Ne fjalën e tij ai ka theksuar se te Tirana nuk do të ketë më probleme borxhesh apo licencimi. “Tirana synon gjithmonë titullin, pjesëmarrjen në Kupat e Europës. Sa i takon licencimit, ne kemi bërë shumë pagesa. Nuk do diskutohet më pjesa e borxheve dhe e licencimit”, është shprehet Nallbani.

MERKATO – Në lidhje me lëvizjet e bëra këtë verë, ai shtoi: “Kemi bërë tre blerje të fuqishme, jemi në tratativa për dy afrime, duke nisur nga porta. Ilion Lika është portier shumë i mirë, ka emër të madh dhe nuk ka nevojë për komente. Por mosha nuk ta lejon të përballosh një sezon nga fillimi në fund. Kemi nevojë për portier, një mbrojtës qendre dhe një sulmues goli”.

AKSIONET – Nallbani, lajmet për shitjen e aksioneve të bashkisë, i konsideron si një sulm. Në fakt ka qenë vetë presidenti Refik Halili ai që ka deklaruar me zë e figurë në Supersport se te Tirana do të afrohej një tjetër donator. Gjithsesi media shpesh herë është shënjestruar, thua se i shet ajo aksionet, apo ia ka krijuar ajo borxhet ndër vite klubit të Tiranës.

“Nuk ka rëndësi kush i merr aksionet e bashkisë. Ku janë këta njerëz që duan ta marrin, le të vijnë?! Hidhet helm në momentet më kritike, kur ne kishim shumë ndeshje të rëndësishme. Kemi 2-3 vjet që vuajmë. Pse pikërisht në atë moment hapet puna e aksioneve?! Duan të godasin klubin e Tiranës dhe presidentin, ndaj edhe rrinë e bëjnë lojëra fjalësh”, është shprehur Nallbani mes të tjerash.

Ish-portieri, në lidhje me situatën në klasifikim dhe sfidën e nesërme, për “SportEkspres.com” deklaron: “Lufta për titullin kampion nga kjo ndeshje do të zbardhet edhe më shumë. Një fitore e Kukësit e mban në lojë, ndërsa barazimi i jep më shumë shanse skuadrës së Partizanit. Natyrisht që kjo merr edhe ngjyrat e një kryendeshjeje, pasi përballen dy skuadrat më të mira të Kategorisë Superiore”.

Nallbani, si ish-portier i Partizanit në sezonin 2001-2002, kujton fitimin e Kupës së Shqipërisë dhe thekson se të kuqtë janë më të uritur për të fituar. “Në sezonin 2001-2002 Partizani ka fituar trofeun e Kupës së Shqipërisë, me trajner Sulejman Memën. Unë kam qenë në portën e Partizanit në atë sezon, e duke qenë një periudhë kaq e gjatë për një skuadër të madhe, e shikoj Partizanin më të të uritur për trofe. Titullin kampion e ka shumë pranë, sido që të dalë në sfidën me Kukësin”.

AGRON KAJA

Në këndvështrim i tij, ish-portieri i Tiranës, Partizanit e Kombëtares, mendon se rivaliteti në 16 ndeshjet e mbetur ta kampionatit do të jetë i madh te të gjitha skuadrat. Këtë ai e mbështet jo vetëm te situata që skuadrat kanë në renditje dhe te synimet e tyre, por edhe te mundësitë reale që ato kanë. Nga kreu, në fundin e renditjes, Nallbani parashikon një luftë sportive pa kompromis.

INTERVISTOI: AGRON KAJA

Tirana në kampionat dhe Kupë, si e përshkruani situatën në ndeshjet e luajtura gjatë muajit janar?
-Vetë rezultatet që ka arritur Tirana në të dy kompeticionet, kampionat dhe Kupë, tregojnë ndryshim cilësor të saj. Në gjysmën e parë të këtij sezoni nuk ishin shprehur plotësisht vlerat e skuadrës, ndoshta edhe nga ndryshimi i trajnerëve që u bë në mesin e kampionatit.

Me ndryshimin e trajnerit, çfarë mendoni se ka ndryshuar te Tirana në këtë periudhë?
-Ekipi i Tiranës ka në përbërje shumë lojtarë cilësorë, por skuadrës më parë i ka munguar besimi te vetvetja për rezultate më të mira. Këtë mendoj se e ka rikthyer mentaliteti bardheblu i trajnerit Ardian Mema, të cilin e veçoj si pozitiv në ndryshimin që ka bërë te skuadra në këtë tregues.

Mendoni se shkaqet e situatës së Tiranës kanë qenë edhe në marrëdhëniet financiare, apo edhe në të tjera probleme me klubin?
-Unë kam informacionin e plotë se në anën financiare skuadra nuk ka patur probleme. Nëse ka ende një muaj pa u shlyer, kjo ndodh kudo në çdo fillim viti. Gjithsesi, unë mendoj se problemi kryesor te Tirana ka qenë ana psikologjike pas rezultateve jo të mira në fillimin e sezonit.

Ku e mendoni Tiranën më të mirë në këtë sezon, në Kupë apo në kampionat?
-Në të dy kompeticionet unë mendoj se Tirana ka qenë në rritje graduale. Në kampionat besoj se do të ecë mirë dhe me këtë paraqitje duket se do ta synojë edhe zonën për një vend në Europë. Nërsa Kupa është trofeu i vetëm që Tirana këtë sezon mund ta ketë më pranë.

Po Superioren në tërësi, si e lexoni nga kreu në fundin e renditjes?
-Skuadrat janë në renditje për atë që kanë dhënë në këto 20 javë. Nisur nga fundi, ato nuk janë shprehur plotësisht në vlerat e tyre. Kamza ka diçka që po e pengon, Luftëtari e Kastrioti kanë ndryshim pozitiv pas trajnerëve të rinj, ndërsa Flamurtari po ndikohet ende nga psikologjia e kaluar.

Për kreun e renditjes, mendoni se gjithçka mes Partizanit e Kukësit do të jetë në rivalitet deri në fund?
-Edhe mund të ndodhë kështu, sepse rivaliteti e bën edhe më të bukur luftën për titullin kampion. Por Partizani duket më i qëndrueshëm në rezultate, ndërsa Kukësi po bind më shumë me lojën. Mes këtyre dy treguesve do të kemi skuadrën kampione në këtë sezon. Gara mes tyre mbetet e hapur.