjithnjë, në vitet ’80 të rinjtë shkuan mes 8 më të mirave të Europës, me djem të rritur në Shqipëri, ndërsa tani nuk rritim askënd në Shqipëri, i marrim nga jashtë thuajse gati dhe zero rezultate. Le të nisë krasitja dhe kërkesa e llogarisë që nga maja, të analizohet gjithçka, para se të shkojmë direkt e te kritika për trajnerët e kombëtareve.

Ishin vendasit ata që shënuan të parët, me anë të sulmuesit Alaez, që ishte dhe kapiten i skuadrës. Në minutën e 19’, Shqipëria e sheh veten në disavantazh. Megjithatë, të besuarit e Bushit ia dolën që të reagonin, pas në minutën e 33’ barazojnë shifrat me anë të Imerit, por vetëm dy minuta më vonë, e pësojnë sërish nga kapiteni i vendasve. Kur 21-vjeçarët tanë dukeshin të humbur, Sula gjen golin e barazimit, vetëm në minutën e 88’ të takimit.

Kualifikuese U21, “Euro 2020”

Andorra – Shqipëri  2-2
Alaez 19’ 55′ / Imeri 53′, Sula 88′

Formacionet fillestare

Andorra: Iker, De Pablos, Alavedra, Garsia, Cervos, Martinez, Vales, Guilen, Rebelo, Rosas, Alaez Trajner: Husto Ruiz

Shqipëria: Dajsinani, Maloku, Kryeziu, Mersinaj, Bajrami, Selahi, Kallaku, Sahiti, Zeka, Muçolli, Vrioni Trajner: Alban Bushi

EPISODET

88’ Gooool Shqipëria, shënon Sula. Sulmuesi ndodhet në kohën e duhur dhe në vendin e duhur për të shtyrë topin në rrjetë, duke ndëshkuar portierin vendas poshtë shalëve dhe duke ndarë pikët e këtij takimi

55’ Gol Andorra. Barazimi zgjat vetëm 2 minuta dhe kuqezinjtë tanë ndshkohen sërish. 2-1 vendasit

52’ Gooool Shqipëria, shënon Imeri. Sulmuesi i Shkëndijës përfiton mjaft mirë brenda zonës dhe ndëshkon me kokë porterin vendas, pas një krosimi shumë të mirë nga Sahiti.

19’ Gol Andorra, shënon Alaez. Sulmuesi i Andorrës luajti dhe dje kundër kombëtares A kuqezi, ndërsa sot i shënon Shpresave. Shqipëria në disavantazh

NDESHJA – “Ne e dimë që kishim një kundërshtar shumë të fortë siç është Turqia, që është pretendente për grupin. Ishim munduar ta përgatisëm lojën ashtu siç ne luajtën, nuk u shpërbëmë si ekip. Në fund, po nuk i shfrytëzove rastet ndëshkohesh, pasi kanë lojtarë shumë të mirë, titullarë dhe me minuta në këmbë. Ne e dinim që do të lodheshim në 20 minutat e fundit, pasi lojtarët tanë luajnë në nivele shumë më të ulëta”.

RASTET E HUMBURA – “Ky është një problem. I krijuam 2-3 raste dhe nëse do të kishim shënuar, do të kishim fituar. Nuk duhet të ishin të tensionuar, pasi përballë kishin Turqinë. Ok, Turqia është ekip i mirë, por nuk është as Franca e as Spanja. Duhet të jemi realistë, kundërshtari është më i fortë se ne”.

PËSIMI I GOLAVE – “Goli i dytë është mëkat që të pësohet. Një lojtar nuk mund të driblojë 4-5 vetë në zonë. Ai është lojtar i mirë, kapiteni, por nuk duhet kurrsesi të driblohemi 4 veta në zonë”.

PANUÇI – “Unë e kam mendjen vetëm te U-21, jam i përqëndruar vetëm kundër Andorrës. Nuk e kam mëndjen fare të kombëtarja A, vetëm te skuadra ime. Shehi i Kastriotit bëri një lojë shumë të mirë, edhe Bajramaj bëri shumë mirë”.

DURMISHAJ – “Nuk besoj se të kombëtarja jonë do të ketë më rast si Durmishaj. Nuk e besoj”, përfundoi i prerë Bushi.

Ditën sotme trajnerët e kombëtareve U19 dhe U21, Nevil Dede dhe Alban Bushi, publikuan listat me lojtarët e grumbulluar për ndeshjet miqësore të muajit mars.

Gjithsej në të dyja kombëtaret kanë marrë ftesa 15 futbollistë të ekipeve shqiptare. Partizani dhe Laçi mbajnë vendin e parë përsa i përket lojtarëve të grumbulluar me nga tre. Si kryeqytetasit dhe kurbinasit kanë dy lojtarë në përfaqësuesen U21 dhe një në përfaqësuesen U19.

Teuta e Bledi Shkëmbit është pas Laçit dhe Partizanit me dy përfaqësues: Sherik Kallaku dhe Lorenco Vila të dy të grumbulluar në kombëtaren U21. Nuk ngelen pa ftesa dhe Kastrioti, Tirana, Flamurtari dhe Skënderbeu, ndërsa ftesa ka pasur dhe për lojtarë të Besës e Elbasanit, ndërsa një ftesë ka dhe për Vllazninë.

Partizani (3) – Esat Mala (Mesfushor; U21), Rubin Hebaj (Sulmues; U21), Livio Malaj (Portier; U19)
Laçi (3)  – Jon Mersinaj (Qendërmbrojtës; U21),  Gentian Selmani (Portier; U21), Fatmir Prengaj (Sulmues; U19)
Teuta (2)  – Sherif Kallaku (Mesfushor; U21), Lorenco Vila (Sulmues; U21)
Kastrioti  (1) – Julian Shehu (Mesfushor; U21)
Skënderbeu – 1 – Mario Dajsinani (Portier ;U21)
Flamurtari – 1 – Arinaldo Rrapaj  (Mesfushor ; U19)
Vllaznia – 1 – Egzon Shima  (Mbrojtës; U19)
Tirana – 1 – Ernest Muçi (Sulmues; U19)
Besa  – 1 –Ilir Dabiani  (Portier; U19)
Elbasani – 1 – Kledis Hida  (Mbrojtës; u19)

“Durmishaj ka qenë të Shqipëria U-21 për dy vite. Ai është një lojtar me të cilin kam folush shpeshherë. Ai është një djalë dhe një futbollist i mirë. E vërteta është se u acarova shumë kur mora vesh se ka zgjedhur kombëtaren greke. E kuptoj se ka ngrënë bukë në Greqi, por zemra është shqiptare.

Nuk e di, kur futbollistët shqiptarë veshin fanellën e Greqisë, ndjejnë gjë? Zemra e tyre duhet të rrahë për ngjyrat kuqezi, ngjyrat e Shqipërisë. Nëse i kanë premtuar para dhe një transferim të bujshëm nëpërmjet kombëtares greke, atëherë e kanë gënjyer. Jam i bindur që do të pendohet për zgjedhjen që ka bërë, pasi e njoh mirë Greqinë!

Shqipëria nuk është si para 20 vitesh dhe jam i befasuar nga zgjedhja e tij. Unë kam grumbulluar emra si Brushaj dhe Bullari dhe mendoj se ata të dy nuk do të zgjedhin Greqinë. Greqia ka 11 milionë banorë dhe nuk duhet të fokusohet te lojtarët kuqezi. Kam folur me Durmishajn dhe më ka kërkuar falje që zgjodhi Greqinë! Siç ju thashë dhe pak më parë, ai është një djalë i mirë, por ende zgjedhja e tij është e pakuptueshme për mua.

Greqia është disi më lart se Shqipëria për momentin, por ne po bëjmë hapa galopantë. Kemi lojtarë si Hysaj, që paguhet 3 milionë euro dhe luan për Napolin. Strakoshën, një nga portierët më të mirë në botë. Thomas është shembulli ideal: Ai është rritur në Greqi, por zemra e tij ka vetëm ngjyrat kuqezi”, përfundoi Bushi.

Ndërkohë, emri më i ri që do t’i bashkohet kombëtares shpresa është Kleandro Lleshi. Mesfushori 19-vjeçar luan në Spanjë ekipi B të Leganesit. Lleshi ka qenë pjesë e përhershme e grumbullimeve të kombëtares U17 dhe u19, ndërsa kjo është ftesa e tij e parë te ekipi i U21.

Lajmin e ka bërë të ditur vetë lojtari në profilin e tij në “facebook”.

Shqipëria e mbyll në vendin e parafundit në renditje me shtatë pikë pas dhjetë takimesh, ku kemi regjistruar vetëm një fitore, katër barazime dhe pesë humbje, një ecuri kjo që duhet përmirësuar.

Estoni – Shqipëri 2 – 2

Shënues: Livak 32’, Kusk 87’ / Seferi 12’ 80’

Shqipëria: Kastrati, Maloku, Toli, Tafa, Kryeziu (Doka 46’), Laci, Seferi, Bare, Mucolli, Mala (Selahi 80’), Sahiti (Zeka 46’). Tr. Alban Bushi

Të gatshëm: Abibi, Ramadani, Lindon Selahi, Hebaj, Albi Doka, Basha,.

“Në të gjitha ndeshjet ne kemi luajtur mirë futboll, por golat nuk kanë ardhur edhe për çështje eksperience. Kemi bërë gabime specifike si lojtarët dhe unë. Mund të kem gabuar dhe unë me ndonjë zëvendësim. Por edhe fati na ka ndëshkuar, pasi pësuam në fund”.

“Ekipi sot tregoi durim dhe nuk doli nga detyrat. Dolëm disa herë në sulm, më shumë se në Spanjë, duhet respektuar kundërshtari, pasi e meritoi fitoren”.

“Me ekipin e Spanjës është shumë e vështirë të mbash topin dhe të sulmosh, jo vetëm për ne. Ekipi shqiptar mund të luajë bukur ndaj çdo kundërshtari. Dua të falënderoj De Biazin pasi kam mësuar shumë për mbrojtjen. Kemi ekip të mirë dhe do të bëjmë mirë. Duhet të fitojmë ndaj Estonisë, pasi u bë kohë që nuk fitojmë. Lojtarët ishin të mërzitur nga goli që pësuam. Ekipi ishte i vendosur mirë, por ndodhin. Mund të meritonim një pikë për moral”.

“Është bërë një punë e mirë nga të gjitha ekipet e moshave të Shqipërisë, nga U15 deri te U21 për të furnizuar ekipin e parë. Në Kombëtaren A kishim së fundmi pesë lojtarë që mund të ishin te ekipi Shpresa. Ky është një obkjektiv, edhe pse rezultatin duhet ta marrim, sepse mërzitesh vetëm me humbje. Gjithsesi,kemi sinjale të mira që luajmë futboll, edhe pse duam të arrijmë edhe rezultate. Përveç Spanjës, me të gjitha ekipet e kemi kontrolluar ne topin dhe ky është tregues i mirë edhe për perspektivën, për skuadrën A”.

Në listën prej 22 lojtarësh të spanjollëve bien në sy emrat e disa lojtarëve si blerja e 25 milionë eurosh e Napolit Fabian Ruiz, Soler i Valencias, Roka i Espanjol dhe sulmuesit Borja Majoral dhe Mikel Ojarzabal, ky i fundit një titullar prej dy sezonesh te Real Sociedad. Shanset për një mrekulli në tokën spanjolle janë thuajse inekzistente.

Vladimir Prenga

Tirana dhe Shqipëria U21 u përballën dje në një ndeshje testuese që u shërben të dyja ekipeve, teksa kuqezinjtë luajnë të martën me Islandën për kualifikueset e Europianit dhe ishte edhe prova gjenerale para këtij takimi. Për bardheblutë ky takim shërbeu për të ruajtur ritmin gjatë kësaj periudhe pushimi, pasi kampionati kthehet fundjavën e ardhshme. Kjo përballje përfundoi me fitoren e Tiranës, që iu fal një penalltie të fituar nga Sentamu dhe u shndërrua në gol nga kapiteni Karabeci. 45 minutëshi i parë pati një ritëm të mirë dhe skuadra e Bushit ishte më lart, madje në disa raste mund të kishte shënuar gol, por portieri Lika dhe shtylla u erdhën në ndihmë. Pjesa e dytë ishte e vakët dhe pa raste, duke bërë që gjithçka të mbyllej me fitoren e Tiranës.

NDESHJA – Djemtë e drejtuar nga Alban Bushi e marrin komandën që nga fillimi i takimit, duke dominuar në lojë me bardheblutë. Që në start kuqezinjtë iu afruan golit me anë të Hebajt. Ilion Lika gaboi në largimin e një topi dhe ishte Laçi që brenda zonës shërbeu për sulmuesin shkodran të Domzhales, i cili e dërgoi sferën jashtë kuadratit. Presioni i Shpresave vijon dhe në minutën e 16-të, pas një aksioni nga e djathta, Laçi del i lirë përballë Likës, që shpëton skuadrën e tij nga goli. Dy minuta më pas ishte Çekiçi ai i cili ekzekutoi një goditje dënimi nga e majta e zonës dhe me vështirësi e grushtoi atë portieri bardheblu, madje topi “qethi” edhe traversën e më pas përfundoi jashtë. Abazaj ishte protagonist pak minuta më pas dhe shtylla ndihmoi Tiranën. Loja nis të balancohet me kalimin e minutave, por rastet mungojnë. Për Tiranën tentativa e parë ishte një gjuajtje e Grecës në minutën e 35-të, por krejtësisht e pasaktë. Ze Maria bëri lëvizjen e parë pas këtij momenti, duke nxjerrë Majkëll Ngoo, krejtësisht në hije deri në atë moment. Shtohen forcat në mesfushë me futjen e Çelhakës dhe në të 41’ Sentamu nuk shfrytëzoi një mosmarrëveshje në mbrojtjen e ekipit Shpresa. Sulmuesi nga Uganga dy minuta më pas u pengua në zonë nga Toli dhe për kryesorin Beqiri kishim të bënim me penallti. Përballë Selmanit u vu Erando Karabeci, i cili e dërgoi topin në rrjetë, pavarësisht se “gardiani” i Laçit e dalloi krahun. 1-0 përfundoi pjesa e parë, ndërkohë që Bushi zëvendësoi thuajse të gjithë formacionin dhe deri në fund u dha mundësinë të gjithë lojtarëve të aktivizoheshin. Edhe Tirana bëri disa lëvizje, më të pakta, ndërkohë që 45 minutat nuk u ngritën në nivelin e duhur. Për të folur për raste është e vështirë, veç dy tentativa nga distanca të Zekës dhe Bardhit, por që nuk ndryshuan asgjë. Me mënyrën e lojës ishte e pritshme që mos të kishte asgjë të re dhe Tirana doli fituese nga fusha e blertë me rezultatin minimal 1-0.

Bushi: Ndeshje që na vlejti, Bare dhe Ramadani duhet të bëjnë më mirë

Alban Bushi u shpreh pas ndeshjes me Tiranës se miqësorja me bardheblutë i shërbeu skuadrës së tij në prag të ndeshjes me Islandën, që luhet ditën e martë në stadiumin “Selman Stërmasi”. “Mendoj që na shërbeu goxha, pasi ishin shumë lojtarë që nuk kishin luajtur në kampionatet e tyre, si tre lojtarët e mbrojtjes që ishin në formacion. Kjo ndeshje na shërbeu për t’i parë. Nuk është se ishin keq, nuk kishin atë ritmin që kishin në ndeshjen e parë në Islandë, por gjithsesi ishin mirë. Sa i takon lojës, mund të bënim diçka më mirë në mesin e fushës. Mund të dilnim me lehtë në sulm, pasi aty kemi lojtarë shumë të mirë që kombinojnë mirë dhe luajnë shtruar. Gjithashtu vijmë nga një ngarkesë e madhe, pasi ndeshja është të martën dhe kemi punuar shumë këto ditë. Ishte ndeshje testuese dhe menduam gjërat që do të bëjmë me Islandën. Duhet ta nxirrnim topin më shpejt nga mesfusha. Të dy mesfushorët tanë, si Bare dhe Ramadani duhet ta nxirrnin topin më mirë në sulm. Aty çaluam pak. Gjithsesi e përgjithshmja ishte e mirë”, tha për mediat Bushi, që më pas e pranoi se Shpresave do t’u mungojë shumë sulmuesi Durmishaj i dëmtuar. “Në sulm ne kemi problem. Hebaj është lojtar shumë i mirë, por i datëlindjes 1998, dy vjet më i vogël se kundërshtarët. Gjithsesi është lojtar shumë premtues. Durmishaj do na mungojë shumë në këtë ndeshje, ai është ditëlindja 1996, sa kundërshtarët, është një lojtar i fortë, i cili dha dy asiste në Islandë si dhe shënoi edhe gol. Kushdo që do të luajë në sulm, do të bëjë mirë ndaj Islandës”. Të grumbulluar me Kombëtaren U21 janë disa futbollistë të kampionatit tonë dhe kjo vjen edhe prej rritjes së cilësisë së futbollit, që e pranon edhe Bushi. “Normalisht që niveli i kampionatit shqiptar është rritur, pavarësisht se në Kombëtaren A më së shumti lojtarët vijnë nga jashtë. Këtu te U21 kemi shumë lojtarë nga kampionati ynë dhe nuk është se ka ndonjë diferencë të madhe, veçse në ritëm që është një problem. Gjithsesi janë lojtarë shumë premtues. Kemi Dokën e Kallakun, apo Zekën që luan me Lilën dhe është shumë premtues”, përfundoi trajneri Bushi deklaratën e tij.

Tirana – Shqipëria U21       1-0

Shënues: Karabeci 43’ (pen.)

Tirana: Lika, Kërçiku, Turtulli, Uellison, Hoxhallari, Qilimi, Daja, Karabeci, Greca, Sentamu, Ngoo. (U aktivizuan: Çelhaka, Bisha, Habibi, Ahmetaj, Levendi, Cake, Maçovila, Beçka). Trajner: Ze Maria

Shqipëria U21: Selmani, Toli, Tafa, Maloku, Ceka, Ramadani, Bare, Abazaj, çekiçi, Laçi, Hebaj. (U aktivizuan: Kastrati, Nuri, Doka, Duka, Krymi, Kallaku, Halili, Bardhi, Zeka). Trajner: Alban Bushi.

Gjyqtarë: A. Beqiri, R. Shaba, A. Koçiaj, E. Spahiu (Tiranë)

Kartonë të verdhë: Greca 81’

Laj i keq për Alban Bushin, sepse trajneri i Shqipërisë U-21 kishte gjetur ekuilibrat e duhur në sulm me Durmishajn, Abazajn dhe Hebajn. Tani vendin e Durmishajt e merr Jurgen Bardhi, i cili nuk ishte grumbulluar fillimisht, duke paguar edhe faktin që po luan pak te Partizani, ku kriza ka përfshirë klubin dhe lojtarët.

Tani “oreksi” është shtuar, sepse një fitore tjetër ndaj Islandës së fortë na ngjit ndjeshëm në renditje dhe trajneri Alban Bushi është optimist, pasi grupi që ka në dispozicion i jep shpresa të mëdha.

“Islanda është një ekip mjaft cilësor, por e mundëm një herë dhe mund t’ia dalim sërish, pavarësisht se Islanda niset favorite. Në 3 ndeshjet e para kam mbetur shumë i kënaqur nga ekipi. Është eksperienca ime e parë si trajner dhe e kisha pak me frikë, por kam pasur një ndihmë të madhe nga të gjithë dhe lojtarët kanë qenë fantastikë, ndaj kemi luajtur tre ndeshje shumë të mira. Meritonim më shumë, në aspektin e rezultateve, por futbolli i tillë është, ndonjëherë luan mirë e humbet dhe e kundërta”, deklaroi sot trajneri i Shqipërisë U-21, gjatë prezantimit të listës së kombëtares.

Dhjetë lojtarë nga lista me 23 emra janë nga kampionati shqiptar, një lajm i mirë, pasi tregon se po prodhojmë, edhe pse trajneri e pranon se kampionati ka ende shumë punë për të bërë: “Kampionati ynë ka lojtarë interesantë, por ka ende nevojë të rritet në cilësi, edhe pse ka pasur rritje vitet e fundit. Kam grumbulluar disa lojtarë, ka edhe emra të tjerë të piketuar, por dua t’i grumbulloj për një miqësore në nëntor. Ndër këta emra është edhe Jurgen Bardhi, i cili është një lojtar i talentuar dhe është në planet e mia për të ardhmen”.

Bushi zbulon se së shpejti me kombëtaren do të bashkohen edhe dy talente nga Danimarka, të cilët luajnë me Vejlen, aty ku luan edhe Ylber Ramadani: “Mesfushorët Agon Muçolli dhe Arbnor Muçolli, vëllezër që luajnë te Vejle, 19 dhe 18 vjeç, së shpejti do të bëhet pjesë e kombëtares. Presim të marrin pasaportën shqiptare, pasi kanë shprehur gatishmërinë të luajnë për ne, pa u ndikuar nga Ylber Ramadani, sepse i kemi pikasur me kohë, por edhe ai ka folur me ta, natyrisht”.

Në konferencë për shtyp në selinë e FSHF-së, Alban Bushi ka bërë bilancin e ndeshjeve të fundit, duke shprehur kënaqësi jo thjesht për pikët e marra: “Isha në merak si do të reagonte ekipi në dy ndeshjet e para jashtë fushe, por reaguam shumë mirë. Nuk duhej te ishim mundur ndeshjen e parë, por tre pikë në dy ndeshje më kënaqin. Në Irlandën e Veriut kishim përballë një rival shumë të fortë, që kërkonte vetëm të mbronte rezultatin 0-0, që nuk ishte keq as për ne, por u ndëshkuam në fund. Në Islandë ishte kreut ndryshe, dominuam gjithë ndeshjen, duke luajtur mjaft mirë e duke shënuar sa herë na barazonte kundërshtari. Ekipi ka forcë dhe lojtarë kandidatë për ekipin e parë A”.

Bushi shpreson që skuadra e tij të rritet në aspektin e eksperiencës, për të mos dhuruar më pikë: “Ne jemi Shqipëria, një kombëtare e vogël, nuk duhet të shikojmë shumë larg, por të mendojmë për ndeshjen e radhës. Ne nuk pretendojmë vendin e parë, por synojmë fitore në çdo ndeshje. Kemi lojtarë më të vegjël se kundërshtarët dhe mendoj se do të jenë më të rritur edhe sezonin e ardhshëm. Duhet t’i mbaj lojtarët të karikuar, në mënyrë që të mos gabojmë siç bëmë në Irlandën e Veriut. Nuk mendojmë për Spanjën, sepse në 10 tetor presim Islandën në Tiranë. Ndaj Islandës dhe Irlandës janë ndeshje vendimtare për të na treguar nëse do të kapim vendin e dytë ose jo. Kërkojmë mbështetjen e publikut për t’ia dalë mbanë”.

Natyrisht, synimi i Bushit është evidentimi i talenteve për kombëtaren e madhe dhe trajneri i Shqipërisë U-21 nuk e fsheh se që tani disa emra janë gati për hapin e madh, ose do të vëzhgohen me kujdes nga Panuçi: “Mund të veçoj Ndojin e Breshias, apo emra si Laçi e Ramadani. Durmishaj, Bare patjetër, Çekiçi gjithashtu, por janë shumë lojtarë që kam besim se mund të luajnë në ekipin e parë, kemi edhe 19-vjeçarë me të ardhme të shkëlqyer, duke nisur nga Maloku e Toli. Kemi një bashkëpunim shumë të mirë me Panuçin. Gjithmonë do të na njoftojë një ose dy muaj përpara për lojtarët që do të marrë dhe unë do të kem kohë për t’u përgatitur. Kemi shumë lojtarë të mirë dhe edhe nëse na ikin një apo dy nuk do ta kemi problem, përkundrazi, kur ke 23 lojtarë në dispozicion, e ke shumë të vështirë të lësh 5 në tribunë”.

Dje në Islandë erdhi fitorja e shumëpritur, ndaj një rivali superior në faktin se skandinavët kanë vite që luftojnë për kualifikim ose marrin pjesë në Europianë moshash, diçka që ne nuk po e arrijmë dot, edhe se talentet nuk na mungojnë.

Trajneri Alban Bushi, në një prononcim për Supersport, vlerëson në maksimum fitoren e djeshme, duke e quajtur një shpërblim për sforcimin e madh dhe lojën e shfaqur në ndeshjet e shkuara: “E rëndësishme është që kemi krijuar raste, edhe në ndeshjen e parë edhe ndaj Irlandës. Por, ndonjëherë shpërblehesh kur mundohesh dhe krijon raste. Nuk shpërblehesh kot. Për këtë jam edhe më i lumtur, sepse bëmë një lojë shumë të mirë, një paraqitje fantastike. Nuk i lamë hapësira kundërshtarëve.

“Kundërshtarët i kishim pak të vështirë t’i analizonim përpara ndeshjes, sepse analizuam vetëm një ndeshje të përpara gjashtë muajve me Gjeorgjinë dhe është e vështirë. Menduam që topin ta luanim gjithmonë poshtë, ndryshe nga sa ndodhi në Irlandë, ku provuam topat e gjatë. Këtë radhë gjithçka mirë. Luajtëm 4-4-2: mesi funksionoi shumë mirë, krahët hapeshin. Jam i kënaqur sepse skuadra u paraqit mirë në lojë dhe kemi shumë lojtarë premtues për ekipin e parë”.

Tre gola në goditje standarde? “Kam gjithë kohën që u kërkoj lojtarëve të mos shkaktojnë faull. Goli i dytë u pësua shumë lehtë. Problemi lindi që në momentin e shkaktimit të faullit. Me Irlandën shkaktuam shumë faulle, sot më pak. Pjesa më e madhe e ekipit është e ditëlindjes 98, pjesa më e madhe janë pjesë e ekipit edhe për edicionin e ardhshëm. Po luajnë me kundërshtarë dy vjet më të mëdhenj. Të tillë ishin Islandezët, të cilët janë edhe në mesin e sezonit, por sërish ne e dominuan ndeshjen.

Motivimi i skuadrës: “Pas analizave gjatë gjithë javës, përpara ndeshjes thuajse nuk u fola fare djemve. U thashë vetëm pak fjalë: ‘do ta fitoni këtë ndeshje, jeni më të mirë se ata. Islanda nuk ka as Mesi dhe as Ronaldo’. Ndihesh krenar që drejton djem të tillë, sepse kjo është gjëja më e rëndësishme. Natyrshëm që nevojitet edhe kualiteti, të cilin Shqipëria ka nisur ta ketë”.

4 shtatori fatsjellëse, si me Greqinë para shumë vitesh. “Nuk është e rastësishme kjo datë. Por, tani shpresojmë të muaji tjetër, pasi në tetor na vjen Islanda në shtëpi. Të shijojmë këtë fitore që arritëm dhe të mendojmë për ndeshjen tjetër”.

Për fshf.org, trajneri i Shqipërisë tha: “Nganjëherë do të doja të luajmë shumë më keq dhe të fitojmë. Në përgjithësi bëmë një ndeshje të mirë, duke mos u rrezikuar asnjëherë, përveç një momenti në pjesën e parë, kur mbrojtësit tanë u keqkuptuan me njëri-tjetrin. E dinim që do të luanim me një kundërshtar të fortë dhe do të përdornin armën e tyre, duke na sulmuar vetëm me topa të gjatë dhe duke u mbrojtur mirë, por ekipi ynë ishte shumë solid. Nuk u vumë asnjëherë në rrezik. Qarkulluam shumë mirë topin në momente të caktuara dhe arritëm të krijonim 2 raste për shënim që ishin flagrante në pjesën e dytë, me Durmishajn dhe Tafën, por fati nuk deshi. Sulmuam vazhdimisht për ta fituar ndeshjen. Në minutën e 95-të shkaktuam një penallti, që nuk duhet ta shkaktonim në asnjë mënyrë. Vetëm një ekipi kombëtar nuk i lejohet të shkaktojë penallti të tillë. Top i gjatë nga portieri kundërshtar dhe ta krijosh vetë situatën për të bërë penallti, nuk na falet.

“Bare, një lojtar me eksperiencë, duhet ta evitonte atë ndërhyrje, duke parë që kundërshtari me top po shkonte drejt kornes dhe jo drejt portës. Dhe kishin ngelur vetëm 10 sekonda lojë. Kishim mungesa shumë të rëndësishme, dua t’i falënderoj të gjithë lojtarët për shpirtin e garës dhe për atë që dhanë në fushë. Tashme ne e kemi harruar këtë humbje dhe jemi duke përgatitur ndeshjen e radhës me Islandën”.

Alban Bushi ka pasur shumë probleme për ndërtimin e formacionit, sepse grumbullimi nisi me dëmtimet e Bytyqit dhe Seferit, ndërsa është dëmtuar dje edhe Ylber Ramadani, i cili nuk do të luajë. Jo vetëm kaq, sepse Endri Çekiçi nuk ka mundur të marrë vizën britanike dhe nuk do të jetë.

Duke pasur në mendje edhe mungesat, ndaj Irlandës së Veriut do të jetë një Shqipëri sulmuese por dhe shumë e kujdesshme.

FORMACIONI I MUNDSHËM: Selmani, Tafa, Toli, Maloku, Ceka, Doka, Ndoj, Krymi, Bare, Hebaj, Durmishaj.

Më 12 qershor Shqipëria do ta nisë me sfidën shtëpiake kundër Estonisë U-21, sfidë që duhet fituar me çdo kusht, në një grup të ndërlikuar, ku bëjnë pjesë edhe Spanja, Sllovakia, Islanda e Irlanda e Veriut.

Synimi i Shqipërisë U-21, përtej evidentimit të talenteve, është edhe renditja në vendin e tretë në grup.

Ndërkaq, më 5 qershor Shqipëria do të luajë një miqësore në “Selman Stërmasi” kundër Francës U-21, një test i mirë për të kuptuar sa vlen skuadra jonë.

Për sa i përket listës, Bushi ka grumbulluar 25 lojtarë, prej të cilëve 9 janë nga Kategoria Superiore.

Portierët janë Kastrati e Selmani, titullarë te Teuta e Laçi, ndërsa nga Tirana janë afruar Doka, Marlind Nuri e Grent Halili, me Vllazninë që ka në listë Krymin e Hebajn.

Keidi Bare e Endri Çekiçi janë emrat më të njohur nga ata që luajnë jashtë, ndërsa priten me kuriozitet lojtarë pak të njohur në Shqipëri, si Arijan Qollaku i Grasshopers, Emanuele Ndoj i Breshias e Irlian Ceka i të rinjve të Lacios.

Programi i U21:

01/06/2017 ora 19:00 stërvitje, “Stadiumi Besa” i Kavajës
02/06/2017 ora 10:30 dhe ora 19:00 stërvitje, “Stadiumi Besa” i Kavajës
03/06/2017 ora 10:30 dhe ora 19:00 stërvitje, “Stadiumi Besa” i Kavajës
04/06/2017 ora 20:00 stërvitja zyrtare para ndeshjes miqësore ndaj Francës, stadiumi “Selman Stërmasi”
05/06/2017 ora 21:05 ndeshja miqësore Shqipëri – Francë, stadiumi “Selman Stermasi”
06/06/2017 ora 10:00 stërvitje, stadiumi Pogradec
07/06/2017 ora 19:00 stërvitje, stadiumi Pogradec
08/06/2017 ora 10:00 dhe ora 19:00 stërvitje, stadiumi Pogradec
09/06/2017 ora 10:00 dhe ora 19:00 stërvitje, stadiumi Pogradec
10/06/2017 ora 19:00 stërvitje, stadiumi Pogradec
11/06/2017 ora 19:30 Konferenca për Shtyp
12/06/2017 ora 20:00 ndeshja zyrtare Shqipëri U21- Estoni U21 – “Elbasan Arena”