Benitez

Klubi kinez plotëson kushtet e Benitez, blen sulmuesin e Premier League

Sport Ekspres — Fri, 19 Jul 2019 15:39:37 +0000

Sulmuesi venezulian Solomon Rondon është bashkuar sërish me trajnerin Rafa Benitez. Tekniku spanjoll ia ka dalë të bindë drejtuesit e klubit kinez të Dalian Jifang për t’i vënë në dispozicion futbollistin 29-vjeçar.

Salomon Rondon has joined Chinese Super League side Dalian Yifang.

All the best for the future, @salorondon23.#WBA https://t.co/svzy4nYTMH

— West Bromwich Albion (@WBA) July 19, 2019

Njukasëll nuk ia ka dalë të blejë kartonin e sulmuesit të cilin e pati sezonin e kaluar në formë huazimi nga Uest Bromuiç Albion. Skuadra kineze i ka ofruar 17 milionë paundë ekipit nga Midlands për të blerë përfundimisht kartonin e venezuelianit.

Rondon luajti për katër sezone në Premier Leauge ku në 140 ndeshje shënoi 36 gola. Në Kinë sulmuesin e pret një pagë dyfish më e lartë nga ajo që ai përfitonte në kampionatin anglez.

Benitez nuk e harron, merr ish-sulmuesin e Njukasëll në Kinë

Sport Ekspres — Mon, 15 Jul 2019 20:15:01 +0000

Rafa Benitez u transferua në kampionatin kinez për të drejtuar Dailan Jifang, që luan në elitën e futbollit të shtetit aziatik. Siç raportojnë mediet angleze, spanjolli do të marrë me vete edhe Salomon Rondon. Sulmuesi ka punuar vitin e kaluar si i huazuar me Benitez, duke qenë një nga të pëlqyerit e tij. Ai është pronë e Uest Bromuiç.
29-vjeçari do të transferohet në kampionatin kinez për të luajtur në të njëjtën skuadër, ku drejton Benitez. Bashkimi me ish-trajnerin e tij është arsyeja kryesore, që e bind venezueljanin të luajë në Kinë. Mbetet për t’u mësuar shifra e transferimit dhe kontrata që do firmosë bomberi.

Rondon luajti rregullisht sezonin e fundit me Njukasëll. Ai numëron 30 ndeshje si titullar dhe e ka dërguar 11 herë topin në rrjetë. Latini ka numra të mirë edhe me asistet, ku regjistron 7 të tillë në Premier Ligë. Ai ishte edhe pjesë e Kupës së Amerikës me kombëtaren venezueljane, ku u eliminuan nga Argjentina në çerekfinale.

Benitez: Liverpuli bëri ndeshje të madhe, por Stambolli…

Sport Ekspres — Fri, 10 May 2019 18:22:02 +0000

Rafael Benitez ishte trajneri në krye të Liverpulit në finalen e madhe të Stambollit në vitin 2005, ku të kuqtë e tij përmbysën disavantazhin 3-0 përballë Milanit, për të triumfuar më pas me penallti. Këtë sezon, Liverpuli përmbysi Barcelonën dhe arriti finalen e Champions League.

I pyetur se cila nga dy ndeshjet ishte më e bukura, Benitez u përgjigj: “Hajdeni pra, duhet ta dini. Mbrëmja e Stambollit është legjendare, e papërsëritshme. Përmbysja kundër Barcelonës ishte diçka shumë e mirë, por në Stamboll, Liverpuli ishte totalisht ndryshe.

Kishim vetëm 45 minuta për të përmbysur disavantazhin 3-0 përballë Milanit, një nga skuadrat më të mira në historinë e futbollit. Lojtarët luajtën me fanellë, me emocion. Nuk kishte më taktika. Liverpuli i këtij edicioni pati 90 minuta në dispozicion, në “Anfield Road”. Kështu që Stambolli ishte shumë më ndryshe dhe mbetet ndeshja më e mirë e Liverpulit”, u shpreh ish-trajneri i të kuqve.

Benitez vrer ndaj zikaltërve: Kutinjo? Tek Interi nuk e kuptonin!

Sport Ekspres — Sat, 27 Apr 2019 08:17:59 +0000

Rafael Benitez është një ndër trajnerët më të njohur në botën e futbollit, me spanjollin që ka drejtuar ekipe si Liverpuli, Çelsi, Reali i Madridit, si dhe Interi. Pikërisht për periudhën e tij te këta të fundit, trajneri ka folur së fundmi.

Benitez ka zbuluar se në kohën kur firmosi me zikaltrit në vitin 2010 i bënë shumë premtime, por asnjë nuk u përmbush. Gjithashtu, ai diskutoi edhe mbi Filipe Kutinjon, ku deklaroi se nuk e kuptonin që një lojtari si Kutinjo duhet t’i jepnin me patjetër hapësira.

“Kur erdha te Interi më bënë shumë premtime për sa i përket merkatos, por askush nuk erdhi. Kutinjo? Disa nuk arrinin ta kuptonin që për një lojtar si ai duhet të krijonim hapësira. Në atë kohë Kutinjo ishte vetëm 18 vjeç.”

Habit Benitez: Njukasëlli im, si Napoli!

Sport Ekspres — Thu, 11 Apr 2019 16:34:07 +0000

Rafael Benitez është një trajner që ka drejtuar kudo dhe shumë skuadra të mëdha. Liverpul, Real Madrid, Inter, Napoli, Çelsi dhe së fundmi Njukasëll. Stategu spanjoll po mundohet të ndërtojë diçka nga zeroja te skuadra e Njukasëllit, por në Angli është shumë e vështirë që të renditesh në 10 vendet e para, e jo më të kualifikohesh për në kompeticionet europiane.

Megjithatë, Benitez ka besim maksimal se do të arrijë gjëra të mëdha me skuadrën nga “Tyneside” dhe sot para mediave britanike, i ka befasuar të gjithë. Spanjolli tha se Njukasëlli ka potencialin që ka Napoli. Në fjalën e tij, Benitez tha:

“Kur isha te Napoli, Di Laurenti kishte ambicie. Prandaj investuam dhe sollëm emra shumë cilësorë në skuadër si Kulibali, Zhorzhinjo, Albiol, Reina, Higuain, Mertens, Kahejon e shumë të tjerë. Edhe Njukasëlli ka potencialin e Napolit, por duhet të përforcohemi në merkato. Nëse marrim 3-4 lojtarë cilësorë, Njukasëlli im është për në Europë”, përfundoi strategu.

Benitez: Liverpuli im s’kishte kaq shumë para, ja çfarë e vendos titullin

Sport Ekspres — Sat, 23 Feb 2019 19:25:22 +0000

Rafa Benitez është një trajner shumë i dashur për tifozët e Liverpulit. Spanjolli drejtoi të kuqtë nga viti 2004 në vitin 2010, ku arriti të fitonte trofeun e Champions-it. Megjithatë, titulli kampion mbeti një “ëndërr në sirtar” për të.

Në një intervistë të dhënë së fundi për medien spanjolle “MARCA”, Benitez komentoi garën për titull dhe bëri një krahasim të Liverpulit të tij dhe skuadrës së tanishem të Jyrgen Klop.

A ka fuqi Liverpuli për të marrë titullin kampion?

“Liverpuli i ka fuqitë, por pyetja më e drejtë në këtë moment është: A kanë ata më shumë fuqi se Siti ose Totenhemi, këta të fundit janë ende në garë, me lojtarë si Ali dhe Kejn nuk mund t’i nënvlerësosh. Do të na duhet të shohim çdo të ndodhë në ndeshjet vendimtare. Do të jetë një garë shumë e bukur për t’u parë. Nuk mendoj se do të ndikojë fakti që ata nuk e fitojnë titullin prej shumë kohësh. Kanë lojtarë dhe një trajner me shumë potencial, duhet të kenë vetëbesim”.

A shikon ndonjë ngjashmëri midis këtij Liverpuli dhe skuadrës së 2009-ës që gati fitoi titullin?

“Ndoshta kur ishim pa dëmtime, skuadra dukej si Liverpuli i tanishëm. Por në 6 vite shpenzuam 250 milionnë euro, ndërsa në vitin e fundit vetëm 17 milionë euro. Po të krahasojmë këtë Liverpul, duhet të kujtojmë se në tri vite ata kanë shënuar 400 milionë euro. Kjo është një diferencë e madhe në terma ekonomikë. Ne duhet të konkurronim duke shitur lojtarë, çka e bën gjithçka më të vështirë. Kur kthej kokën pas jam i lumtur me ato që arrita me atë buxhet”, përfundoi Benitez.

Rënia e Benitez | Dikur fliste për finale “Champions”-i, tani…

Sport Ekspres — Fri, 18 Jan 2019 20:30:14 +0000

Trajneri spanjoll i Njukasëll, Rafael Benitez ka qenë një nga më të kërkuarit dhe më të admiruarit në fillim të viteve 2000 dhe arritjet e tij me Liverpulin kanë qenë të pabesueshme. Të gjithë e mbajmë mend atë finale të “Champions League” në vitin 2005, ku të kuqtë përmbysën “mbretërit e Evropës”, Milanin, ndeshje që edhe sot konsiderohet si më e bukura në historinë e Ligës së Kampionëve.

Benitez gjatë kohës kur ishte trajner i Interit

Drejtimin e Liverpulit e kishte Benitez dhe pas asaj nate në Stamboll, të gjithë presidentët e klubeve elitare evropiane e donin në skuadër. E kështu ndodhi, Benitez mori drejtimin e Interit në vitin 2010, por këtu filloi rënia e tij. Pas dështimit te zikaltërit, u bë trajner i përkohshëm te Çelsi (2012-13) dhe trajner i Napolit (2013-15), por nuk arriti të përsërisë sukseset e Liverpulit.

Benitez kur u prezantua te Çelsi

Të gjithë u befasuan kur Benitez mori drejtimin e Realit të Madridit në fillim të sezonit 2015-16, por kishte dhe nga ata që besonin se 58-vjeçari do të rikthehej më në fund në elitën e trajnerëve. Nuk ndodhi kështu…

Benitez kur u prezantua te Real Madrid

Pas një viti të mbushur plot polemika, Benitez u largua nga Reali dhe karriera e tij preku fundin. Ekipi i vetëm që i besoi ishte Njukasëll Junajtid, në verën e vitit 2016, asaj kohë militonte në Championship.

Edhe pse e riktheu skuadrën bardhezi në Premier Ligë, Benitez nuk ka bërë ndonjë punë të jashtëzakonshme me skuadrën nga “Tuneside”. Është për të ardhur keq që një trajner që fliste për finale të “Champions League”, tani flet për një duel mbijetesë në Premier Ligë me Kardif Sitin. Ndoshta, bëri një gabim të madh kur u largua nga skuadre e kuqe e Liverpulit…

VERONIK ISTREFAJ

Video | Tifozët e Njukasëllit ngrihen në protesta ndaj pronarit kurnac

Sport Ekspres — Sat, 11 Aug 2018 19:42:02 +0000

Marrëdhënia midis pronarit të Njukasëllit, Majk Eshli, dhe tifozëve të klubit është në një pikë kritike. Eshli është një ndër personat më të pasur në Angli, falë rrjetit të dyqaneve të veshjeve sportive “Sports Direct”, por pavarësisht pasurisë së madhe, klubi i Njukasëllit për të është thjesht një biznes nga i cili ai dëshiron të fitojë të ardhura shtesë, megjithëse ato janë krejtësisht të papërfillshme kur merr parasysh se kemi të bëjmë me një miliarder.

Përplasjet midis presidentit dhe trajnerit Rafa Benitez po bëhen gjithmonë e më të forta dhe nuk do ishte çudi nëse tekniku spanjoll do të jepte dorëheqjen e parakohshme. Duke parë situatën aspak të mirë, disa qindra tifozë janë mbledhur para një dyqani të “SportsDirect”, duke protestuar në mënyrë paqësore, me kore kundër pronarit dhe në mbështetje të trajnerit Rafa Benitez.

Protesting Newcastle fans in fine voice outside Sports Direct on Northumberland St. pic.twitter.com/4CxcjHGmch

— George Caulkin (@CaulkinTheTimes) August 11, 2018

Benitez bën “magji”, merr thuajse falas qendërmbrojtësin e Zvicrës

Sport Ekspres — Fri, 27 Jul 2018 10:55:16 +0000

Një ndër titullarët e Zvicrës në vitet e fundit, qendërmbrojtësi Fabian Shar, është transferuar nga Deportivo La Korunja te Nukaslli, për një shifër qesharake në futbollin modern, vetëm 4.1 milionë euro.

Një gjetje spektakolare e trajnerit të Njukasllit Rafa Benitez, i cili ka një buxhet qesharak për merkaton, për shkak se presidenti Majk Eshli nuk ka ndërmend të shpenzojë për përforcime.

Shar, i cili luajti si titullar gjithë ndeshjet e grupeve në Kupën e Botës, por mungoi për pezullim në turin e dytë, është liruar thuajse falas për shkak se Deportivo ra nga La Liga dhe një klauzolë e lejonte të largohej nëse kjo ndodhte.

Një histori e çuditshme ajo e 26-vjeçarit, i cili është një ndër lojtarët më të mirë të Zvicrës (42 ndeshje në karrierë), por në tre transferime në karrierë, nga Bazeli tek Hofenhajmi, Deportivo e tani Njukasëll, ka kushtuar gjithmonë 4 milionë euro e poshtë. Sezonin e shkuar Shar ishte ndër titullarët e Deportivos, ndërsa pas prezantimit te Njukaslli ka deklaruar: “E zgjodha Njukasllin se është një shans i madh për mua, për të treguar sa vlej, ndërsa ka qenë vendimtare prania e Rafa Benitezit. Unë nuk jam një mbrojtës tipil, sepse jam i zoti me topin, më pëlqen të luaj, të organizoj lojën që nga mbrojtja dhe mendoj se kjo është një ndër pikat e mia të forta. Kam shënuar shpesh gola me kokë, shpresoj ta bëj edhe në Premier Ligë”.

Deri tani Njukaslli ka blerë edhe portierin Martin Dubravka nga Sparta e Pragës për 4 milionë euro, ndërsa mesfushori Ki Sung-jueng është marrë falas ng Suonsi.