breshia

Dëmtimi i rëndë për Ndojin, Breshia hedh sytë nga një tjetër shqiptar

Sport Ekspres — Wed, 31 Jul 2019 10:10:33 +0000

Javën e shkuar Emanuele Ndoj pësoi një dëmtim të rëndë në kyçin e këmbës që pritet ta lërë disa muaj larg fushave të blerta. Mesfushori shqiptar është operuar gjatë ditëve të fundit dhe rruga drejt rikuperimit është e gjatë.

Dëmtimi i 22-vjeçarit ka vënë në lëvizje drejtuesit e Breshias. Sipas medies italiane “Il Giorno”, ndër mesfushorët e shumtë që po shqyrtohen është dhe lojtari me origjinë shqiptare Përparim Hetemaj.

Futbollisti i lindur në Skënderaj është një emër i njohur te Breshia ku ka luajtur për dy sezone (2009/10, 2010/11). Që prej largimet nga Breshia Hetemaj ka qenë pjesë e Kievos tetë sezone radhazi.

Kontrata 32-vjeçarit me klubin veronez mbaron në fund të sezonit të ardhshëm, ndaj mbetet për t’u parë se në çfarë mënyrë do të gjejë presidenti Çelino për ta kaluar këtë pengesë.

Mrekullia e Breshias, vlerësime të shumta për Emanuele Ndoj

Sport Ekspres — Fri, 03 May 2019 10:52:12 +0000

Breshia ka bërë gati-gati një mrekulli me ngjitjen në Serie A për sezonin e ardhshëm, me ekipin lombard që vetëm një sezon më parë ishin në garë për mbijetesë, teksa tashmë festojnë ngjitjen në elitë.

Kjo e gjitha falë presidentit Selino si dhe trajnerit Korini, i cili e mori ekipin në kohë mjaft të vështirë. “Gazzeta dello Sport” ka bërë një listë notash për të gjithë protagonistët e Breshias këtë sezon dhe pjesë e më të vlerësuarve është edhe mesfushori i kombëtares sonë Emanuele Ndoj, për të cilin shkruhej si më poshtë:

Emanuele Ndoj, nota 8. Nga Roma, kaloi te Breshia dhe vendosi ta fitonte Serie A në fushë, një herë e mirë. Shqiptari ka kompletuar një mesfushë perfekte, në të majtë të Tonalit, ndërsa i shkëlqyer edhe si temperament. Këtë sezon ka shënuar 3 gola e ka dhënë 4 asiste, duke luajtur 2182 minuta, i nënti në renditjen e lojtarëve më të aktivizuar te Breshia.

Milani në “pole” për Tonalin, larg mesfushorit e mban vetëm një kusht

Sport Ekspres — Thu, 04 Apr 2019 21:40:18 +0000

Sandro Tonali është një ndër emrat më në zë ditët e fundit në Itali, me talentin që ndiqet nga klubet më të mëdha në Itali. Mesfushori, i cili aktualisht luan për Breshian në Serie B, kërkohet me ngulm edhe nga Milani.

Tonali e ka shprehur prej kohësh që si dëshirë e parë e tij është “djalli”, ndërkohë që kuqezinjtë duhet të bëjnë mirë llogaritë, pasi Breshia kërkon të paktën 20 milionë euro. Dëshirën e 18-vjeçarit, së fundmi e ka thënë edhe agjenti i tij, me Milanin që duket favorit më shumë se kurrë.

Gjithsesi, problemi i vetëm i klubi nga “San Siro” është kualifikimi në Champions. Në rast se arrihet objektivi, atëherë blerja e Tonalit do të jetë diçka e kryer, në rast se Milan nuk e mbyll kampionatin në “top 4”, atëherë sipas gjasave do të heqë dorë nga “Pirlo i ri”.

VIDEO | Breshia shpëton në fund, Ndoj vendimtar me një “silurë”

Sport Ekspres — Wed, 27 Feb 2019 08:00:14 +0000

Emanuele Ndoj ka ndihmuar Breshian të shmangë humbjen ndaj Padovës së vendit të fundit në Serie B. Mesfushori me origjinë nga Mirdita shënoi golin e barazimit 1-1 në fund të takimit dhe realizimi ishte mjaft i bukur.

Ndoj nuk shquhet për shënimin e golave, por këtë sezon ka arritur të gjejë tre herë rrugën e rrjetës. Mesfushori po luan rregullisht si titullar. Ai deri më tani numëron 21 ndeshje në kampionat dhe vetëm në një takim e ka nisur nga stoli.

Sa i takon Breshias, ajo mbetet në vendin e parë në klasifikim dhe numëron 47 pikë në tabelën e klasifikimit. Benevento, që së fundmi mposhti Peskarën e Memushajt, është afruar me 4 pikë dhe ka një ndeshje më pak. Pranë është edhe Palermo, me 42 pikë dhe me një ndeshje të prapambetur që pret ta zhvillojë.

VIDEO | Ndoj heroi i Breshias, penallti e fituar dhe gol spektakolar

Sport Ekspres — Sat, 09 Feb 2019 18:04:12 +0000

Emanuele Ndoj ka gjetur golin e dytë në kampionat për këtë sezon. Mesfushori i kombëtares shqiptare fitoi penalltinë e golit të parë dhe ka shënuar golin e dytë për Breshian në ndeshjen kundër Karpit në shtëpi.

Pjesa e parë është mbyllur me rezultatin 2-1 për Breshian, që është pranë sigurimit të një trepikëshi të rëndësishëm për objektivin Serie A.

Donaruma zhbllokoi rezultatin me anë të një penalltie që u fitua nga 22-vjeçari shqiptar, ndërsa Ronaldo barazoi përkohësisht shifrat për Karpin. Ndoj riktheu vendasit në avantazh me golin e shënuar 8 minuta përpara fundit të pjesës së parë.

Mesfushori mori një pasim nga Donaruma dhe shënoi një gol të bukur me të majtën. Për momentin Breshia vazhdon të jetë në avantazh dhe mbajtja e këtij rezultati i siguron Breshias kryesimin e Serisë B me 42 pikë.