Bepe Marota

Marota flet me stil, i thur elozhe Kontes dhe i refuzon kërkesën

Sport Ekspres — Tue, 30 Jul 2019 15:31:38 +0000

Marota dhe Antonio Konte gëzojnë një marrëdhënie shumë korrëkte dhe miqësore. Ata kanë punuar për disa vite së bashku te Juventusi. Marota zgjodhi ta sjellë te Interi dhe t’i besojë italianit një rol të rëndësishëm në projektin e ri.
Në eventin që u organizua për shpalljen e kalendarit të Serie A, drejtori zikaltër u pyet edhe mbi punën e Kontes dhe pritshmëritë rreth tij. Duket shumë entuziast dhe nuk nguron ta ngrejë në piedestal trajnerin mbi aftësitë e tij. I jep të drejtë për kërkesat në merkato, por thekson se nuk do tentojnë aventura financiare.

“Konte ka sjellë entuziazëm, pasion dhe një kulturë pune. Këto janë elementët më të rëndësishëm. Ai tregon pasion të madh dhe është e drejtë që trajnerët të kërkojnë sa më shumë lojtarë cilësorë, në mënyrë që ata të mund të funksionojnë edhe më mirë. Ne kemi besim se do krijojmë një skuadër konkurruese.

“Pronarët tanë janë shumë të fortë, por me të drejtë, ne duhet të respektojmë ndershmërinë financiare. Do të shfrytëzojmë mundësitë që do na jepen, por nuk do guxojmë aq shumë. Kemi bërë investime të shkëlqyeshme dhe po ecim përpara me punën tonë”, përfundoi Xhuzepe Marota.

Takim në Kinë, Konte flet “troç” me drejtuesit

Sport Ekspres — Tue, 23 Jul 2019 13:24:33 +0000

Antonio Konte është nga ata trajnerë që të vendosin kushte. Italiani sheh nga ana tjetër, në Torino, që kanë shpërthyer në blerje dhe tenton të marrë situatën në dorë te kampi i tij. Siç raportojnë mediet përtej Adriatikut, tekniku ka pasur një takim kokë më kokë me të gjithë drejtuesit, duke përfshirë drejtorët sportiv, Marota dhe Auzilio dhe presidentin Zhang.
Në bisedë Konte ja ka bërë të qartë eprorëve se dëshiron prurje të reja për të ndërtuar një skuadër më kompetitive. Drejtuesit nga ana e tyre mundohen të tregohen të kujdësshëm dhe para se t’i përmbushin “tekat” trajnerit, zgjedhin të studiojnë bilancet financiare.

Në një intervistë, Marota u shpreh se shtë dakort me trajnerin, por nuk premton investime të shtrenjta. ”Tregu nuk ka ardhur ende në jetë. Do veprojmë në qetësi, duke respektuar ekuilibrin financiar. Po kërkojmë studiojmë dy tipe lojtarësh, një me përvojë dhe një të ri”, deklaroi drejtori i përgjithshëm zikaltër.

Ikardi-Naingolan, kjo deklaratë i largon nga Interi

Sport Ekspres — Sat, 06 Jul 2019 12:44:11 +0000

Interi i ri po merr formë me lojtarë, që po vijnë e me të tjerë me valixhe në duar. Konte dhe Marota i kanë idetë e qarta se kush e meriton të qëndroje dhe kush jo. Drejtori në një intervistë për mediet vendase i ka treguar në mënyrë të drejtpërdrejtë derën dy lojtarëve, Naingolan dhe Ikardit.

Belgu ka treguar vazhdimisht paqëndrueshmëri në sjelljen e tij jashtë fushe. Futbollin nuk e konsideron si aktivitetin kryesor dhe nuk heziton aspak “të shijojë” jetën duke pirë dhe kaluar netë të zjarrta nëpër klube natë. Ndërkohë, çështja Ikardi dihet dhe është bërë virale tashmë. Argjentinasi i ka prishur prej kohësh marrëdhëniet me klubin dhe Marota shprehet se ai është në merkato.

“Duhet të tregohemi që pastër dhe transparentë. Ikardi dhe Naingolan janë lojtarë të përsosur, por kjo nuk mjafton për projektin tonë. E them me transparencë dhe me respekt se Ikardi është në merkato, gjithmonë duke respektuar marrëveshjen kontraktuale”, foli hapur Marota.

Marota “ngel në klasë” mbrojtësin, fillon sulmi për lojtarin e kombëtares shqiptare

Sport Ekspres — Mon, 21 Jan 2019 09:23:35 +0000

Elseid Hysaj nuk po kalon një moment të mirë te Napoli. Pas dy sezoneve si titullar i padiskutueshëm, mbrojtësi shqiptar ka humbur vendin në formacioni e skuadrës së Karlo Ançelotit. Situata mes klubit dhe lojtarit nuk është më e mira e mundshme,dhe për këtë mjafton të lexosh një ndër qindra deklaratat agjentit të tij Mario Xhufredi, i cili s’është kursyer me kritikat ndaj klubit napolitan.

Për muaj të tërë në shtypin italian dhe anglez u fol për një kalim të shkodranit te Çelsi, ku do të ribashkohej sërish me Mauricio Sarrin, por zërat që flasin për këtë skenar janë bërë gjithnjë e më të pakët. Megjithatë, për një lojtari të kalibrit të Hysajt nuk mund të mungojë interesi i klubeve “BIG”.

Botimi i sotëm i gazetës së njohur “Tuttosport”, vjen një lajm shumë i bujshëm. Sipas medies italiane Hysaj ka tërhequr vëmendjen e administratorit të deleguar të Interit, Bepe Marota, i cili dëshiron ta veshë zikaltër shqiptarin. Një arsye që ka shtyrë drejtuesit e klubit nga Milano, që të hedhin sytë nga mbrojtësi shqiptar është forma e dobët e kroatit Shime Vërsajlko.

Futbollisti i marrë në huazim nga Atletiko Madrid, nuk ka bindur me paraqitjet e tij, ndoshta dhe prej faktit që ka pasur dëmtime të njëpasnjëshme në gju dhe muskujt. Për momentin Spaleti ia ka besuar vendin e titulluarit D’Ambrozios dhe me shumë gjasa, opsioni për të blerë kartonin e Vërsajlkos nuk do të aktivizohet dhe 27-vjeçari do të rikthehet në Spanjë. Gjithsesi për të sjellë Interin në Milano, nuk do të jetë e thjeshtë, pasi presidenti i De Laurentis nuk ka ndërmend ta lëshojë shqiptarin pa të paktën 20 milionë euro.