Arbër Beqaj bëhet afrimi i dytë zyrtar i Teutës. Ashtu siç ishte lajmëruar prej dy javësh nga “Sport Ekspres”, 18-vjeçari ka hedhur të zezën mbi të bardhë ditën e djeshme. Pas Ante Hrkiç, Beqaj është prezantuar zyrtarisht nga drejtuesit e klubit durrsak. Trajneri Gugash Magani i njeh mirë aftësitë e mbrojtësit, pasi e ka pasur pjesë të skuadrës në kohën kur drejtonte Flamurtarin. Sezonin që shkoi, mbrojtësi i djathtë u aktivizua në 15 ndeshje, 12 prej tyre si titullar. Me ardhjen e trajnerit Duro në Vlorë, Beqaj e humbi vendin e titullarit, duke u detyruar të shihte për një tjetër mundësi. Dhe me ofertën nga “djemtë e detit” nuk u mendua dy herë. Në të djathtë të mbrojtjes, trajneri peqinas u detyrua shumë herë gjatë sezonit të fundit që të përshtaste Hodon apo Beqjan në këtë pozicion.

VATA – Me skuadrën durrsake është bashkuar dhe portieri 19-vjeçar Elton Vata. Kuksiani, i cili është aktivizuar gjatë sezonit të fundit me skuadrën e Laçit, është rikthyer te durrsakët, pasi i ka përfunduar periudha e huazimit. Me kurbinasit, Vata u aktivizua në tre takime, konkretisht me Kukësin, Skënderbeun dhe Teutën. Performanca e mirë e treguar jo vetëm me skuadrën e parë, por dhe me 19-vjeçarët, i ka bindur drejtuesit durrsakë që ta kenë në planet e sezonit të ardhshëm.

Vladimir Prenga

Ante Hrkaç ishte afrimi i parë i Teutës, ndërkohë që i dyti është Arbër Beqaj, me të cilin është arritur akordi prej gati dy javësh. “Sport Ekpsres” ka raportuar më parë për interesimin e klubit durrsak për vlonjatët, ndërkohë që sot 18-vjeçari do të jetë nën urdhrat e trajnerit Gugash Magani. Beqaj njihet mirë nga trajneri Magani, pasi e ka pasur nën urdhrat e tij gjatë kohës që ka drejtuar Flamurtarin, ndaj edhe është bërë kjo lëvizje. Mbrojtësi i djathtë vjet u aktivizua në 15 ndeshje, 12 prej tyre si titullar. Më së shumti ai luajti në pjesën e parë të sezonit, ndërsa në vitin 2017 ai luajti vetëm në katër përballje dhe preferencë e parë për trajnerin Duro ishte vetëm në përballjet me Tiranën dhe Teutën. Mungesa e hapësirave ka bërë që Beqaj të shohë për ndonjë tjetër opsion dhe tashmë do t’i bashkohet “djemve të detit”.

Durrsakëve u duhej një futbollist në atë pozicion, pasi trajnerit Magani i është dashur të përshtatë Bledar Hodon dhe Fabjo Beqjan si mbrojtës të djathtë, edhe pse nuk është pozicioni i tyre natyral. Veç Beqajt, durrsakët do kërkojnë të afrojnë edhe një tjetër lojtar për linjën e djathtë të prapavijës, ndërsa problemi kryesor është gjetja e një mbrojtësi të majtë, pasi me largimin e Kotobellit ai krah ka mbetur zbuluar. Gjithashtu po punohet për të gjetur edhe në pozicione të tjera, në mesfushë e sulm. Reparti i avancuar është i boshatisur për momentin, pasi Ribaj, Magani dhe Bangal u larguan me mbylljen e sezonit dhe tanimë po kërkohet në tregun e huaj për të gjetur një goleador, pasi vjet skuadra durrsakë ka vuajtur shumë për të gjetur rrugën e rrjetës.