Dënim i rëndë për Romela Begaj, karriera e shqiptares drejt fundit

Sport Ekspres — Thu, 24 Jan 2019 15:19:02 +0000

Kampionia në peshëngritje, Romela Begaj është dënuar sërish nga Federata Botërore e peshëngritjes, pasi janë gjetur substanca dopingu në sistemin e saj. Peshëngritësja kuqezi është dënuar dhe më parë për përdorim dopingu dhe si pasojë, ky dënim i përsëritur është shumë më i rëndë se ai i pari.

Sipas një dokumenti i cili është siguruar nga “TopChannel”, Begaj është dënuar plot 8 vite nga aktivitet sportive. Duke marrë parasysh moshën e sportistes kuqezi (33-vjeçe), karriera e saj mund të konsiderohet e përfunduar.

Vendimi i Federatës Botërore të peshëngritjes:

“Duke qenë se sportistja e ka të përsëritur pozitivitetin ndaj dopingut, do të dënohet me sanksionin maksimal që është 8 vjet dhe do të hiqen të gjitha rezultatet nga aktiviteti ku ka rezultuar pozitive dhe të gjitha rezultatet nga periudha e fillimit të kësaj çështjeje, që është fundi i vitit 2017”.

Mbrojtja e sportistes Romela Begaj:

“Vij nga një familje e varfër dhe kam kaluar shumë vështirësi nga fëmijëria ime deri më tani. Sporti i peshëngritjes është i vetmi burim të ardhurash për mua dhe nuk do të bëja asnjëherë asgjë për të prishur karrierën time”.

Romela Begaj historike, dy medalje në Amerikë

Sport Ekspres — Sun, 03 Dec 2017 01:25:49 +0000

Romela Begaj nderon Shqipërinë në Kampionatin Botëror të Peshëngritjes, që po zhvillohet Anaheim, në Shtetet e Bashkuara në Amerikës.

Një mrekulli për sportisten 31-vjeçare, por edhe për Shqipërinë, që fiton një medalje ari pas 45 vitesh, sepse Begaj fitoi të artën në shkëputje, ndërsa në dygarësh u rendit e dyta, pas kolumbianes Leidi Jesenia Solid Arboleda.

Në shkëputje Begaj kreu 3 prova perfekte dhe ngriti 107 kg (rekord personal), ndërsa në shtytje ngriti 125 dhe 128 kg (rekord personal), por kur provoi 131 kilogramët, nuk ia doli dhe pësoi një dëmtim serioz në shpinë, duke mbetur e shtrirë në tokë dhe duke u larguar me ndihmën e stafit të saj. Një sakrificë e madhe për Begajn, që kishte dhimbje që më herët, por tentoi të pamundurën, pasi në provën e fundit kërkoi të siguronte vendin e parë, që ia mori Solis Arboleda, e jashtëzakonshme në shtytje, me 135 kg.

Gjithsesi, medalje e argjendtë në dygarësh, një arritje madhështore për Begajn, që shkruan emrin e vet me germa të arta në historinë e peshëngritjes sonë. Me 235 kg në dygarësh, Begaj theu çdo rekord të vetin dhe kap kulmin e karrierës së vet.