Sipas “Sport Mediaset”, Milani është shumë afër marrëveshjes me Juventusin për transferimin e qendërmbrojtësit maroken Mehdi Benatia. Rikthimi i Bonuçit te kampionët e Italisë dhe forma e mirë e të riut Rugani, kanë bërë që drejtuesit e “zonjës së vjetër” ta hedhin në treg mbrojtësin e blerë nga Bajerni dy vite më parë.

Nëse marrëveshja konkretizohet, Benatia do të kalojë te Milani në muajin janar me një kontratë huazimi me detyrim blerje për të paktën 15 milionë Euro. Marokeni do të ishte një zgjidhje e përkryer për qendrën e mbrojtjes së shtatë herë fituesve të Champions-it, ku përkrah Alesio Romanjolit do të përbënte një dyshe shumë të fortë, të paktën në letër.

Pikë e fortë për Juven, ka qenë gjithnjë mbrojtja. Këtë vit rikthimi i Bonuçit në Torino, ka detyruar trajnerin Alegri të ulë në stolë përsëri Mehdi Benatian. Mbrojtësi maroken ka luajtur në vetëm 3 sfida si titullar. Gjithsesi 31-vjeçari duket se ndihet i lumtur te Juventus dhe ka folur për mediat italiane pas ndeshjes ndaj Jang Bojs, ku dhe luajti për 90 minuta. Sipas qendërmbrojtësit “zonja e vjetër” në Itali nuk ka rivalë.

“Bëmë një ndeshje të mirë ndaj Jang Bojs. Mendoj se bëra një paraqitje të kënaqshme dhe jam i lumtur që nuk pësuam gol. Skuadra që jemi këtë sezon është e frikshme. Vetëm vetja jonë mund të na ndalë. Jam i bindur që do t’i përmbushim objektivat e vëna në fillim të sezonit. Kemi më shumë kualitet se sa një sezon më parë, por gjithsesi nuk duhet të nënvlerësojmë asnjë kundërshtar”, ka deklaruar mbrojtësi maroken.