VIDEO | Goleadori dhe “boksieri” Asani, sulmuesi shpjegon gjithçka

Sport Ekspres — Sun, 03 Feb 2019 19:28:32 +0000

Jasir Asani ishte protagonisti absolut në sfidën kundër Kamzës. Me golin e tij në minutën e 56’, sulmuesi i dha një fitore shumë të rëndësishme “Demave”. Përveç golit, Asani bëri edhe një ndeshje shumë të mirë, ku me driblimet dhe shpërthimet e tij ishte rrezik konstant për kundërshtarët.

Mbrojtësi i djathtë i Kamzës, Bonani pati një ditë shumë të vështirë përballë Asanit dhe duelet mes tyre ishin të shumta. Por, dueli më i përfolur ishte ai i sekondave të fundit të sfidës, që e kaloi aspektin sportiv. Të dy futbollistët shkëmbyen goditje me duar, por i shpëtuan kartonit të kuq.

Pas ndeshjes, Asani foli për mediat e pranishme në stadium, ku komentoi dhe për këtë ndeshje “boksi” me Bonanin. “Çfarë ndodhi me Bonanin? E kam shok, por normal, në fushë ndodhin dhe ato situata të tilla. Mbetemi shokë”,- u shpreh sulmuesi i “Demave”.

Bonani: Superiorja si Seria B, do të mbijetojmë

Sport Ekspres — Sun, 02 Dec 2018 15:24:45 +0000

Klaudio Bonani ishte lojtari i ndeshjes dhe në emisionin “Gol pas Goli” foli për pikën e marrë në Laç. Italiani nuk nguroi që ta krahasonte Kategorinë Superiore me Serinë B.

VLERËSIMI – “Jam i kënaqur që jam lojtari i ndeshjes. Sot bëmë një ndeshje të mirë dhe ishim një ekip kompakt. Është meritë e gjithë skuadrës. Ndihem i vlerësuar që jam veçuar si më i miri sot”.

EKIPI – “I kam parë të gjitha skuadrat. Kemi një ekip që mund të qëndrojë në Superiore. Kemi cilësi dhe duhet të mendojmë ndeshje pas ndeshje, të japim më të mirën tonë dhe të shohim se çdo të ndodhë. Jam i bindur se do të qëndrojmë në elitë”.

KRAHASIMI – “Është një kampionat i cili mund ta krahasoj me Serinë B në Itali. Ka cilësi dhe kërkon shumë impenjim fizik. Jam i kënaqur që jam këtu”.