Bordo

Nuk paraqitet në stërvitje, zbulohet destinacioni i Kosielni

Sport Ekspres — Fri, 12 Jul 2019 17:32:52 +0000

Laurent Koshielni ka kaluar nëntë vite me Arsenal dhe mendon se kaq mjafton. Mbrojtësi, i cili është edhe kapiteni i ekipit të Unai Emeri, nuk ka pranuar të paraqitet në stërvitje në shenjë proteste ndaj klubit. Këto të fundit nuk e lejojnë largimin e tij pa asnjë para në këmbim.
Kontrata e 33-vjeçarit skadon verën e ardhshme. “L’Eqiup” raporton se francezi dëshiron me patjetër të transferohet në atdheun e tij te klubi i Bordo. Arsenal e ka refuzuar këtë kërkesë të mbrojtësit dhe situata është ndërlikuar mjaft, me lojtarin, që e pret një gjobë e majme.

Përveç gjobës, francezi nuk do të lejohet të trajnohet me ekipin e parë, por do e bëjë këtë me të rinjtë. Shiriti i kapitenit as nuk mund të mendohet më. Granit Xhaka është kandidati kryesor për ta marrë atë. Tashmë Koshielni po kërkon në çdo mënyrë largimin, me Bordonë që është e hapur nëse lojtari zgjidh gjithçka me Arsenalin.

VIDEO | Mjafton Kavani, PSG vazhdon dominimin

Sport Ekspres — Sat, 09 Feb 2019 17:53:07 +0000

PSG i ka mjaftuar një gol i Edinson Kavanit për të siguruar fitoren kundër Bordosë. Arbitri akordoi një penallti të dyshimtë për vendasit dy minuta përpara fundit të pjesës së parë dhe sulmuesi uruguaian u tregua i saktë, duke i dhuruar tre pikë të tjera ekipit të tij.

Përballja nuk dhuroi më gola dhe i gjithë takimi u mbyll me fitoren e vendasve. Ky sukses e ngjit PSG në kuotën e 59 pikëve, ndërsa Lila e vendit të dytë është 13 pikë larg.

Miqtë zhvilluan një ndeshje të mirë dhe bllokuan sulmin e ekipit të Tuhel. Bordo renditet në vendin e 12-të me 28 pikë dhe objektivi për të zënë një vend në Europë është komplikuar.

PSG-Bordo 1-0
(Kavani (pen) 43’)

Gafa e vitit, Bordo harron të shënojë lojtarin në listën e Europa League

Sport Ekspres — Fri, 07 Sep 2018 19:28:35 +0000

Klubi i Bordosë është kthyer në objekt talljesh në Francë, pasi dikush në administratën e klubit ka kryer një gabim trashanik. Çështja ka të bëjë me listën e dërguar në UEFA për edicionin 2018/2018 të Europa League, ku në mënyrë të pabesueshme është harruar një lojtar tepër i rëndësishëm.

Bëhet fjalë për afrimin e merkatos së verës, Toma Bashiç. Talenti kroat u ble për katër milionë euro nga Hajduku i Splitit dhe mendohet si ardhmja e mesfushës së klubit, por gabimi në hartimin e listës do ta privojë atë nga pjesëmarrja në Europa League.

Presidenti i Bordosë pranoi gabimin gjatë një dalje për shtyp: “Fatkeqësisht dikush në administratën e klubit bëri një gabim shumë të madh. Nuk kemi çfarë të bëjmë. Duhet të shpresojmë që të kalojmë grupin dhe vetëm atëherë mund ta regjistrojmë lojtarin e lënë jashtë liste”

Vjen shansi i artë për Henrinë, klubi francez i beson pankinën

Sport Ekspres — Wed, 22 Aug 2018 11:06:25 +0000

Mbaron pritja për Tieri Henrinë. Sipas raportimeve të medieve franceze, skuadra e Bordosë ka rënë dakord për t’ia besuar atij stolin e lënë bosh pas shkarkimit të trajnerit uruguaian Gus Pojet. Kjo do të jetë eksperienca e parë si trajner e ish-sulmuesit francez.

Vetëm pak javë më parë Henri ishte shumë pranë firmës me Aston Vilën, por në momentin e fundit, klubi anglez vendosi të refuzonte aplikimin e Henrisë. Gjatë karrierës së tij Henri ka punuar me trajnerë të mëdhenj si Arsen Venger dhe Pep Guardiola, ndërsa për disa vite punoi dhe në Angli si analist futbolli për “Sky Sports”.

Gjithsesi mësimet më të vyera Henri i ka marrë në stolin e kombëtares së Belgjikës, ku punoi si asistent i spanjollit Roberto Martinez për dy vite me radhë. Te Bordoja, nuk do ta ketë aspak të lehtë, ekipi është dobësuar ndjeshëm pas ikjes së Malkom, ndërsa ardhjet kanë qenë të pakta.

Shkarkuan “rebelin” Pojet, ish-kampioni i botës pranë stolit të Bordosë

Sport Ekspres — Fri, 17 Aug 2018 21:04:38 +0000

Bordo është në kërkim të një trajneri për të zëvendësuar uruguaianin Pojet. Ky i fundit shpërtheu në akuza kundër klubit dhe drejtuesit e klubit francez vendosën për ta shkarkuar.

“Ajo që bëri klubi sot me shitjen e Labord është e turpshme. U kisha thënë drejtuesve që të mos e shisnin pa gjetur zëvendësuesin, por nuk më dëgjuan dhe e shitën pa më njoftuar fare. Është dita më e keqe që kur jam te Bordoja. Ndoshta duhet të largohem”, ishin fjalët e Gustavo Pojet në fund të ndeshjes së fituar me Mariupolin, që bëri të mundur avancimin e Bordosë në fazën “play-off” të Europa Ligës.

Tieri Henri është emri që qarkullon për stolin e Bordosë. Ish-sulmuesi i famshëm francez është dëshira kryesore e presidentit Stefan Martin siç citon “Radio Montecarlo”.

Henri ishte pjesë e stafit të Belgjikës në Botërorin e Rusisë dhe tashmë është gati për të nisur eksperiencën e parë si trajner. Bordo kërkon shërbimet e tij, duke i besuar stolin e ekipit dhe në vijim do të mësohet më shumë për vazhdimësinë e kësaj tratative.

Përveç legjendës së Arsenalit, kandidaturat e tjerë që përfliten për stolin e Bordosë janë: Jurgen Klinsman, Lorent Blank dhe Remi Garde.

Ben Arfa një vit pa luajtur, por Bordos nuk i intereson

Sport Ekspres — Tue, 31 Jul 2018 17:20:57 +0000

Hatem Ben Arfa ka qenë një ndër futbollistët më premtues të futbollit francez, por njëkohësisht edhe një ndër futbollistët më me ulje dhe ngritje, forma e vazhdueshme për më shumë se një sezon nuk ekziston në fjalorin e franko-tunizianit.

Sezoni fantastik i tri sezoneve më parë me klubin e Nicës ku shënoi 17 gola në 34 ndeshje i siguroi Ben Arfas një kontratë marremendëse prej tetë milionë eurosh në sezon nga skuadra e PSG-së, por pavarësisht pagesës me shifra astronomike, problemet për Ben Arfan nuk mbaruan. Zënka të vazhdueshme me trajnerin Unai Emeri, që u pasuan me dënim shembullor me një vit të plotë pa qoftë dhe një aktivizim të vetëm.

Tani fantazisti 31-vjeçar është një lojtar i lirë dhe kërkon që të provojë më në fund shijen e të luajturit një ndeshje profesioniste. Pavarësisht se ka një vit pa luajtur, klubet franceze po e konsiderojnë firmën me të. Sipas “L’Equipe”, ekipi më afër firmës me Ben Arfan është Bordoja. Drejtuesit e skuadrës e konsiderojnë atë si zëvendësuesin ideal të brazilianit Malkom, i cili u transferua te Barcelona për shifrën e 40 milionë eurove.

Olajinka zgjodhi Slavian para klubit të madh francez

Sport Ekspres — Mon, 30 Jul 2018 08:07:17 +0000

Piter Olajinka shkëlqeu me Zulte Varegem dhe kjo bëri shumë klube të visheshin pas tij. Gjithsesi ofertën më bindëse e bëri Slavia e Pragës. Sulmuesi nigerian tashmë është transferuar në Çeki dhe për kartonin e tij u paguan 3.2 milionë euro.

Për belgët e Gent ky ishte një biznes me leverdi, pasi sulmuesi nuk luajti asnjë ndeshje me ta dhe në fund arritën të përfitojnë një shifër të “majme”. Por gara për Olajinkën ka qenë e fortë. Oferta për të kanë bërë edhe nga Gjermania, Rusia dhe Franca, por ish-sulmuesi i Skënderbeut e kishte ndarë mendjen.

Mes klubeve të shumta që e kërkonin ishte edhe Bordo, francezët që garojnë në Ligue 1. Do të ishte një sfidë e madhe për Olajinkën transferimi te ky ekip, por Slavia ishte më këmbëngulëse dhe në aspektin financiar ofroi më shumë.