Bonaventura

Bonaventura kalon me sukses operacionin, por kuqezinjtë duhet ta presin gjatë

Sport Ekspres — Tue, 27 Nov 2018 17:42:23 +0000

Dëmtimet i janë kthyer në makth Milanit. Gatuzo është tepër i shqetësuar, pasi pjesa më e madhe e lojtarëve që ai i konsideron titullar kanë mbushur infermierin dhe një pjesë prej tyre duhet që të qëndrojnë shumë muaj jashtë. Merkato e janarit duket larg për kuqezinjtë që deri në dritaren dimërore duhet të luajnë disa ndeshje të rëndësishme.

Ashtu siç pritej, Xhek Bonaventura i është nënshtruar ndërhyrjes kirurgjikale sot. Mesfushori ishte vërtetë i pafat pasi nuk mundi që të luante më shumë se 8 ndeshje këtë edicion dhe tani i duhet të presë dhe shumë gjatë për t’u rikthyer në fushat e blerta.

Rreth 9 muaj pritet që të zgjasë periudhë e rikuperimit për 29-vjeçarin, i cili në verën e ardhshme mund të jetë gati për Milanin. Një lajm i keq për tifozët kuqezi, pasi 9 muaj janë vërtetë shumë dhe Bonaventura vështirë se do të jetë i njëjti, duke parë që edhe mosha sa vjen e rritet dhe një periudhë kaq e gjatë larg fushe do të ndikojë në formën e tij.

Vazhdon “mallkimi” i dëmtimeve te Milani, mesfushori mbyll sezonin

Sport Ekspres — Mon, 19 Nov 2018 17:26:22 +0000

Vazhdon makthi i dëmtimeve te Milani. “Fatkeqi” i radhës është Xhek Bonaventura. Mesfushori pësoi një dëmtim në ligamentet e gjurit në fund të muajit tetor dhe pritej të qëndronte larg fushave për pak më shumë se një muaj. Por, analizat e mëtejshme kanë zbuluar shkallën e vërtetë të dëmtimit.

Italiani ka pësuar një mikrotraumë në kartilag dhe për këtë do t’i nënshtrohet një ndërhyrje kirurgjikale në Shtetet e Bashkuara të Amerikës. Sezoni i 29-vjeçarit mund të quhet i mbyllur, pasi periudha riaftësimit pritet të zgjasë 7 ose 8 muaj.

Pas kësaj goditje tepër të fortë bëhet e domosdoshme një ndërhyrje tjetër në merkaton e janarit për të shtuar kontingjentin në repartin e mesfushës, krahas brazilianit Lukas Paketa, marrëveshja për të cilin u mbyll gjatë muajit të kaluar.

Bonaventura ndalet, vetëm operimi e “shpëton”

Sport Ekspres — Thu, 15 Nov 2018 11:48:17 +0000

Ky është një lajm i keq për Milanin dhe Xhenaro Gatuzon. Kishte pak shpresë, por është i pashmangshëm operimi për Xhakomo Bonaventurën. Mesfushori i kuqezinjve kishte një problem në gjurin e majtë dhe tashmë duhet të bëjë një ndërhyrje.

Dhimbjet e gjurit prej një muaji po e penalizojnë Bonaventurën, që tashmë pritet të mungojë për të paktën tre muaj për Milanin. Rikuperimi i tij mund të shkojë edhe deri në pesë muaj, ndaj kuqezinjtë duhet të mendojnë të lëvizin në merkato.

Kështu, pas Lukas Bilia, një tjetër lojtar i mesfushës do të mungojë për një kohë të gjatë. Gjithashtu të dëmtuar janë edhe Matia Kaldara dhe Mateo Musakio. Janari duket se do të jetë i nxehtë për kuqezinjtë, që duhet të bëjnë disa lëvizje ekstra për shkak të dëmtimeve.

Milani “i sakatuar”, tjetër goditje e rëndë në mesfushë

Sport Ekspres — Tue, 13 Nov 2018 17:49:58 +0000

Milani nuk po kalon një moment të mirë për sa i përket dëmtimeve, teksa Lukas Bilja, Musakio, Kaldara, Kalabria apo dhe Bonaventura janë në infermieri. Ditën e sotme kuqezinjtë kanë marrë të reja të tjera në lidhje me situatën e Bonaventurës.

Sipas asaj që raportohet, mesfushorit kuqezi duket se do t’i duhet një operacion, për të zgjidhur problemet që ka në gju. Situata paraqitet më seriozë nga çfarë shihej në fillimi dhe 29-vjeçari do të përgatitet për ndërhyrje kirurgjikale.

Kjo do të ishte një tjetër goditje e rëndë për kuqezinjtë, pasi Bilja do të mungojë për 4 muaj, Kaldara për 3 muaj, si dhe Musakio do të jetë për më shumë se 2 muaj. Bonaventurës gjithashtu do t’i duhen disa muaj për të rikuperuar dhe tashmë dhimbja e kokës për Gatuzon shtohet akoma më shumë.