Burg

Bendtner nuk ia hedh drejtësisë, tani e pret burgu!

Sport Ekspres — Wed, 21 Nov 2018 16:11:31 +0000

Ish-sulmuesi i Arsenalit dhe kombëtares daneze Niklas Bendtner nuk ia ka dalë t’i shpëtojë drejtësisë daneze. 30-vjeçari rrahu një taksist në Kopenhagen më 9 shtator pas një debati për faturën e udhëtimit.

Taksisti mbeti me nofull të thyer pas përplasjes fizike me lojtarin dhe iu drejtua organeve të drejtësisë. Bendtner u justifikua duke thënë se veproi në vetëmbrojtje, por gjykata e Kopenhagenit e shpalli fajtor.

Avokatët e futbollistit të Roseborgut e apeluan çështjen, por ditën e sotme prokurori i përgjithshëm i Kopenhagenit konfirmoi se apelimi për rastin e Bendtner nuk është marrë për bazë, çka do të thotë se burgu për të është i pashmangshëm.

Ndërkaq, në mediat daneze raportohet se Bendtner ndoshta nuk ka apeluar fare, duke pranuar dënimin me 50 ditë burg.

Bleu organe në treg të zi, Abidal drejt prangave

Sport Ekspres — Thu, 30 Aug 2018 18:54:48 +0000

Erik Abidal po kalonte muajt më të mirë të jetës së tij. Francezi sapo ishte emëruar drejtor sportiv i Barcelonës, kur papritur një histori e së shkuarës iu rikthye para vetes. Bëhet fjalë për transplantin e mëlçisë që ish-mbrojtësi i Barcelonës kreu në vitin 2011 për t’i shpëtuar tumorit që po shkatërronte mëlçinë e tij.

Problemet ligjore me Abidal kanë të bëjnë me faktin se autoritet spanjolle dyshojnë se Abidal ka blerë një mëlçi në treg të zi, pasi sëmundja e tij po avanconte dhe shanset për të mbijetuar sa vinin e bëheshin gjithmonë e më të vogla.

Në këtë aferë dyshohet se është përfshirë dhe ish-presidenti i Barcelonës, Sandro Rosell, i cili tashmë po vuan një dënim në burg pas akuzave për evazion fiskal. Nëse ish-presidenti katalanas dëshmon për këtë çështje, atëherë Abidal mund të përfundojë pas hekurave.

Rrahu gruan me çekiç, ish-lojtari i PSG-së rrezikon pesë vite burg

Sport Ekspres — Mon, 27 Aug 2018 12:03:28 +0000

Sulmuesi i Nantës Khalifa Kulibali kaloi një javë të tërë në qeli, pasi dyshohej se rrahu bashkëshorten duke përdorur sende të forta ndër to dhe një çekiç.

Sulmuesi, i cili është formuar në akademinë e PSG-së, duket se do t’ia hedhë pa u lagur, pasi gruaja e tij ka tërhequr mbrapsht akuzat dhe ai ka lënë qelinë e paraburgimit.

Por, çështja ende nuk ka mbaruar. Prokurori lokal mund të vendosë ta hetojë rastin në fjalë dhe nëse ndaj Kulibalisë gjenden prova që provojnë se sulmi ka ndodhur, sulmuesi rrezikon deri në pesë vite heqje lirie.

Qëlloi tifozët me armë, Gjykata e Pejës merr vendimin!

Sport Ekspres — Tue, 14 Aug 2018 17:37:45 +0000

Gjykata e Pejës ka shpallur vendimin për shtetasin Arian Sijarina, i cili më datë 20 maj, kur në qytetin e Pejës po zhvillohej ndeshja Prishtina – Drita, qëlloi me armë zjarri ndaj një veture të mbushur me tifozë të skuadrës nga Gjilani.

Gjashtë muaj burg ka qenë dënimi për Sijarinan, i cili akuzohej për veprat penale shkaktim i rrezikut të përgjithshëm dhe për armëmbajtje pa leje. Por, pjesa e mbetur e këtij denimi do shlyhet me anë të një gjobë në vlerën e 600 eurove

Sipas prokurorisë, Arijan Sijarina ishte pasagjer në veturë, së bashku me Albert Kastratin dhe Dardan Dodën, ndërsa pas përfundimit të ndeshjes, në dalje të Pejës, kishte shtënë në drejtim të veturës së tifozëve nga Gjilani e cila po lëvizte para tyre.