Bilanc

“Kampionati i trajnerëve”, zbuloni lëvizjet e pafundme në të Parën!

Sport Ekspres — Mon, 08 Apr 2019 09:39:27 +0000

Një kampionat më vetë në Kategorinë e Parë janë ndryshimet e trajnerëve, teksa i fundit që ka braktisur detyrën e tij është Bledar Sinella. Tekniku kavajas ishte në krye të Egnatias, që së fundmi ka pasur probleme financiare dhe humbi edhe trajnerin. Zgjidhjen e kishte të menjëhershme, teksa emëroi Ilir Duron.

Të parët që e çelën këtë “kampionat” ishin Ndriçim Kashami te Besëlidhja e Vladimir Gjoni tek Egnatia. Po kush janë “kampionët” deri tani? Padyshim që Egnatia kryeson me katër lëvizje në stolin e saj. Matjani u pasua nga Duro, ndërsa më pas ishte Sinella ai që u emërua. Lëvizja tjetër në horizont ëshët ajo e Agim Canajt, te Vllaznia. E paqartë situata e vlonjatit, edhe pse klubi e ka konfirmuar qëndrimin e tij.

Elbasani dhe Apolonia janë drejtuar nga tre trajnerët këtë sezon, madje fierakët patën edhe një serb në krye: Rade Miliç. Erzeni, Besëlidhja, Burreli, Shënkolli, Tomori dhe Besa gjithashtu kanë ndryshuar trajnerë këtë sezon. Pra, gjysma e ekipeve kanë ndryshuar trajnerë, kurse pjesa tjetër kanë menduar të vazhdojnë me ata që e kanë nisur sezonin.

AGRON KAJA

Inter dhe Roma bëjnë llogaritë, bilancet vjetore janë zhgënjyese

Sport Ekspres — Sat, 27 Oct 2018 07:19:18 +0000

Drejtuesit e Interit dhe Romës kanë publikuar sot bilancet financiare për periudhën 30 korrik 2017 – 30 korrik 2018. Rritjet e investimeve si te zikaltrit, por edhe te verdhekuqtë kanë bërë që të dyja skuadrat të regjistrojnë bilance negative.

Roma është klubi që ka regjistruar humbjen më të madhe. Skuadra në pronësi të amerikanit Xhejms Palota ka pasur një xhiro vjetore rekord prej 325 milionë Euro, ndërsa humbjet kanë qenë 25 milionë Euro. Shifër kjo që shpjegon edhe largimet e menjëhershme te lojtarëve si Naingolan, Alison dhe Strotman, shitjet e të cilëve sollën 110 milionë euro në arkat e Romës dhe do të llogariten në bilancet e vitit që vjen.

Ndërkohë, Interi ka regjistruar një humbje prej 17 milionë Eurosh, një minus ky që pritet të balancohet vitin e ardhshëm me të ardhurat që do arkëtohen nga pjesëmarrja në Champions League, kompeticion që i mungonte klubit zikaltër prej gjashtë vitesh.

Vjen një lajm i keq për Juventusin, fajin e ka Ronaldo

Sport Ekspres — Thu, 13 Sep 2018 20:28:02 +0000

Gjatë viteve të fundit Juventusit ka qenë një shembull për të gjithë klubet e futbollit në aspektin e menaxhimit. “Zonja e vjetër” ka deklaruar fitime për disa vite radhazi. Por, bilanci për publikuar ditën e sotme për vitin 2017-2018 ka surprizuar shumë vetë.

Kampionët e Italisë kanë regjistruar një bilanc negativ prej 19.2 milionë eurosh, shifër kjo që ka ardhur për shkak të shpenzimeve të shumta në merkaton e vitit të kaluar, ku për lojtarë si Bernardeski, Matuidi, Kaldara, Kuadrado dhe De Shiljo u paguan shuma të konsiderueshme parash.

Por, një tjetër faktor i rëndësishëm ka qenë edhe eliminimi në fazën çerekfinale të Champions-it, ndaj Realit, ku ishte pikërisht Kristiano Ronaldo ai që i nxorri jashtë gare me një 11-metërsh në minutat e fundit, që u shoqërua me shumë polemika.

Në rast se Juventusi do të arrinte të kualifikohej ndaj spanjollëve, në arkat e klubit do të derdhen të paktën 12 milionë euro nga biletat, të drejtat televizive dhe shpërblimi i UEFA-s. Shumë kjo që do ta zbuste në mënyrë të konsiderueshme humbjen në bilancin përfundimtar.